Akiliisitsilluni piniartitsisinnaanissamut allagartartaarnissamut malittarisassat sukannernerulissagunartut
![](/sites/default/files/styles/image_934x467/public/article_images/moskusokse_630_0_0.jpg?itok=bwTQiNq8)
NAQQIUT: Ilanngutassiami siusinnerusumi allannguutissatut siunnersuutit inuussutissarsiutigalugu piniarsinnaanermut uppernarsaatinut nalinginnaasumik tunngasut allassimagaluarpoq. Malittarisassalli nutaat akiliisitsilluni piniartitsisarnissamut akuersissummik pissarsinissamut tigumminniinnarnissamullu kisimi tunngapput. Ilanngutassiamilu siusinnerusumi akiliisitsillutik piniartitsinissamik neqerooruteqartut isertitaasa minnerpaamik affaat aalisarnermit piniarnermiillu allamit isertaassasut allassimagaluarpoq. Eqqortorli tassaavoq neqerooruteqartut isertitaasa ikinnerpaamik affaat akiliisitsilluni piniarnermeersuussammata. KNR-ip kukkuneq ajuusaarutigaa.
Aallaaniarneq nuannarigukku akiliisitsillutillu piniariartitsisartunngorniaruit, taava taakkununnga malittarisassat allanngoratarnissaannut alaatsinaattariaqarputit.
Naalakkersuisummi akiliisitsilluni piniartitsisarnissamut akuersissutersinissamut malittarisassat 2025-mi januaarip aallaqqaataanit sukannernerulersikkusuppaat.
Ullormit tassannga akuersissuteqalernissamik qinnuteqarniaruit nunatsinni aalajangersimasumik ukiuni tallimani najugaqarsimassallutillu nunatsinniissimassaatit.
Piumasaqaat taanna ullumikkut ukiunik marlunnik sivisussuseqarpoq.
Akiliisitsilluni piniartitsisinnaanermut allagartartaarumasut nunatsinni piniarnermik piniariaatsinillu misilittagaqartuullutillu ilisimannittuunissaat qularnaarumallugu inatsimmik allannguinissaq siunnersuutigineqartoq, inatsimmut allannguutissatut siunnersuummi allassimavoq.
Siunnersuutaalli allamik aamma ilaqarpoq, tassa akiliisitsilluni piniartitsisinnaanissamut allagartartaarumasunut piumasaqaatit aalajangersimasumik najugalittut Kalaallit Nunaanniissimasussaatitaanermut tunngasuusut aamma sukannernerulissasut siunnersuutigaat.
Nunami allami ilinniareerlutik, ilinniarnerminnut atatillugu suliffimmik misileereerlutik sulereersimallutilluunniit nunatsinnut angerlarunik piniariutsimik aallartitsiniartut tassani pineqarput.
Ukiumut isertitaasa affaat akiliisitsilluni piniartitsisinermit isertitaqaataasimasuussasut
Piniarnermut aalisarnermullu inatsimmi akiliisitsilluni piniariartitsisarnermut allannguutit taakkuinnaassanngillat.
Tassami inatsimmik allannguinissamik siunnersuutaat akuerineqassappat, akiliisitsillutik assersuutigalugu takornarianik soorlu tammajuitsussarsiniarluni piniariartitsisartunut piumasaqaatit aamma nutartissapput.
Akiliisitsillutik piniariartitsisartut isertitaasa minnerpaamik affaat akiliisitsilluni piniartitsinermit isertitaassapput. Tamanna pingaartumik takornarialerisunut ullumikkut takornarianik angalaartitsinernik allanik akiliisitsilluni piniartitsisarneruinnaanngitsunit isertitalinnut pingaartumik sunniuteqassaaq.
Akiliisitsillutillu piniariartitsisartut 50 procentimik piumasaqaatinik naammassinninngippata, taamaaliorsinnaatitaanermut allagartartik annaassavaat.
Inatsimmik allannguinissamik siunnersuut ukioq manna juulip 17-ianiit aggustip arfineq-pingajuata tungaanut tusarniaassutigineqarpoq.
Inatsimmillu allanngunissamik siunnersuut Inatsisartut ukiaru ataatsimiinneranni amerlanerussuteqartunit akuersissutigineqassappat, tamatuma kingorna atuutilissaaq.