Aki-Mathilda Høegh-Dam kannguttaatsuliorsimaneq pillugu ilisimannittutut nassuiaateqaqqittoq

Timaanik oqimaassusaanillu oqaaseqarnermik aallartippoq. ’Oqimaalleqqilariaruni siniffimmi ilagalugu mamassasoq’, ’amaamaalu allisimasut’ taassuma oqaatigai.

Nutsani naamallugit assani nuluminukartissimagai, Siumut sinnerlugu Folketingimut ilaasortaq, Aki-Matilda Høegh-Dam partiip allatsigisimasaa, Mikael Petersen pillugu oqarpoq.

Mikael Petersenimut Nunatta Eqqartuussisuuneqarfiani suliaq nanginneqarmat taanna ilisimannittutut nassuiaateqaqqippoq.

Mikael Petersen arnanut sisamanut, matumani Aki-Matilda Høegh-Damimut, kannguttaatsuliorsimasutut unnerluutigineqarpoq.

Arnat taakku tamarmik Siumup Nuummi allaffianut 2013-imit 2019-imut attuumassuteqarput.

AAMMA ATUARUK Mikael Petersenip nunatta eqqartuussivianiinnera siulleq: Uannut peqatigiinniapiluttoqarpoq

Partiimi allattaasimasoq eqqartuussivimmit piumasaqaatitaqanngitsumik ulluni 60-ini pineqaatissinneqarsimasunut inissiisarfimmiittussanngortinneqarpoq. Taassuma eqqartuussut suliassanngorteqqippaa – tamannalu nunatta eqqartuussisuuneqarfiani ippassaq aallartinneqarpoq.

Mikael Petersen eqqartuussinermi pinngitsuunerarpoq – aamma eqqartuussiveqarfimmi pinngitsuunerarnikuuvoq.

Angut pissaaneqartoq

Taamaammat ilisimannittut apersorneqaqqipput – taamaammallu Aki-Mathilda Høegh-Dam eqqartuussivimmi ilisimannittutut aamma nassuiaateqaqqilluni.

Taanna Københavnimiimmat videokkut apersorneqarpoq. Taanna nassuiaateqaqqaalerami misigissutsinik takutitsinngeqqaaraluarpoq. Apersorneqarneratali ingerlanerani nipini qaffattarpaa ilaatigullu nipaa sajuttarluni.

Apersorneqarnermi ilaani qullipippoq, apersorneqarnerminili eqqissisimalluni.

Taassuma Mikael Petersen angutitut akerliligassaanngitsutut nassuiaatigaa. Akerliliigaannilu sanngiitsutut isikkoqassalluni. Aki-Matilda Høegh-Dam naapertorlugu tamanna tamanit ilisimaneqarpoq.

AAMMA ATUARUK Kannguttaatsuliorneq pillugu suliami arnat arfinillit ilisimannittuusut

- Angummik nuluisigut patissisoq takunikuunngilara, Aki-Matilda Høegh-Dam eqqartuussivimmi oqarpoq.

Paasinerluineq pineqarsinnaanersoq, Mikael Petersenip illersuisua, Jens Paulsen aperivoq.

- Eqitaarineq anertikkarnertalimmillu 10 sekundimik sivisussuseqartumik eqitaarineq assigiinngillat, Aki-Mathilda Høegh-Dam akivoq.

Kannguttaatsuliornerit pillugit allagaqartut

Taanna arnanut qulinut Mikael Petersenimit kannguttaatsuliorfigineqarsimanerarlutik februaarimi siorna allagaqartunut ilaavoq.

Suliaq eqqartuussivitsigoortinneqartussanngormat Mikael Petersen arnanit taamaallaat sisamanit kannguttaatsiliorsimasutut unnerluutigineqarpoq.

Suliaq politiinut unnerluutigineqarpoq, Mikael Petersenilu suliunnaartinneqarluni.

AAMMA ATUARUK Aki-Matilda: Eqqartuussivikkut piviusoq naqissuserneqarpoq

Taanna piffissaq sivikitsoq qaangiummat Naleqqami suliffittaarpoq – aamma partiimi allatsitut. Taannali atorfimminit novembarimi 2020-mi nammineerluni soraarpoq.

Suliarli nunatsinni kinguaassiutitigut innimiilliortoqartarneranik oqallisigineqarnerpaalerpoq – suliamillu politikkikkut partiini kinguaassiutitigut innimiilliornermut tunngasumik eqqartuussivimmi siullerpaamik aalajangiisoqarluni.

Annilaangasorujussuusoq

Aki-Mathilda Høegh-Damip oqarnera naapertorlugu Mikael Petersenitut pissaaneqartigisup akerlilernissaa ajornakusoortorujussuuvoq. Taassuma atorfinitsippaa pisortaralugulu. Arnanilu taama nalaataqarsimasuni kisimiinnani paasigamiuk kannguttaatsuliorfigineqarsimanerminik tamanut oqaatiginninnissamut aatsaat sapiissuseqalerluni.

Quilerratsassimalluni annilaangangaatsiarsimallunilu eqqartuussivimmi oqaatigaa. Taassuma oqarnera naapertorlugu maleruutiinnanngikkaanni peersitaasoqartussaavoq.

- Angutit inuusuttut arnat taama pineqartussaanerannik ilinniartinneqarput, Aki-Mathilda Høegh-Dam oqarpoq.

Tillutsissimaguit erngertumik politiinukarsimassagaluarpit?, Jens Paulsen aperivoq.

- Annersinneqaraanni politiinukarnissaq inuiaqatigiinni akuerineqartarpoq. Suliffimmili attuuaneqaraanni suliffik kissaatigisaq pineqarsinnaanersoq nalunarsisarpoq, Aki-Mathilda Høegh-Dam akivoq.

Taassuma oqarnera naapertorlugu Mikael Petersenip soraarnerata kingornatigut kinguaassiutinut tunngasumik imminut oqaluuteriaaseqarnerit unipput.

Eqqartuussivimmi suliaq aqagu nanginneqassaaq, eqqartuussivimmilu suliaq aqagu ualikkut inernilerneqassagunarluni.