Mikael Petersen ulluni 60-ini pineqaatissinneqarsimasunut inissiisarfimmiittussatut eqqartuunneqarpoq. Assi toqqorsivimmit.Assi: KNR / Malik Brøns

Aki-Matilda: Eqqartuussivikkut piviusoq naqissuserneqarpoq

Siumup allattaanerisimasaata kannguttaatsuliorsimasutut eqqartuunneqarnera piviusumik naqissusiinerusoq, Aki-Matilda Høegh-Dam oqarpoq.

Mikael Petersen, Siumumi Partii Naleqqamilu allattaanerusimasoq Eqqartuussissoqarfik Sermersuumi ippassaq sisamanngornermi eqqartuunneqarpoq.

Taanna pisimasunut sisamanut kannguttaatsuliorsimasutut eqqartuunneqarpoq.

AAMMA ATUARUK Partiimi allattaanerusimasoq pineqaatissinneqarsimasunut inissiisarfimmiittussanngortoq

Tassunga Siumut allaffiiani sulisimasut arnat sisamat unnerluussutaat eqqartuussiviup taamaalilluni ilumoortuunerarpai.

Unnerluussisunut ilaasoq, Aki-Matilda Høegh-Dam, eqqartuussinerup inernera iluarisimaarpaa.

- Eqqartuussivikkut piviusoq naqissuserneqarpoq, allamik tassunga oqaasissaqanngilanga, Aki-Matilda Høegh-Dam KNR-imut oqarpoq.

Mikael Petersen suliap aallartinneraniilli pinngitsuunerartarpoq.

Ilisimannittut 13-it 

Taanna eqqartuunneqareerami KNR-imut oqaaseqarumanngilaq. Eqqartuussulli illersuisunilu Jens Paulsen Nunatta Eqqartuussivianut suliareqqitassanngortippaat.

- Eqqartuussisup aalajangernerata tunngavia maanna misissussavarput, qanorlu pitsaanerusumik iliorsinnaanerluta tassani takussavarput, Jens Paulsen eqqartuussivimmi suliaq naammassimmat KNR-imut oqarpoq.

Suliaq ulluni pingasuni suliarineqarpoq, ilisimannittutullu nassuiaasut 13-iullutik, tamarmik Siumumut attuumassuteqarsimanngikkunik attuumassuteqartuusut.

Mikael Petersen ulluni 60-ini pineqaatissinneqarsimasunut inissiisarfimmiissaaq.

Taanna ukiuni 38-ini Siumumut attuumassuteqarsimavoq. Qinikkatut atuuffeqarnermini Naalakkersuisunut ilaasortaanikuullunilu Siumumi siulittaasup tulliatut atuuffeqarnikuuvoq.

Eqqartuussinermi aningaasartuutit Naalagaaffiup akilissavai.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat