Siumut Nuuk kaammattuisoq: Kuno Fencker ilaasortaajunnaarit
Naalakkersuisut siulittaasuat, Múte Bourup Egede, Naalakkersuisut nunanut allanut politikkikkut attaveqarnermi attaveqartartuussasut, tusagassiortunut januaarip 21-anni sassaramik oqarpoq.
Inatsisartunut Siumumit ilaasortap, Kuno Fenckerip, naalakkersuisooqatimi nunanut allanut tunngasunut politikkeralugu suleriaaserisaat tunuliaqutsinngilaa.
- Arlaannik inatsimmik siunnersuuteqartoqanngippat uanga taaseqataasinnaaninnillu periarfissinneqarlunga, tassani inissisimanngilanga, Kuno Fencker KNR-mut oqarpoq.
Ilaasortaajunnaarnissamik kaammattuineq
Kuno Fencker Siumup Nuummi immikkoortortaqarfianut ilaasortaavoq. Tamanna immikkoortortaqarfiup siulittaasuata, Jørgen Wæver Johansenip, KNR-mut uppernarsarpaa.
Taassumalu Kuno Fencker Siumumut ilaasortaajunnaarnissaanik kaammattorpaa.
- Siumup Inatsisartuni ingerlatsinera imaluunniit Siumup Naalakkersuisuni ingerlatseqataanera isumaqatigiunnaarsimagaanni, taanna soorunami kialluunniit kiffaanngissuseqarfigivaa taamatut isumaqarfigissallugu. Kisianni taava nammineq inersimasutut aamma alloriartariaqarpoq, isumaqatiginerusat ornillugit, Jørgen Wæver Johansen KNR-mut oqarpoq.
Nangipporlu:
- Allatut isumaqarneq tassaavoq siunnerfigineqartunik isumaqatigiissuteqarfigineqarsimasunik ataqqinnigani pissusilersorneq. Tamannalu matumani pisoq, uteqqiattumik pisoq, tamatta takusinnaavarput, taanna oqarpoq.
Siulersuisuunerit naliliisariaqartut
Siumup malittartisassai naapertorlugit partiip immikkoortortaqarfiisa ilaasortaminnik ilaasortaajunnaarsitsinissaat imaaliallaannagassaanngilaq. Inatsisartunulli Siumup gruppiata gruppimi ilaasortaaqatiminnik, siulersuisuunerit akuersissuteqarneratigut ilaasortaajunnaarsitsisinnaapput.
Jørgen Wæver Johansenip Kuno Fenckerimut ilaasortaajunnaaqqusilluni kaammattuutini nammineq iliuuseqarfiginianngilaa.
Kuno Fenckerillu Siumumut ilaasortaaginnarnissaa tulluartuunersoq, Siumumit Inatsisartunut ilaasortanut, siulersuisuunernullu naliliiffigeqquaa.
- Taannalu tassa isumaga naapertorlugu Siumup Inatsisartuni gruppiata naliliiffigisariaqarpaa, siulersuisuunerit paaseqatigalugit.
- Inuit maani nunatsinni pisinnaatitaaffeqarput allatut isumaqalersimagunik aamma allamut saqinissaminnut. Aamma pinngitsaaliissutaanngilaq Siumumut ilaasortaanissaq allatut isumaqalersimagaanni.
KNR-ip Siumumut akisussaanerpaaq, siulittaasoq, Erik Jensen, pisoq pillugu apersorumallugu attaveqarfigisaraluarpaa. Taannali saaffiginnissutinut qisuarianngilaq.
