Partiimi allattaanerusimasoq pineqaatissinneqarsimasunut inissiisarfimmiittussanngortoq

Mikael Petersen, Siumumi aamma Partii Naleqqami partiimi allattaanerusimasoq eqqartuussivimmi ullumi sisamanngornermi eqqartuunneqarpoq. Taanna pisuni sisamani kannguttaatsuliorsimasutut eqqartuunneqarpoq.

Mikael Petersen pinngitsuunerarpoq eqqartuussullu suliareqqinneqartussanngortillugu.

Pinngitsoorani ulluni 60-ini pineqaatissinneqarsimasunut inissiissarfimmiittussanngortinneqarpoq.

AAMMA ATUARUK Kannguttaatsuliorneq pillugu nunatsinni eqqartuussivinni suliat annersaat suliarineqalersoq

- Taamaattumik eqqortuutinneqarpoq Mikael Petersen pineqaatissinneqarnikut inissiisarfiannut ulluni 60-ini inissinneqartussanngortinneqassasoq. Naalagaaffiup suliamut aningaasartuutit akilissavai, Eqqartuussissoqarfik Sermersuumi suliamut pineqartumut eqqartuussisoq, Pia Hjort Andersen eqqartuussivimmi aalajangerneq taama saqqummiuppaa.

Aalajangernerli Mikael Petersenip illersuisuatalu, Jens Paulsenip Nunatta Eqqartuussivianut suliassanngorteqqippaat.

- Unneqqarillunga oqassaguma Mikael Petersen suliami saqqummertut pillugit pinngitsuutinneqassasoq naatsorsuutigigaluarpara. Taamaammat aalajangerneq tamanna tupaallaatigaara, suliarlu Nunatta Eqqartuussivianut suliassanngorteqqillugu, Jens Paulsen KNR-imut oqarpoq.

Aalajangerneq misissorniaraat

Mikael Petersen unnerluutinut sisamaasunut tamanut pisuutinneqarpoq, taamaalilluni ulluni 60-ini pineqaatissinneqarsimasunut inissiisarfimmiittussanngortinneqarluni. Aalajangerneq unnerluussisussaatitaasut pisortaannit naammagisimaarneqarpoq.

- Eqqartuussissoqarfiup suliaq uatsitulli unnerluussisussaatitaasutut nalilermagu naammagisimaartorujussuuara, unnerluussisussaatitaasut pisortaat, Morten Nielsen, eqqartuussissoqarfimmi suliap naammassinerata kinguaninngua KNR-imut oqarpoq.

Suliaq Nunatta Eqqartuussiviani suliarineqaqqissaaq, illersuisorlu piareersarniarpoq.

- Eqqartuussisup aalajangernerata tunngavia maanna misissussavarput, qanorlu pitsaanerusumik iliorsinnaanerluta tassani takussavarput, Jens Paulsen suliap naammassinerata kinguaninngua KNR-imut taama oqarpoq.

KNR-imit Mikael Petersen apersorumagaluarparput oqaaseqarusunngilarli.

Arnat sisamat, Siumup Nuummi allattoqarfianut attuumassuteqartut, taanna kannguttaatsuliorsimasutut unnerluuppaat.

Eqqartuussineq sapaatip akunnera kingulleq aallartinneqartoq

Eqqartuussissoqarfik Sermersuumi suliaq sapaatit akunnerata siuliani aallartimmat ilisimannittut qulingiluat nassuaatinneqarput. Taakkununnga Siumumit folketingemut ilaasortaq, Aki-Mathilda Høegh-Dam ilaavoq. Taanna arnanut suliassangortitsisunut sisamaasunut aamma ilaavoq.

Eqqartuussineq ippassaq aappassaaneerlugu nanginneqarpoq, unnerluussaasoq, ilisimannittut suliassanngortitsisulli sisamaasuni kingulleq eqqartuussivimmi nassuiaatinneqarput.

Mikael Petersen qinikkatut atuuffeqarnermini Naalakkersuisunut ilaasortaanikuullunilu Siumumi aaqqissuussaanermut siulittaasup tulliatut atuuffeqarnikuuvoq.