Nunatsinni akerliusoqaraluaqisoq DR-ip isummani attatiinnarpaa: Suna tamaat unittarpoq
Ileqquusartoq "Julehilsen til Grønland", DR-ip uninnerarlugu sisamanngormat saqqummiuppaa. Aallakaatitassiarlu ukioq manna aallakaatinneqassanngilaq aallakaatinneqaqqinngisaannassallunilu.
KNR-imullu atuisut akerlioqaat. Ilai atsiornernik katersinissamik siunnersuuteqarput. Ilaalu naammagittaalliornissamut malitassap KNR Nutaarsiassaqartitsiviup Facebookikkut saqqummiussaa malillugu DR-imut naammagittaalliorput.
Iluaqutaanngillalli. Tassami ileqqutoqqap ataqqineqaqisup "Julehilsen til Grønland" ukiut 91-it aallakaatinneqartareerluni unippoq.
- Ileqquusup unitsinneqarnera annernarsinnaasoq paasisinnaavara. Sunali tamarmi uniffeqarpoq, TV-kkut aallakaatitsinerit aamma, DR-imi aaqqissuisoqarfimmi pisortaq, Gustav Lützhøft, KNR-imut oqarpoq.
Aallakaatitassiaq ullutsinnut tulluukkunnaartoq
Aallakaatitassiaq radiokkut 1932-mi siullermeerluni aallakaatinneqarpoq. 1983-imiilli TV-kkut aallakaatinneqartalerpoq. Ilaqutariillu kammalaatigiillu nunatsinni Danmarkimilu najugallit juullimi inuulluaqqusisoqartillugu isiginnaarutikkut imminnut takusarnerat tamaanga killeqarpoq.
- "Julehilsen til Grønland"-ip ukiorpassuarni amerlasuunut isumaqartorujuusimanera paasisinnaanerpaavara. DR-imilu aallakaatitassiaq nuannareqaarput. Aallakaatitassiarli inuit imminnut attaveqarluarsinnaanngikkallarmatali pilersitaavoq. Maannali nunatsinnit Danmarkimiillu attaveqatigiinnissat allarpassuarnik periarfissaqarpoq, tamannalu aamma imatut kinguneqartitsissutigaarput, Gustav Lützhøft oqarpoq.
DR-ip aallakaatitseriaaseq ineriartortiinnarsinnaannginneraat amerlasuut aperipput. Ileqqoq attakkumallugu aallakaatitassiaq nutarsarlugu aallakaatitsisarneq ingerlatiinnarneqarsinnaava ?
- Soorunami taamaassinnaagaluarpugut, allamillu suliaqarniarluta toqqaannarparput. Naalagaaffimmi ullutsinnut naleqqunnerusumik aallakaatitsisarusulluta juullimi inuulluaqqusisarneq unitsissallugu toqqarparput, aaqqissuisoqarfimmi pisortaq oqarpoq.
Aallarteqqinnissaanut neriuut
Nuummili innuttaasut tamanna tusarluaatiginngilaat. Naak naalagaaffiup iluani allakkanik, assinik videonillu ulloq naallugu nammineq nassissisarsinnaagaluarluta, sofami katerilluni isiginnaarasuartaatikkut malinnaaneq, ilaquttanit kammalaatinillu Danmkarkimiittunit inuulluaqqussutit unipput.
- Ilaquttakka Danmarkimiittut ilaasut takusinnaasarakkit. Matulersoq tusarlugu assut uggornarpoq. DR-ip juullimut inuulluaqqusisitsisarnera maqaasinassaqaaq, KNR-ip Nuuk Centerimi naapitaa, Johanne Petersen Jensen taama oqarpoq.
Aviaja Ikila Abelsenilu isumaqataavoq.
- Juulli tamatsinnut pilluartitsisarpoq, erinarsoqattaarnerit assigiinngitsut pisarput. Juullip tipaatsunnartua amma pingaaruteqarluinnarpoq, taanna oqarpoq.
- Uanga ukiut tamaasa isiginnaaraangakku qamuunakkut assorujussuaq pissarsiffigisarpara. Ilisarisimasat ilaquttallu kikkut ilaanersut isigalugit. Kalaallit Nunaat tamaat pilluarnerujussuarmik tunisisaraa uanga isigisarpara. Tassunga assorujussuaq ataqqinnippunga, Theresie Pedersen oqarpoq.
Taamatullu pisoqaqqissanngitsoq, DR oqarpoq. Aallakaatitsiviummi aallakaatitsinermi aningaasat atorneqartartut sipaarfigalugit naalagaaffik pillugu allatut aallakaatitserusupput
- Kalaallit piorsarsimanerat, innuttaasui naalagaaffeqatigiiffiullu aallakaatinneqarluartassasoq isumaqarpugut. Juullimiinnaanngitsorli, tassa ukioq kaajallallugu. Ileqqoq ataqqigaluaqalugu, Kalaallit Nunaat pillugu ukioq kaajallallugu aallakaatitsisarnissaq pingaarnerutipparput, Gustav Lützhøft oqarpoq.
