Kalaallit Nunaat pillugu isumaqatigiissutigineqartussap eqikkarnera: Ilisimasagut akissutissarsinngisagullu
Nunatta, Danmarkip USA-llu suleqatigiissitaat, qaammatit arfineq pingasut sinnerlugit isumaqatigiinniareersullu, isumaqatigiissuteqartoqangajalerpoq.
Amerikamiut præsidentiat Donald Trump, inuit attaveqaqatigiittarfiisigut Truth Socialikkut, tallimanngornermi unnukkut tamanna pillugu nalunaaruteqarpoq.
Naalakkersuisut Siulittaasoqarfia aamma Statsministeriet tusagassiuutinut nalunaarummi ataatsimoorussami allapput, Kalaallit Nunaat, Danmark USA-lu Issittumi Atlantikullu avannaani isumannaallisaanermik nukittorsaasussamik isumaqatigiissummik atsioqatigiinnissartik naatsorsuutigalugu.
Isumaqatigiissut pillugu suut ilisimavagut suullu ilisimanngilagut? Pissutsit qanoq innerat maani paasiniarparput.
Sapaatip akunnerani aggersumi atsiorneqassasoq
Isumaqatigiissut suli tamanut saqqummiunneqanngilaq, taamaattumik sunik imaqarnersoq naluarput.
Naalakkersuisut Siulittaasoqarfia Statsministerieqarfillu naapertorlugit, isumaqatigiissut sapaatip akunnerani aggersumi atsiorneqassaaq. FN-ip Ataatsimeersuarnerata nalaani septembarip 22-anni atsiorneqassangatinneqarpoq. Isumaqatigiissutilli tassani atsiorneqarnissaa suli uppernarsarneqanngilaq.
Naalakkersuisut siulittaasuat Jens-Frederik Nielsen (D), ministeriuneq Mette Frederiksen USA-llu præsidentia Donald Trump isumaqatigiissummik atsiornissaat naatsorsuutigineqarsinnaasoq, tusarfiit DR-imut ilisimatitsissutigaat.
USA qanoq oqarpa?
USA-p præsidentiata Donald Trumpip Kalaallit Nunaat pillugu isumaqatigiissuteqartoqarsimanera, tallimanngormat unnukkut nalunaarutigaa.
Trumpip nalunaarutaa naapertorlugu, USA isumaqatigiissutip kingunerisaanik, Kalaallit Nunaanni isumannaallisaanermut pisariaqartitanullu allanut tamanut ataavartumik nakkutilliisunngussaaq.
Trump nangilluni oqarpoq, USA-mut akerliusut kikkulluunniit USA-mit akuerineqaqqaarnatik Kalaallit Nunaanni sakkutooqarfimmik pilersitsisinnaanngitsut, sakkutuulersuisinnaanngitsut aningaasaliisinnaanngitsullu.
Trumpillu nalunaarutaa naapertorlugu, isumaqatigiissut naassaanngitsumik atuutissaaq.
USA Kalaallit Nunaanni innuttaasut suleqatigalugit ingerlaannaq sakkutooqarnerulersitserusuppoq.
Kalaallit Nunaat Danmarkilu qanoq oqarpat?
Naalakkersuisut Siulittaasoqarfia aamma Statsministeriet tusagassiuutinut nalunaarummi ataatsimoorussami allapput, Kalaallit Nunaat, Danmark USA-lu Issittumi Atlantikullu avannaani isumannaallisaanermik nukittorsaasussamik isumaqatigiissummik atsioqatigiinnissartik naatsorsuutigigaat.
Naalakkersuisut siulittaasuat, Jens-Frederik Nielsen, isumaqatigiissut Kalaallit Nunaata, Danmarkip USA-llu isumannaatsuunissaannik qulakkeerinnissasoq oqarpoq.
Jens-Frederik Nielsenip oqarnera naapertorlugu, Kalaallit Nunaata soqutigisai nunanilu tamalaani suleqatigiinnermi inissisimaffia isumaqatigiissummi akuerineqarput.
Ministeriuneq Mette Frederiksenip oqarnera naapertorlugu, Kunngeqarfiup Danmarkip kisimi oqartussaanera nunallu ataatsimoorneri kiisalu kalaallit namminneq aalajangiisinnaatitaanerat, isumaqatigiissummi akuerineqarput.
Qaammaterpaalunni isumaqatiginninniarneq
Nunatta, Danmarkip USA-llu akornanni sivisuumik ilungersunartorsiortoqareersoq isumaqatigiittoqarpoq.
Donald Trump USA-p nunatsinnik aqutserusunneranik ukiuni kingullerni arlaleriarluni oqariartuuteqartarpoq.
Nunat taakku pingasut januaarimi suleqatigiissitaliorput, taakkulu USA-p Kalaallit Nunaanni kissaatai pillugit aaqqiissutissarsiniarnissaq siunertaralugu, Kalaallillu Nunaata Danmarkillu killiliussaat, pingaartumik naalagaaffeqatigiinnermut tunngasut, ataqqillugit.
Nunanut allanut ministerit pingasut, Vivian Motzfeldtip (D) (Siumuusimasoq, aaqq.), Lars Løkke Rasmussenip (M), Marco Rubiop Amerikamilu præsidentip tullersortaata J.D. Vancep Washingtonimi ataatsimeereernerisa kingorna pivoq.
Múte B. Egede (IA) taassuma kingorna, nunanut allanut naalakkersuisunngorpoq.
Isumaqatigiissut qaammatini arfineq pingasuni isumaqatigiinniarnermit aallaaveqarpoq.
Nunarput, Danmark USA-lu 1951-imiit illersornissamut isumaqatigiissuteqareerput, taannalu USA-p nunatsinni sakkutooqarnissaanik qulakkeerinnittuuvoq.
