Aki-Matilda Høegh-Dam Siumup siuttuinut ulluni kingullerni isornartorsiuisarput, ilaatigut nunatta naalagaaffinngornissaanut nangaanertut isigisaminik isornartorsiuisarluni.

Taanna partiimut ilaasortaajunnaarluni mailikkut maanna allappoq.

- Tamanna oqittuinnaanngimmat sapaatip akunnerata naanerata tungaanut eqqissisimaarfigilaassavara, taanna allappoq.

Taassuma partiimut allamut nuussanerluni oqaatiginngilaa.

KNR-ip oqaaseqartinniarsarigaluarpaa, tamannali periafissaanngilaq.

Mailikkulli eqqissisimatinneqarnissani qinnutigaa.

"Matumuuna partii Siumut ilaasortaajunnaarfigalugu pisortatigoortumik partiimut siulittaasumullu nalunaarutigeqqammerlugu ilissinnut ilisimatitsivunga. Tamanna oqittuinnaanngimmat sap. ak. naanerata tungaanut eqqissisimaarfigilaassavara.

Eqqarsaaterpassuit imaannanngitsut nalaakkakkit neriuppunga tamanna paasinniffeqarfigalugu piffissamik pisariaqartitinera ataqqineqassaspq, kingornali tutsaqarfissanngorumaarpunga apeqqutisilu akisinnaalerumaarpakka."

KNR-ip Kuno Fencker aamma attaveqarfigaa, taassuma Aki-Matilda Høegh-Dam partiimit tunuartoq malinniarnerlugu suli ilisimanagu paasissutissiissutigaa.

- Siumumi siunissara sapaatip akunnerata naanerani eqqarsaateqarfigissavara, taanna KNR-imut oqarpoq.

Kuno Fencker aamma Aki-Matilda Høegh-Dam partiimut allamut nuunnissaminnik sapaatip akunnerani matumani ammasumik eqqartuipput.

Qinersinissarmi marlunngormat suaarutigineqarpoq. Aqaguanili Siumumi aamaartut pititsisumit, Kuno Fenckerimit supoorneqarlutik ikummartinneqarput. Taassumami partiimit tunuarnissamut isummani oqaatigaa.

Taassumami naalagaaffinngornissamut suliaqarneq sukkatsisinniarpaa, taassumalu Siumut tassunga tunngatillugu arriippallaarsimasoraa.

- Piumassuseqartoqanngilaq Siumup iluani. Aap immaqa ikinnerussuteqarpugut naalagaaffinngorusuttut, kisianni inuit nukittuut aamma siulersuisuniittut naalakkersuisuniittullu uanga malugilluinnarpakka naalagaaffinngornissamut piumassuseqanngitsut, aamma kinguarsaasut, Kuno Fencker KNR-imut pingasunngornermi oqarpoq.

Erik Jensen akissutitut nalunaaruteqartoq

Taassuma parteeqataa Aki-Matilda Høegh-Dam aamma akuliuppoq. Taassuma naalagaaffinngornissamut apeqqut pissutigalugu qineqqusaarnissani isumaliutigalugu DR-imut oqaatigaa – taassumalu partiimik allamik tunualiaqutaqarsinnaanini itigartitsissutiginianngilaa.

Siumumilu pisoqalinnguatsiarpoq. Partiimmi siulittaasuata, Erik Jensenip naalagaaffinngornissamut suliaqarneq aamma sukkatsisinniarpaa, taassumalu Namminersorneq pillugu inatsimmi paragraf 21-p aallartinnissaa qineqqusaarutiginiarpaa. Paragraf taanna naalagaaffinngornissamut aqqummik nassuiaaneruvoq, taannalu naapertorlugu innuttaasunut taasititsisoqassaaq. Ukiullu sisamat tulliuttut ingerlaneranni innuttaasunut taasititsisoqassasoq, Erik Jensen DR-imut tassanngaannartumik ippassaq oqarpoq:

- Qinigaaffiup tulliani taamaaliortoqarnissaa naatsorsuutigaara. Kisianni tamanna paasissutissiissuteqarnermik tunngaveqassaaq, innuttaasut taamaalillutik kingunissat qularutigissanagit. Inuiaqatigiit atugarissaartuarnissaannik tunngaveqarpugut, tamanna ingerlassaaq. Aningaasaqarnikkut aamma isiginiagassaqarpugut, taanna oqarpoq.

Taanna – Inatsisartuni partiit amerlanerit allat assigalugit – naalagaaffinngornissamut ulluliinissamut tuaviuussisuunngikkaluarpoq.

Folketingimut qinersinermi taaguunneqarnerpaaq

Aki-Matilda Høegh-Dam Folketingimut 2022-mi qinigaaqqippoq. Taanna 6.655-init taagunneqarpoq, nunatsinnilu qinersisut pingajorarterutaallutik.

Tamanna 2019-imi qinersisoqarneranit taaguunneqarneranit marloriaatingajaannik siuariarneruvoq.

Kuno Fencker Inatsisartunut kingullermik qinersisoqarmat 66-init taaguunneqarpoq, taannalu Inatsisartuni sinniisussatut ilaasortaalluni.