Kuno Fencker Siumumiiginnassasoq
Erik Jensenip aamma Jørgen Wæverip oqaaseqarneranik ilallugu nalunaaqutaq 15.30 nutarterneqarpoq.
Kuno Fencker Siumumiiginnassaaq.
Partii tusagasiuutinut nalunaarummi allappoq.
- Ulluni kingullerni Siumut tusagassiorfitigut sammineqarnera Siumup Siulersuisuunerisa arajutsisimanngilaat, partiip siulittaasua, Erik Jensen tusagassiuutinut nalunaarummi oqarpoq.
- Taamaakkaluartoq Siumup malittarisassai naapertorlugit Siumup Nuup isummeqqusissutaanut Siulersuisuunerit isummerfissaqanngillat.
Nunatsinni politikkikkut suliaqartuni sapaatip akunnerani kingullermi immaqa eqqartorneqarnerpaamut tunngatillugu taama akissuteqartoqarpoq. Fencker Siumup Nuummi immikkoortortaqarfiani ilaasortaavoq, immikkoortortaqarfiullu siulittaasuata, Jørgen Wæver Johansenip taassuma partiimit ilaasortaajunnaarsinneqarnissaa kaammattuutigaa.
Taanna KNR-imut ima oqarpoq:
- Siumup Inatsisartuni ingerlatsinera imaluunniit Siumup Naalakkersuisuni ingerlatseqataanera isumaqatigiunnaarsimagaanni, taanna soorunami kialluunniit kiffaanngissuseqarfigivaa taamatut isumaqarfigissallugu. Kisianni taava nammineq inersimasutut aamma alloriartariaqarpoq, isumaqatiginerusat ornillugit, Jørgen Wæver Johansen KNR-mut oqarpoq.
Nangipporlu:
- Allatut isumaqarneq tassaavoq siunnerfigineqartunik isumaqatigiissuteqarfigineqarsimasunik ataqqinnigani pissusilersorneq. Tamannalu matumani pisoq, uteqqiattumik pisoq, tamatta takusinnaavarput, taanna oqarpoq.
USA-mut angalaneq oqallisaangaatsiartoq
Taassuma Kuno Fenckerip USA-mut angalanera, ilaatigut Repræsentanternes Husimi republikanerit ilaasortaannik, Andy Oglesimik nunatta USA-llu siunissami suleqatigiinnissaq qanoq takorloorneraat pillugu oqatiginniffigisaa oqallisaangaatsiartoq toqqaannartumik innersuussutigaa.
Partiip siulittaasuata, Erik Jensenip Kuno Fenckerip angalanera "namminerisamik" angalanerigaa oqaatigaa.
- Inuttaata nammineerluni akisussaaffigaa taanna angalanini. Taamaattumik Siumuminngaanniit pisinnaatitsissummik tunniussaqarsimannginnerput taanna erseqqissaatigissuara, Erik Jensen oqarpoq.
Fencker ilaasortaajunnaarnissaanik kaammattoraa
Kuno Fencker Siumumi kisimi ilaasortaanngilaq. Taanna Inatsisartuni sinniisussatut aamma ilaasortaallunilu Nunanut allanut Sillimaniarnermullu ataatsimiititaliami ilaasortaavoq. Tamanna pillugu oqallittoqangaatsiarpoq - Fenckerillu USA-mut angalanera inuit ilaannit nunamut ajoqusiiniarnertut taaneqarpoq - allanillu nersualaarneqarluni.
Siumup Nuummi immikkoortortaqarfiani siulittaasup, Jørgen Wæver Johansenip nersualaanngilaa. Siulittaasorli “Kuno Fenckerip anisinneqarnissaanut” alloriartuuniarnani sapaatip akunnerata siuliani oqarpoq. Taassumali Kuno Fencker partiimit nammineq ilaasortaajunnaarnissaanik kaammattuuteqarfigiinnarpaa.
Siumumit tusagassiuutinut nalunaarummi Erik Jensenip Siumumi ilaasortaajunnaarsitsinissamut periarfissat marluunerarpai:
- Periarfissat siulleraat ilaasortaajunnaarsitsinissamik aalajangerneq immikkoortortaqarfinniit tunngavilersukkamik allakkatigut aallartinneqarluni aalajangerneqarsimassasoq, periarfissallu aappaat tassaavoq Inatsisartut gruppeanni akunnerminni peersitsinissaminnik aalajangiussaqarsimasussaammata.
- Taakku arlaannaalluunniit pisimanngillat, taamaammallu Siulersuisuunerit imaluunniit Inatsisartut gruppe pineqartumut isummerfissaqanngillat, malittarisassat tunngavigalugit sulineq ingerlattussaammat.
KNR-ip Jørgen Wæver Johansen ullumi oqaloqatigeqqippaa. Taannalu sisamanngormamit oqinnerusumik isumaqarpoq.
- Suliamut atatillugu ingerlaqqinnissamut tunngavissaqartinngilara, immikkoortortaqarfimmi siulittaasoq oqarpoq.
Erik Jensen KNR-imut ima oqarpoq:
- Taamatut paaseqatigiittoqarsimanera toqqissiallaatigaarput. Taamaammallu aamma uanga pissutissaqanngilanga tusaatissatut tingusinnginnisannut.
