Takornarialerisut isornartorsiuisut: Akiliisitsilluni piniartitsineq pillugu siunnersuut nutaaq aalisartunik piniartunillu salliutitsisoq
![](/sites/default/files/styles/image_934x467/public/2024-08/Andesr.jpg?h=5ebeb636&itok=AbK7eKnW)
Nuummi takornarialerinermik suliffeqarfik Uppik Adventure umiatsiamik angalaartitsinernit tammajuitsussarsiniarluni piniartitsinernut neqerooruteqartartoq ingerlalluarpoq.
Suliffeqarfik Anders Lee Jørgensenip sunngiffimmi suliniutaanit ukiut pingasut ingerlaneranni tamakkiisumik suliffinngorpoq, namminersortullu arlallit ukiup ingerlanerani sulisorisarpai. Pingaartumillu piniarniarluni angalaarnerit soqutigineqarluartarput.
- Isertitat immaqa 25 procentiisa missaraat, Anders Lee Jørgensen Europamit Amerikallu avannaanit pisisartoqartoq oqarpoq.
Piniarnermulli aalisarnermullu inatsimmut allannguut akuerineqassappat taama neqerooruteqaannarsinnaanissani ilimaginngilaa.
Naalakkersuisummi takornarianut piniariartitsinermik - tammajuitsussarsiarluni piniariarnermik aamma taaneqartartumik neqerooruteqartartut isertitaasa affaat tassannga isertitaasalernissaat siunnersuutigaat.
Tamannalu Anders Lee Jørgensenimut suliffeqarfiutaanullu ajornakusoortitsissaaq.
- Tamanna uannut ilungersunassasoq eqqarsarpunga. Ajoraluartumillu tamanna takornariaqarnermik ingerlatamma ineriartortinneranut arriinnerulersitsissalluni, taanna oqarpoq.
Anders Lee Jørgensenilli nammineq suliffeqarfini kisiat eqqarsaatiginngilaa:
- Nuummi inuusuttut arlallit takornariartitsivimmik pilersitsinissamik aamma takornariartitsivimmik akiliisitsillutik piniartitsisartumik peqalernissaminnik takorluugaqartut ilisimavakka. Taakkuli taamaaliorsinnaanavianngillat, taakkumi isertitassaasa 50 procentii tikillugit aalisarnermit piniarnermiillu isertitaasinnaanavianngillat. Aallaqqaataani taamaliorsinnaanavianngillat.
Uppik Adventure-ip piginnittuata piffissap ilaani aalisartuunissaq piniartuunissarlu tutsuiginngilaa.
Muminganilli malittarisassat nutaat piffissami sivisuumi akiliisitsilluni piniartitsisartooreersunut takornariartitsisartunut angisuunut aamma KNAPK-mi ilaasortanut kisimik iluaqutissartaqarsorai.
- Piumasaqaallu una ilanngukkaanni piniartuullutillu aalisartooreersut salliunneqangaatsiassapput.
Takornariaqarnermut periusissiap mumingarluinnaa
Inatsisissatut siunnersuutip oqaaseqaatertai atuaraanni akiliisitsilluni piniartitsineq inuuniutigalugu piniartunit, kalaallit pinngortitaanut, piniariusaanut ileqquinullu ilisimannilluinnartunit kisiat neqeroorutaanissaa politikerinit qulakkeerusunneqartoq ersarippoq.
Tamannalu piumasaqaataassasoq, Illersornissaqarfimmi sivisuumi sulisimasoq, Anders Lee Jørgensen isumaqarpoq.
Kisianni inatsit akiliisitsilluni piniartitsisinnaanissamut akuersissutissarsiniarnermut piumasaqaat qaffasereersoq taanna isumaqarpoq.
- Tamanna ingerlaannartumik pissarsiarineqarsinnaanngilaq. Qinnuteqartoqartarpoq, taava Piniarnermut Aalisarnermullu Naalakkersuisoqarfimmit ataasiakkaanik naliliisoqartarpoq, tassanilu KNAPK aamma illuatungiliuttutut tusarniaaffigineqartarluni. Takornarianut aaqqissuussinermik naammassinnissinnaanissamut piginnaasaqarnermik uppernarsaasoqassaaq, aamma piniarnermi aalisarnermilu misilittakkat uppernarsarneqassapput.
Tamatuma saniatigut taassuma isigaani allannguutit Visit Greenlandip periusianut tassa nunarput misigisassarsiortitsinerup iluani pilerinarsaanerulernissaanut periusiata tamanna mumingarilluinnarpaa, minnerunngitsumillu Nuummut timmisartumik toqqaannartumik aqquteqarnerani.
Aallaaniartartullu misigisassarsioriarlutik takornariartartuusut, Anders Lee Jørgensen isumaqarpoq.
- Aallaaniat takornarianut allanut sanilliullugit aningaasarpassuarnik akiliuteqartarput, taakkulu ukiup ilaani takornariarpassuit allat tikerarfiginngisaanni tassa ukiakkut upernaakkullu tikittarlutik. Taamaammat aallartitsilluarata ajoraluartumik uniffiliissaagut.
Kommunit siunnersuut isornartorsioraat – KNAPK nersualaarisoq
Siunnersuut kommuninit arlalinnit aamma tigulluarneqanngilaq.
”Inatsisinik allannguineq akiliisitsilluni piniartitsineq saniatigut inuuussutissarsiutigalugu neqeroorutaasinnaajunnaassasoq”, Kommuneqarfik Sermersuumi Sanaartornermut Avatangiisinullu Ingerlatsivik tusarniaanermi akissummi allappoq.
Qeqqata Kommuniata siunnersuut aamma ernumanartoqartippaa.
Kommune Qeqertalimmi aamma Avannaata Kommuniani takornarialerisut tallimat isertitat 50 procentiisa aalisarnermit piniarnermiillu isertitaasalernissaanik aaqqiissut aamma isornartorsiorpaat.
- Inuussutissarsiummut aningaasaliinikuuvugut, sumiiffimmi takornarialerisuusugut, tamatta nunatsinni inunngorsimavugut. 50/50-imik aaqqiissut allanngortinneqanngippat tamanna uatsinnut eqquissaaq, taakku allapput.
Aalisartulli piniartulli kattuffiata, KNAPK-p pinngortitamik avatangiisinik, uumasoqarnermik, silap pissusianik, ileqqunik, kulturimik piniartarfinnillu ilisimasaqarluartoqarnissaanik piumasaqaat nersualaarutigaa.
- Taamaammat akiliisitsilluni piniartitsinermik ingerlatsilinnginnermi pissutsinut atugassarititaasunullu paasisimasaqarluarnissaq ilisimasaqarluarnissarlu inissaminiippoq.
Piniarnermut aalisarnermullu inatsimmi allannguutissatut siunnersuut ukiakkut ataatsimiinnermi oqaluuserineqassaaq.