Kuno Fenckerip Aaja Chemnitz unnerluutigigaa
Siumumi ilaasortap, Kuno Fenckerip Trumpimut qanittumik attaveqaateqartumik naapeqateqarniarluni USA-mut angalanerata kingorna ullui pisoqarfiungaatsiarput. Taassuma angalanera nersualaarutigineqarlunilu isornartorsiorneqarpoq.
Pisullu pillugit maanna pisoqaqqippoq.
Kuno Fenckerimmi folketingimut ilaasortaq, IA-meersoq, Aaja Chemnitz nikanarsaasutut politiinut unnerluutigaa. Taassuma tamanna DR-imut oqaatigaa:
- Aaja Chemnitzip taama ilungersunartigisumik nikanarsaasumillu, pingaartumik nunamut ajoqusiisinnaasumik iliuuseqarneraanera pissutigalugu politiinut unnerluutigaara, Kuno Fencker oqarpoq.
KNR-ip Kalaallit Nunaanni Politiinit imaluunniit Kuno Fenckerimit tamanna uppernarsartissinnaanngilaa.
Nunamut ajoqusiisinnaasumik iliuuseqarneq
Oqaaseqaatigineqartut Kuno Fenckerip nikanarsaanertut isigisai taassuma USA-mut angalaneranut atatillugu oqaatigineqarput.
Taassumami USA-mut angalanerata kingorna Aaja Chemnitzip danskit tusagassiorfiannit TV2-mit apersorneqarnermini Fenckerip Trumpimut iluareqqusaarnera ima oqaaseqarfigaa:
- Nunamut ajoqusiiniarluni iliuuseqarnerusoq oqaatigisinnaavara, taanna oqarpoq.
Oqaaseqaalli tamanna Kuno Fenckerip anniarerpasippaa.
KNR-ip tamanna Kuno Fenckerimit uppernarsartissinnaasimanngilaa.
Unnerluutiginninnissaq pisariaqanngitsoq
Aaja Chemnitzili Kuno Fenckerimit politiinut unnerluutigineqarsimalluni KNR-imut oqarpoq:
- Kuno Fenckerimit politiinut unnerluutigineqarsimallunga paasivara. Tamanna tamat oqallissinnaanerannut uggornartuusoraara. Tamatta qinigaavugut, isummatsinnillu oqaaseqarsinnaasariaqarpugut.
Taassuma unnerluutiginninneq KNR-imut tusagassiorfinnulluunniit allanut oqaaseqarfiginngilaa, taassumali oqallinnerminnut siumumeersup politiinik akuliutsitsisariaqarsorinera uggornartuusoraa:
- Taanna politiinut suliassaqangaatsiareersunut pisariaqanngitsumik suliaqartitsineruvoq. Qinikkat isummaminnik oqaaseqarnissamut immikkut pisussaaffeqarput, Aaja Chemnitz mailimi allakkamini naggasiivoq.
KNR-ip Kalaallit Nunaanni Politiit aamma attaveqarfigai, taakkuli Kuno Fenckerimit unnerluutiginninnermik tigusaqarsimanerlutik uppernarsarusunngilaat.
