Illuatungiliuttut paatsuungasut Trumpip nuannareqqusaarneranut atatillugu Kuno Fencker isornartorsioraat

Naalakkersuisut siulittaasuata Múte B. Egedep nunatta USA-llu akornanni attaveqaqatigiinnerit tamarmik ”pisortatigoortumik taamaallaat pissasoq” sapaatip akunnerata siuliani tusagassiortunik katersortitsinermi oqaatigaa.

Piffissamilu taamaalisukkut taassuma suleqataa Washingtonimiippoq. Tassa Inatsisartut Sillimaniarnermut Nunanullu Allanut ataatsimiititaliaanni ilaasortaq, Siumumeersoq, Kuno Fencker. Katersortitsinermit akunnialuit qaangiuttut taassuma Kongressimi ilaasortaq Donald Trumpip parteeqatigisaa naapippaa.

Tassanilu nunatta USA-llu akornanni atassuteqaat qanoq pitsanngorsarneqassanersoq oqaluuseraa. Taassumalu Nuuk siunissami Nuuk Yorkimik taaguuteqalersinnaasoq ilaatigut oqaatigaa.

Kuno Fenckerip partiiani siulittaasup, Erik Jensenip oqarnera naapertorlugu partiimi siulittaasut paasitinneqarsimanngillat.

Kuno Fenckerip ataatsimeeqatigisaa tassaavoq Andy Ogles, taanna Kongressimi USA-p nunatsinnik pisinissaanut inatsisissatut siunnersuusiorpoq. Taannalu nunatta pisiarinissaanut ”akimik” aalajangiisimavoq. USA nunatsinnik pisiniarluni Danmarkimut 10 billioninik akiliissasoq taanna isumaqarpoq. 10 billionit danskit koruuninngorlugit 10 tusind milliardit koruuniupput. Ataatsimiinnerat toqqaannartumik aallakaatinneqarpoq.

Demokraatit siulittaasuat, Jens-Frederik Nielsen maanna qisuariaateqarpoq, taassumalu angalaneq arajutsisassaanngitsoq oqaatigaa.

- Allarpassuit assigalugit eqqumiigivara maannakkut iliuuserineqartoq. Uanga inatsisartunut qinikkatut oqarnavianngilanga inuinnartut allanik oqaluussiartorlunga, taanna KNR-ip aallakaatittagaani ”Illeq”-mi sisamanngormat oqarpoq.

Andy Oglesimillu naapeqateqarnera aamma isornartorsiorpaa.

- Oqarneq ajorami (Kuno Fencker aaqq.) uanga isumaqarpunga. Oqaluttarpoq nunarput isumaqarpoq. Tamakkua sissuigassat eqqumaffigineqartariaqaramik. Isumaqarpunga nunap avataanut isumaqatigiinniarnertut aallaaveqarsinnaasut imaluunniit isikkoqarsinnaasut taakkua naalakkersuinikkut ingerlasariaqartut, Jens-Frederik Nielsen oqarpoq.

Naleqqunnanilu paatsuunganartoq

Taassuma parteeqataa, Anna Wangenheim aamma naammagisimaarinninngilaq.

- Inatsisartunut ilaasortap nunarput sinnerlugulusooq USA-mut oqariartuuteqarnera paatsuuganartikkakku, taanna oqarpoq.

Taamaammat Naalakkersuisooqatigiit nunanik allanik qanorpiaq suleqateqarusunnersut tigussaasumik paaserusuppaa:

- Soorunami ernumatitsilerpoq. Pissutigalugu naalakkersuisutta sammivik sorleq atorniarneraat suli ulloq manna tikillugu ersareqqissaannginnami, Anna Wangenheim oqarpoq nangillunilu:

- Qallunaat Nunaannut qanoruna suleqatiginninniartugut? USA-mullu qanoruna suleqatiginninniartugut?

Taassuma Kuno Fenckerip illersornissamut nunanullu allanut tunngasunik kisimiilluni taama pissusilersornera tulluartuusorinngilaa:

- Kiffaanngissuseqarsinnaavugut qinikkatut kikkunnilluunniit oqaloqateqarsinnaanissamut. Taamaattorli una, nunatta siunissaanut taama annertutigisumik pingaaruteqartigisumillu qulequtaq imaqartoq taamatut imminissarsiorluni iliuuseqarneq isumaqarpunga inissaminiinngitsoq.

Maligassiuerpalaartumik akisussaaffeqassasoq

Atassutip siulittaasuata, Aqqalu Jerimiassenip tamanna killissamik qaangiinertut nalilerpaa, taassuma Inatsisartunut qinikkap nammineq inuttut qanoq pissusilersuuteqarsinnaaneranut killeqartariaqarsoraa.

- Mianerisassaqarpugut inersimasutut pissuseqassagutta maligassiuerpalaarluta inoqatitsinnut, Aqqalu Jerimiassen oqarpoq.

Kuno Fenckerip nammineq oqarnera naapertorlugu USA-miinnermini inunnik 300-t missaannik oqaloqateqarpoq. Taassumalu angalanini nammineq inuttut angalanerusoq arlaleriarluni oqaatigaa.

Siumup siulittaasuata, illua-tungiliuttut ilaasa, taama isorinninnerat, tigussaasumik akinngilaa. Inersimasulli akisussaassuseqartut mianerisassallu ilisimaarigaat naatsorsuutiginerarpaa. Kuno Fenckerillu kisimiilluni iliuusai pillugit ima naatsumik oqarpoq:

- Inuttut nammineq angalanini akilersimappagu uagut taanna akuleruffigalugulu iliuuseqarfiginissaa killilerujorujorujussuuvoq.



KNR Kuno Fenckerip apersorneqarneranit ullumi kingusinnerusukkut ilanngutassiaqarumaarpoq.