Aki-Matilda Høegh-Damip kalaallisut oqalugiarnini nersorneqaatigaa
Kalaallip folketingimut ilaasortap, Siumumeersup, Aki-Matilda Høegh-Damip folketingip ataatsimiittarfiani naalagaaffeqatigiinneq pillugu oqallinnermi kalaallisut oqaatsigut atorlugit upernaaq oqalugiarnini pissutigalugu danskit ukiup ingerlanerani malunnaateqarluartumik oqalugiartunut nersorinnissutigisartagaannik nersorniarneqarpoq.
Suliffeqarfik Danske Taler, nammineq pigisoq tusagassiuutinut nalunaarummi allappoq.
Nersorinninnissamut aalajangiisartut oqalugiarnerup malunnaateqarnera ilaatigut tunngavilersuutigaat, oqalugiarnerummi kingunerisaanik Folketingip ataatsimiittarfianit kalaallisut savalimmiormiusullu oqalunnissamut periarfissaqarnerulerpoq.
- Årets Danske Talerip soqutiginnilluarneranut pissutaavoq Aki-Matilda Høegh-Damip oqaaserisai tusarnaartunut, naak paasisaqanngikkaluartunut sunniuteqarluarmata. Folketingimimi ilaasortat ilaat paasisaqanngilluinnaraluarlutik narrujuummipput, oqalugiaasiortartoq, atuakkiortorlu Anita Furu aalajangiisartunit nalunaarummi allappoq.
Tupaallatsitsissutaannaanngitsoq
Oqalugiarneq oqallinnerujussuarmik pilersitsivoq, tusarnaartummi arlallit Siumumit politikerip qanoq oqaaseqarnera paasinngilaat, oqaluttarfillu minutsit quliinnaat qaangiuttut qimaqqippaa.
Aki-Matildap nunatsinni innuttaasut danskisut paasisinnaanngitsut, oqallinnermullu imminnut tunngassuteqartumut malinnaasinnaanngitsut tamannalu allanngortikkusullugu oqalugiarnermini tunngavilersuutigaa.
Tamatuma kingorna Folketingimi oqalutseqartalernissaq pillugu apeqqut oqaluuserineqarpoq.
Inatsisartuni ataatsimiittoqartarneratulli toqqaannartumik nutserisoqartalissanngitsoq nunaniilli avannarlernit qinikkat Folketingimi oqaaseqartarfimmit oqaaseqarnissaminnut piffissaqarnerulersinneqassasut, taamaalillutillu namminneq ilitsoqqussaralugu oqaatsitik atorlugit oqalugiareerunik nammineerlutik danskisuunngortitsisinnaalissasut aalajangerneqarpoq.
Aki-Matilda Høegh-Dam Danske Talerip aalajangiiniartitaanit 'iluatsilluartumik tupaallatsitsisutut' nersualaarneqarpoq.
- Oqaatsit sunniuteqarluartut taalliortarnermit ilisarnaateqartut atorneqarput, tamanna pissutigalugu Joe Bidenip præsidentitut ivertinneqarneranut atatillugu Amanda Gormansip taalliaa "The Hill We Climb" eqqarsaatilerpara, Anita Furu oqarpoq.
Mette Frederiksenimut Godhavnsdrengenut utoqqatsissuteqarnermi oqalugiarneranut atatillugu 2019-imi nersorniarneqarnikuuvoq.
