Eqqartuussivimmi suliap januaarip 13-ani naammassineqarnissaa naatsorsuutaavoq.Assi: KNR

Kannguttaatsuliorneq pillugu suliami arnat arfinillit ilisimannittuusut

Partiimut allattaanerusumasup unnerluussaanera kannguttaatsuliornermut tunngasoq eqqartuussivimmi suliarineqarmat ilisimannittut qulingiluat nassuiaapput.

Nulukkut patitsineq, naalakkiineq, kinguaassiuutit pillugit oqalunneq killinillu qaangiineq.

Tamakkuupput arnat angutillu arlallit Eqqartuussisoqarfik Sermersuumi ilisimannittutut marlunngornermi oqaatigisaat.

Tassanimi Siumumut Partii Naleqqamullu allattaanerusimasoq, Mikael Petersen, kannguttaatsuliornernut pisunut sisamanut unnerluutigineqarmat, eqqartuussivimmi suliarineqarluni ullumi aallartippoq.

Allataanerusimasoq arnanit sisamanit Siumup Nuummi allattoqarfiani sulisimasunit unnerluutiginneqarpoq. Unnerluussisut sisamat nulumikkut iviagimikkullu kuglepennimik attortissimanerarput.

AAMMA ATUARUK Kannguttaatsuliorneq pillugu nunatsinni eqqartuussivinni suliat annersaat suliarineqalersoq

Mikael Petersen unnerluussutinut tamanut eqqartuussivimmi aamma pinngitsuunerarpoq. Taassuma partiip allattoqarfiani inuit imminnut oqaloqatigeeriaasaat pissusilersuutaallu eqqartuussivimmi oqitsuunerarlugillu inuit nangaanatik qanorluunniit iliortarnerarpai.

Allattaanerusimasup suleqatini timaasigut attorlugit pattalaartarsimallugit eqqartuussivimmi oqarpoq. Tamannali ajortumik isumaqanngitsutut sulinermulli kajumissaatitut taallugu. Aamma arnanut suleqatigisarsimasaminut naalakkiineq ajornerarpoq.

Oqallinneq aallartittoq

Folketingemut Siumut sinnerlugu ilaasortaq, Aki-Mathilda Høegh-Dam, ilisimannittunut ilaavoq. Taanna arnat Siumumut attuumassutillit attuumassuteqarsimasullu arlallit peqatigalugit qanoq pineqarsimaneragaanerminnik allakkanik partiip aqutsisuinut siorna februaarimi nassiussivoq.

Mikael Petersen partiip allattaatut tamatuma kingorna suliunnaarpoq kinguaassiuutitigullu innimiilliortarneq pillugu nunatsinni oqallinnersuaq aallartippoq.

Aki-Mathilda Høegh-Dam nulumigut iviagimmigullu arlaleriarluni attorneqartarsimalluni eqqartuussivimmi oqaluttuarpoq. Tamannalu killiminik qaangiinerusutut nalilerpaa. Taanna taamannak pineqarnini nuannarinngikkaluarlugu parteeqatimi akornanni nuannaartuusaartarsimalluni aamma oqaluttuarpoq.

Aki-Mathilda Høegh-Damip killiinik 2015-imi qaangiiffigineqarsimanerarlugu ilisimannittoq, partiimi sulisuusimasoq, takunnittuusimalluni aamma nassuiaavoq.

Sapaatit akunnerata tulliani aalajangiisoqassaaq

Arnat marluk, Siumup allaffeqarfiani ikiuullutillu atorfeqartarsimasut qanoq pineqartarsimanerminnik aamma nassuiaapput. Taakkua Mikael Petersenimit killiminnik qaangiiffigineqartarlutik oqaluttuarput. Soorlu kinguaassiuutitigut innimiilliorfigineqarlutik naalakkersorneqarlutilluunniit.

Taakkuli pereermata ilisimannittut marluk apersorneqarput. Taakkua ulluinnarni partiip allaffeqarfianiittarsimapput. Mikael Petersenimullu unnerluutit kannguttaatsuliornermut tunngasut ilisimanagit oqarput. Piffissalli ilaani allattoqarfimmi inuit qaninngoornerusarnerat nassuerutigaat.

AAMMA ATUARUK Mikael Petersen: Kinguaassiutitigut innimiilliorneraanerit ilisarisinnaanngilakka

Eqqartuussivimmi suliaq suli naammassineqanngilaq. Ilisimannittummi arlallit pingasunngorpat januaarip 13-ani apersorneqaqqaassapput, ullorlu taanna suliap eqqartuussivimmi naammassineqarnissaa naatsorsuutaavoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat