Akilinermiut allat utoqqatserfigineqarnissartik piumasaraat

Naggueqatigiit Inuit Akilinermiut 1950-imiit 1960-ip tungaanut pinngitsaalisaallutik Canadap kujataani sumiiffinni assigiinngitsuni qaqortumik amilinni inissinneqartarsimasut - taaneqartartut “Naggueqatigiit Inuit misiliutaasut” - arfineq marluk, utoqqatserfigineqarnissaminnik taarsiiffigineqarnissaminnillu piumasaqalerput.

Naggueqatigiit Inuit taakkua qaqortumik amillit akornanni inuulersinnaanersut, tuluit oqaasiinik ilinniarsinnaanersut – ataatsimut isigalugu qaqortumik amilittut, atugartuussusilittut inuulersinnaanersut takuniarlugu misiliutaasutut atorneqarsimapput. Inuit taakkua Canadap kujataaniinnerminni imminnut atassuteqarsimanngillat qaqutigorujussuarlu ilaquttatik takusarlugit. Taamaammat maanna Canadami naalakkersuisut unnerluutigaat tamarmillu immikkut 500.000 koruuninik taarsiiffigineqarnissartik utoqqatserfigineqarnissartillu piumasaralugu. Inuit arfineq marluk taakkua ilagaat, Peter Ittinuar, naggueqatigiit Inuit Canadap inatsisartuinut qinigaasut siullersaat, kiisalu Makivik-mi præsidentiusimasoq, Zebedee Nungak.

Inuit misiliutaasimasut ilaat Radioaviisimut oqaluttuarpoq, atuartitaareerami illut pequtaannik sanaartorfimmi qillarissaasartutut ilinniartunngortitaasimalluni.

Inuit unnerluussisut oqarput kulturiminnik oqaatsiminnillu arsaagaasimallutik, kiisalu ilaquttaminnut inuiaqatigiinnullu takornartatut misigisimalersimallutik.

Unnerluussinerup eqqartuussivimmi aappaagu suliarineqarnissaa ilimagineqarpoq.