Erik Jensen: Naalagaaffinngornissaq pillugu qinersereernermi isumaqatigiinniartoqassaaq

Kalaallit Nunaata naalagaaffinngornissaanut sulineq sukkanerusariaqalerpoq. Siumut taama maanna isummerpoq.

Taakkuami Naalakkersuisut danskit naalakkersuisuinut naalagaaffinngornissaq pillugu isumaqatigiinniassasut qinersinissap marlunngornermi suaarutigineqarnissaa sioqqullugu suliaqaraluarput.

- Qaqitsiniarluta piareersarpugut. Oqaluuserisassanngortitassarput piariiliivittoq qinersinissaq suaarutigineqarpoq. Taannaana aporfiusoq, Erik Jensen KNR-imut oqarpoq.

Fencker allallu qanillattorneqartut

Tassalu Siumumut ilaasortat arlallit, soorlu Kuno Fenckerip, qinersinissamik nalunaaruteqarneq sioqqullugu kissaatigisaat, Siumup qinersereernermi suliarinialerpaa.

- Qinersinerup malitsigisaanik aamma ingerlateqqinneqarnissaa, pinartutullu isigalugu qaqinneqarnissaa qularutigineqassanngilaq, Erik Jensen oqarpoq.

Kuno Fenckerip taama kissaateqarnera partiimi Siumumi siornatigut orningineqanngilaq. Siumumummi aqutsisut qaffasinnerusortaasa Inatsisartut, aamma Kuno Fenckerip, siorna akuerisaat, tassa isumalioqatigiissitaq ukiuni marlunni sulisussaq naammassitseqqaarusunnikuuaat. Tassani naalagaaffinngornermi nunap aningaasaqarnissaa ilaatigut qulaajarneqartussaavoq.

Siumumili aqutsisut Kuno Fenckerip kissaataanut maanna qanillattulersaarput. Inuilli ataasiakkaat tamanna suliarissanngikkaat siulittaasoq erseqqissaavoq.

- Inuit ataasiakkaat pillugit isummersortarnerit, oqariartuuteqartarnerit, initunerulertinnagit anguniakkattali politikkittalu ersarissartuarnissaat taanna uanga siulittaasutut sammerusunnerpaarpaajuara.

Taamaakkaluartoq:

- Inatsisartutigoortumik akuersissutigineqarpoq kommissionimik ingerlatsilluni suliaqartoqassasoq, taassuma saniatigut aamma immikkut isumaqatigiinniarnernik pilersitsisoqarsinnaanissaa mattusimaneqanngilaq, Erik Jensen oqarpoq.

Siulittaasoq: Suliat marluk suliarineqarsinnaapput

Suliat marluk, tassa danskit naalakkersuisuinut nunatta naalakkersuisuisa isumaqatigiinniarnerat isumalioqatigiissitallu, aningaasalerneqareersup, sulinera, imminnut akornusissannginnersut pillugu apeqqummi Erik Jensen ima akivoq:

- Akornusiinavianngilaq. Pissutigalugu isumaqatigiinniarnerit aallartippata aamma ulloqanngilaq qaqugu naammassineqassanersut.

Ulluleerusunngilaq

Tassalu Siumumut siulittaasup nunatsinni naalakkersuisuulerumaartussat danskit naalakkersuisuinut isumaqatigiinniarnerat qanoq sivisutigissanersoq akisinnaanngilaa. Kalaallit Nunaata qaqugu naalagaaffinngussanera ullulerlugu aamma oqaatigisinnaanngilaa.

- Immeraassutissaanngilaq una qulequtaq, kisianni paaseqatigiiffissaavoq. Ataatsimoorussassaavoq, Erik Jensen oqarpoq.