Kuno Fencker Siumumut ilaasortaajunnaassanerluni eqqarsartoq

Siumumut ilaasortaq Kuno Fencker partiiminut Siumumut ilaasortaaginnassanerluni maanna apeqqusiivoq.

- Politikkimit immaqa anisariaqassuunga immaqaluunniit Siumumit aningallartariaqassuunga immaqaluuniit assigiinngitsunik nalilersuisariaqassuunga qanoq iliuuseqarnissannut, Kuno Fencker KNR oqarpoq.

Kuno Fenckerip Siumukkormiuuginnassanerluni nalornilernini namminersorneq pillugu inatsimmi paragraf 21-ip tassa, naalagaaffinngornissamut isumaqatigiinniarnerup naalakkersuisunit danskit naalakkersuisuinut maannakkoqqissaaq aallartikkumaneqannginnera tunngavilersuutigaa.

- Piumassuseqartoqanngilaq Siumup iluani. Aap immaqa ikinnerussuteqarpugut naalagaaffinngorusuttut, kisianni inuit nukittuut aamma siulersuisuniittut naalakkersuisuniittullu uanga malugilluinnarpakka naalagaaffinngornissamut piumassuseqanngitsut, aamma kinguarsaasut, Kuno Fencker oqarpoq.

Taassuma taama oqarnermini partiimut ilaasortat iluminni ataatsimeeqatigiittarneranni oqaatigineqartut innersuussutigai:

- Ataatsimiinnerni nalileqqissaarsinnaavakka qanoq oqaaseqartoqarnersoq, Kuno Fencker oqarpoq.

Isumaqatigineqarneq ajortut

Kuno Fenckerilli oqarnera naapertorlugu Siumukkormiut tamarmik, siulersuisuunerniittutut naalakkersuisunullu ilaasortatut, namminiilivinnissamut akerliunngillat. Taakkuali naalagaaffinngornissamut paragraf 21-llu maannakkorpiaq atuutilernissaanut kissaateqartut, partiimi inunnit qaffasissumik inissisimasunit, tassa Erik Jensenimit Vivian Motzfeldtimillu isumaqatigineqarneq ajorput.

- Soorunalimi parteeqatikka allat oqaluuttarpakka, ilaat piumassusilerujussuupput. Kisianni aamma oqarluaannassaguma ajorsartitaasarpugut taanna suliassaq eqqartulersillugu, Kuno Fencker oqarpoq.

Siumut naalagaaffinngornissaq naalakkersuisullu avammut attaveqartartuunissaat pillugu ataatsimuulersoq, partiip siulittaasua, KNR-imut marlunngornermi oqarpoq.

- Piffissami sivitsortumi oqaluullutalu ataatsimeeqattaarpugut, tamaaviisa aaqqitassagut eqqartorlutigit. Aammalu taakkua tunngavigalugit ingerlaqqinnerput matumuuna nalunaarutigivarput, Erik Jensen oqarpoq.

Taamali oqarneq eqqortuunngitsoq, Kuno Fencker KNR-mut maanna oqarpoq.

- Ataatsimoortoqarnera uanga takusinnaanngilara uani, taanna oqarpoq.

KNR-ip Siumup siulittaasua, Erik Jensen, oqaaseqartinniarsaraa.

Vivian Motzfeldt KNR-imut ima oqarpoq:

- Aqqutissaq ilusilersorneqartoq Kuno Fenckerip aamma peqataaffigaa. Inatsisartunilu akuersinermigut aamma naqissuseeqataaffiginikuullugu.

- Uanga inuit ataasiakkaat qanoq oqariartorsimanerat aallaavigalugu uani nalilersuerusunngilanga.

Din mening er vigtig for os. Vi modtager gerne ris eller ros om denne artikel.