Trumpip nunatsinniittuutaa
Thomas Emanuel Dans imaluunniit Tom Dans nunatsinni eqqaamajuminarneruvoq.
Taanna tamanut ammasumik ilisimaneqanngilaq, kisianni kalaallit atorfillit politikerillu akornanni ilisarisimaneqarluarluni. Taassuma Inatsisartuni ilaasortat ikinnerpaamik ataaseq ataatsimeeqatigimmagu ullualuinnaat qaangiupput.
Taassumali Donald Trump Jr.-ip nunatsinnukarnissaanut qitiusimanissaanut takussutissaqarluarpoq.
KNR-ip DR suleqatigalugu Tom Dans qanoq ililluni Jørgen Boassenimut attassuteqaleqqaartuusimanersoq aamma Trumpimut kalaallillu politikeriinut qanoq atassuserneqarsinnaanersoq paasiniarpaat.
Tassungali tikitsinnata kingumut uteqqilaassaagut.
2019 – Trumpip nunarput pisiniariniarpaa
Donald Trumpip præsidentitut atuunnerata affaata missaaniippoq (2017-2021) tassanilu siullerpaamik nunatsinni pisinissamik soqutiginnilluni saqqummiusseqqaarpoq.
Isumassarsiaq taanna taamani naalakkersuisut siulittaasuannit, Kim Kielsenimit (S) itigartitsissutigineqapallappoq. Taannalu ministeriunermit Mette Frederiksenimit Nuummut tikeraartumit taperserneqarpoq, taassumalu Trumpip isumassarsiaa ”isumaqanngilluinnartutut” taanikuuaa.
Tom Dansili maanna saqqummerpoq.
Trumpip itigartinneqarnerata kingorna Dans United States Arctic Research Commissionimi (USARC) issittumi kommissæritut toqqarneqarpoq, tassannga amerikami naalakkersuisut Issittumut tunngatillugu siunnersortartussaavai.
Dansip nunatsinnik ukkatarinninneq nunatsinnilu attaveqaatinik ineriartortitsineq ”pingaarnertut” akisussaaffigai.
Sulinerali sivikitsuinnaavoq, Trumpimi qinigaaqqinngilaq. Joe Bidenilu 2021-mi præsidentitut qinerneqarpoq.
2024 – Boassenip Dansillu akornanni attaveqalerneq
Jørgen Boassenip Washington DC-mi pisortaq, Kenneth Høegh nalaatsornerinnakkut naapippaa.
Jørgen Boassenip tamanna KNR-imut ima nassuiaatigaa:
- Kenneth Høegh neriniartarfimmi naapippara oqaloqatigiilerpugullu. Taassuma tujuuluarara takullugu torragaa. Carla Sandsilu (USA-p Danmarkimi taamani aallartitarisaa) sapaatip akunnerata tulliani naapittussaagamiuk assiliseqatiginiarpaanga.
- Høegh qinersinerup unnuani (USA-mi aaqq.) peqataarusuttunga Sandsimut oqaqquara, Jørgen Boassen oqarpoq.
Jørgen Boassenip mailianut qaammatialuit qaangiuttut takkuttoqarpoq.
Jørgen Boassen oqaluttuarpoq:
- Kennethimit atinik normunillu attavigiinnarsinnaasannik imaqartumik e-mailimik pissarsivunga. Tom Dans atit ilaanniippoq.
Jørgen Boassenip oqarnera naapertorlugu Kenneth Høegh Tom Dansimut attaveqalersitsisuuvoq.
Kenneth Høeghilli tamanna aallaanerusumik KNR-imut mailikkut nassuiaatigaa.
”Oktobarimi ataatsimiinninni Trumpimut illersuisunik nunatsinniittoqarnersoq aperineqarlunga uppernarsarsinnaavara. Jørgen Boassen oqaluttuaraara Facebookikkullu quppernara takutillugu, tamatuma kingorna imminnut attavigiilerput”.
