Avatangiisit illersorneqarnissaannik suliniuteqartoq Uummannamut tusarniaalluni angalassasoq
Imartani avatangiisit illersorneqarnissaannik suliniuteqartoq Oceans North Kalaallit Nunaat Uummannap Sulluani innuttaasunik arlalinnik ataatsimiititsissaaq.
Suliniaqatigiiffiup illoqarfiit nunaqarfiillu arfinillit sapaatip akunnerani angalanerminni tikeraassavai.
Taakku sumiiffimmi attanneqarsinnaasumik aalisarnissamut piniarnissamullu isummanik unammilligassanillu tusarniaassapput.
Aatsaat siullermeertumik angalanngitsoq
ONKN sumiiffimmi innuttaasut imartat pillugit isumaannik tusarniaalluni aatsaat siullermeerluni angalalinngilaq. Suliniaqatigiiffik nunatta kujataanut tusarniaalluni siorna septembarimi aamma angalavoq.
ONKN-ip angalanissartik tusarniaanermi angalanertut taavaa. Umiarsuarmimi nassataqaraluaqalutik sumiiffimmi attanneqarsinnaasunik imartani avatangiiseqarnissamut eqqarsaatigineqartut tusarniarnissaat siunertaraat.
Taamaammat inuussutissarsiuteqartut soqutigisaqartullu oqaloqatiginissaat pilersaarutaavoq.
Tamatuma saniatigut peqataasut tamarmik unammisitsinermut aamma nunami sumiiffinni assigiinngitsuni sanilliussinermut tunngavimmik pilersitsiniarluni aalisarnermik piniarnermillu suliaqarneq pillugu taasititsisoqarneranut peqataasoqarsinnaavoq.
Siunissami ingerlatiinnarneqassasoq
Tusarniaalluni angalaneq iluatsilluarpat siunissami tusarniaajartortoqaannassaaq.
ONKN-ip nunatsinni sumiiffinnut allanut tusarniaalluni angalanerit arlallit ukiuni tulliuttunut arlalinnut pilersaarutigai. Angalanermi misigisat suliniaqatigiiffiup nunatsinni aalajangiisartunut innersuussuteqarnissaanut suliaqarnermut sunniuteqassapput.
ONKN angalanermini Uummannamiittassaaq, ulluinnarnili inoqarfinnut tikeraartassalluni.
