Aki-Matilda Høegh-Damip USA-mut isumaqatigiissut pillugu peqataatitsinerusoqarnissaa ujartoraa
Naalakkersuisut siulittaasuat Jens-Frederik Nielsen (D) aamma nunanut allanut naalakkersuisoq Múte B. Egede (IA) Kalaallit Nunaata, Danmarkip USA-llu akornanni isumaqatigiissut nutaaq atsioriartorlugu, USA-mut sapaatiummat aallarput.
Nunatsinnili inuit amerlanerit isumaqatigiissutip imarisaa paaserusuppaat.
- Isumaqatigiissutip Inatsisartuni ilaasortanit tamanit oqallisigineqaqqaartinnagu atsiorusunneqarnera tupigusuutigaara, Aki-Matilda Høegh-Dam (N) oqarpoq.
USA-p præsidentiata, Donald Trumpip, nunat taakkua pingasut isumaqatigiissuteqarsimanerat tallimanngormat nalunaarutigaa. Tamanna naalakkersuisup siulittaasoqarfiata naalakkersuisoqarfianit ministeriuneqarfimmiillu kinguninngua uppernarsarneqarpoq.
Isumaqatigiissutip New Yorkimi atsiorneqarnissaa naatsorsuutigineqarpoq, danskillu ministeriunerat, Mette Frederiksen, nunanullu allanut ministeri, Lars Løkke Rasmussen, FN-ip ataatsimeersuarneranut peqataajartorlutik New Yorkimut aallarput.
Naalakkersuisup siulittaasuata naalakkersuisoqarfiata aamma ministeriuneqarfiup nalunaarutai naapertorlugit, isumaqatigiissut Issittup Atlantikullu avannaata isumannaatsuunissaanut nakussassaataassaaq.
Isumaqatigiissutilli sunarpiaq siunertarineraa suli oqaatigineqanngilaq.
Aki-Matilda Høegh-Damip tamanna 'issanngunartuusoraa'.
- Aalajangiineq kinguaassatsinnut, meeqqatsinnut Kalaallit Nunaatalu qanoq ineriartornissaanut pingaarutilerujussuuvoq.
Taamaattumik taassuma innuttaasut qanoq pisoqarumaarneranik naalakkersuisunit paasissutissinneqarnerunissaat ujartorpaa.
- Susoqartoruna? Qanoruna ingerlariaaseqartoqartoq? Naak isumaqatigiissutip imarisai suli isertuussaagaluartut, akissutip ersarissup paasinissaa toqqissisimalersitsissaaq, Aki-Matilda Høegh-Dam oqarpoq.
Killiliussat qaangerneqanngitsut
Múte B. Egede KNR-imit, USA-p præsidentiata isumaqatigiissut pillugu inoqatinut attaveqatigiiffimmini, Truth Socialimi, allaaserisaqarnerata kinguninngua, tallimanngornermi apersorneqarpoq.
- Isumaqatigiissummi uagut tungitsinnit aallaqqaammulli anguniagarput erserpoq; Kalaallit Nunaata inissisimaffiata akuerineqarnissaa, Múte B. Egede oqarpoq.
- Kalaallit Nunaata nammineq aalajangiisinnaassuseqarnerata akuerineqarnissaa kalaallit inuit nunat tamalaat akornanni inatsit naapertorlugit pisinnaatitaaffiisa akuerineqarnissaat, Múte B. Egede apersorneqarluni oqarpoq.
Isumaqatigiissutip imarisai sukumiinerusumik oqaaseqarfiginngilai.
Donald Trumpip oqarnera naapertorlugu, isumaqatigiissut USA-p Kalaallit Nunaanni isumannaallisaanermut pisariaqartitanullu allanut tamanut ataavartumik aqutsinissaanik kinguneqassaaq. Truth Socialimi tallimanngornermi taama allappoq.
Trumpip allaaserisaa naapertorlugu, isumaqatigiissutip USA-p akerlilersuisuisa arlaannaataluunniit USA akuersissuteqartinnagu Kalaallit Nunaanni sakkutooqarfimmik pilersitsisinnaannginneranik, sakkutuulersuisinnaannginnissaanik aningaasaliisinnaannginneranillu aamma kinguneqassaaq.
- Tamannarpiaq ernumanarpoq, Aki-Matilda Høegh-Dam oqarpoq.
Taanna isumaqarpoq, Trumpip oqaasii toqqaannartumik issuarneqassanngitsut.
- Aammali oqaasii ingasattajaaraluaraangataluunniit amerlanertigut ilumoortortaqartarnerat naluneqanngilaq, taanna nangilluni oqarpoq.
Innuttaasut ilisimatinneqarnissaannut kajumissaarisoq
Trumpip oqarnera naapertorlugu, USA Kalaallit Nunaanni inuiaqatigiit suleqatigalugit sakkutooqarnikkut piorsaalluni ingerlaannaq aallartissaaq.
Aki-Matilda Høegh-Damip tamanna naatsorsutigineqarsinnaanerarpaa.
- Taamaakkaluartoq Kalaallit Nunaata isumaqatigiissummit qanoq pissarsissanersoq pissanganarpoq.
- Kalaallit Nunaat tamakkua kingunerannik kisimi atugaqartitaalinnginnissaa, kisiannili aamma sakkutooqarfiit, avatangiisinut innuttaasunullu kingunerisinnaasaat eqqarsaatigalugit, tamakkua isumaqatigiissummi oqimaaqatigiissaarneqarnissaat qanoq ililluta qulakkiissavarput? Taanna aperivoq.
KNR-ip isornartorsiuineq naalakkersuisut siulittaasuannut sapaammi saqqummiuppaa, allaaserisalli saqqummiunneqannginnerani oqaaseqartissinnaasimanngilaa.
Siumut naalakkersuisunut innuttaasut Inatsisartullu piaarnerpaamik ilisimatinneqarnissaat pillugu aamma kajumissaarivoq.
Inatsisartunut ilaasortaq Erik Jensen inoqatinut attaveqaatikkut taama allappoq.
Taassuma isumaqatigiissutissatut siunnersuusiaq atuareerpaa toqqissisimallunilu, inuppassuilli isumaqatigiissut pillugu paasisaqarnerorusunnerat paasisinnaavaa.
- Oqartariaqarpungalu toqqissisimallunga aamma ernumananga, nunanut allanut naalakkersuisup sulinera pitsaasumik ingerlammat, Erik Jensen allappoq.
Isumaqatigiissut Kalaallit Nunaata, Danmarkip USA-llu akornanni isumaqatigiinniarnerit, Donald Trumpip USA Kalallit Nunaannik tiguaarusunneranik oqaatiginneqattaarnerata kingorna, qaammatit arfineq-pingasut sinnerlugit ingerlanneqareersullu, maanna piviusunngorpoq.
Kalaallit Nunaat, Danmark USA-lu illersornissaq pillugu, USA-p Kalaallit Nunaanni sakkutooqarsinnaatitsisumik, 1951-imeersumik isumaqatigiissuteqareerput.