Dansip nunatsinni attavissani nassaaraa
Naak susoqarpiarsimanera isumaqatigiissutaanngikkaluartoq, erseqqippoq Nunatta Washington DC-mi aallartitaqarfia, Trumpimut tapersersuit marluk attaveqatigiilernerannut – Boassen aamma Dans, akuusimasoq.
Tom Dans siulliulluni attaveqarpoq.
Dans siusinnerusukkut arktisk kommissæritut, Biden-ip Det Hvide Hus-imut iserternerata nalaani, unikkalaluartoq, suli Nunatsinnut soqutiginnippoq sulilu Trumpip MAGA-mik ingerlatsineranut ilaalluni.
Tamanna nammineerluni erseqqissarpaa, oktoberip 22-anni Nunarput pillugu allaaserisaqarami, tassanilu tunngavilersorlugu sooq Nunarput free associationimik isumaqatigiissuteqarluni, USA-mut ilannguttariaqartoq.
Tom Dans-ip Jørgen Boassen USA-mut qaaqquaa, taamaalillunilu Jørgen Boassen-ip West Palm Beach-imi Florida-mi, qinersinermi nalliuttorsiornermut peqataanissaminik sinnattugaqarnera piviusunngortillugu. Nalliuttorsiornerup nalaani allaat Boassen Donald Trump Jr.-imut ilisaritinneqarpoq.
2025 – Trump Nuummut mippoq
Donald Trump USA-p 47-saanik præsidentissaatut qinigaavoq.
Kinguninngua Truth Social-imi nalunaarpoq USA-p isumannaatsuunissaanut ”Kalaallit Nunaat pigissallugu nakkutigissallugulu pingaaruteqarluinnartoq”.
Ukiortaami ullut siulliit ingerlaneranni tusarneqarpoq ernera Donald Trump Jr., Nuummut tikissasoq.
Jørgen Boassen inunnit Trump-imut qanittunnit attavigineqarpoq, 7.januar tikeraartoqarnissaanut piareersaasioqqullugu.
Nuup mittarfiani Trump Jr. oqarpoq Nuummilluni takornariatut, angunnili inuulluaqqusisoq.
Dansip politikeri nunatsinneersoq naapippaa
Januarip 11-anni alla USA-miit Nuummi mittarfitaamut tikippoq.
Ilaasoq tassaavoq Tom Dans. Trump Jr. assiginagu ullut arlallit illoqarfimmiippoq.
Tamaani naapippa ikinngutini Jørgen Boassen, aammali Kuno Fencker, Siumut sinnerlugu Inatsisartuni ilaasortaasoq.
DR-mit KNR-imillu apersorneqallatsiarnermini Kuno Fencker oqarpoq:
Uppernarsarsinnaviuk Tom Dans naapissimallugu?
- Assiutigaammi, taamaammat aap.
Tom Dans-ip naapissimanera qanoq oqaaseqarfigisinnaviuk?
- USA-miit niuernermik ingerlataqartunik oqaloqateqarsinnaaneq inerteqqutinngorami?
Tom Dans 2020-mi taamanikkut præsidentiusumit Trump-imit USA-p ”issittumi kommisæriatut” toqqarneqarpoq tusagassiorfinnilu Trump-imut suli qanittuusutut oqaatigineqarluni. Tamanna naapikkakku ilisimaviuk?
- Tamanna oqaaseqarfigissanngilara.
Kalaallit Nunaata siunissaa USA-mullu attaveqarnera naapikkassi eqqartorpisiuk?
- Kikkunnulluunniit Kalaallit Nunaata siunissaa eqqartortarpara.
Januarip 13-anni Tom Dans aamma Jørgen Boassen USA-mut aallarput.
DR-ip KNR-illu Tom Dans apersorpaat, tamannalu pillugu kingusinnerusukkut ilanngutassiaqarumaarluni.
