Mikael Petersenip nunatta eqqartuussivianiinnera siulleq: Uannut peqatigiinniapiluttoqarpoq

Siumumi Naleqqamilu allattaanerusimasumut eqqartuussutip suliassanngorteqqinneqarnerata Nunatta Eqqartuussisuuneqarfiani suliarineqarnera ullumi aallartinneqarpoq.

Taanna kannguttaalliorsimasutut arnanit sisamanit unnerluutigineqarpoq.

Partiini allattaasimasoq eqqartuussivimmit piumasaqaatitaqanngitsumik ulluni 60-ini pineqaatissinneqarsimasunut inissiisarfimmiittussanngortinneqarpoq. Taassuma eqqartuussut suliassanngorteqqippaa – tamannalu nunatta eqqartuussisuuneqarfiani ullumi aallartinneqarpoq.

Mikael Petersen eqqartuussaanermini pinngitsuunerarpoq. Pinngitsuutinneqarnissanilu kissaatigalugu tamanna ullumi killisiorneqarami aamma piumasaraa.

Taassuma kannguttaatsuliorneraanermut unnerluussutit ilaat ilisarisinnaanagit ullumi oqaatigaa, tassungalu eqqunngitsumik unnerluussisoqarnerarlugu.

Iviangiisinut kuglepenimik atuuineq nuluisigullu patissineq

Taassuma ilaatigut oqaatigaa ”uanga pillugu oqaatigineqartut eqqunngilluinnarput”, aamma ”uannut pasilliutigineqartut eqqissisimanarnatillu killitsinnarput”.

Aamma kannguttaatsuliortutut politiinut unnerluutigineqarsiamanini tusaramiuk qaartartumik qaartoqartutulli misigisimanerarlunilu uissanngusorujussuanngorsimanerarpoq.

AAMMA ATUARUK Mikael Petersenimut nunatta eqqartuussisuuneqarfiani suliaq ullumi aallartissasoq

Suliaq aallartimmat arnat qulit Mikael Petersenip kannguttaatsuliorsimaneragaaneranut atsiorsimasut oqaatigineqaqqaarpoq. Nunattali eqqartuussisuuneqarfiani Mikael Petersenimut unnerluutiginnittut arnat sisamaannaapput.

Arnat sisamat piffissami 2013-imit 2019-imut Siumup Nuummi allattoqarfianut atuumassuteqarsimapput.

Mikael Petersenip arnat nuluisigut attorsimagai, iviangiisigut kuglepenimik attorsimagai kinguaassiutitigullu kannguttaatsuliortumik arnanut tunngasumik oqaaseqartarsimasoq, unnerluussutimmi ilaatigut allassimavoq.

Suliaq aqagu nanginneqaqqissasoq

Partiilli allatsigisimasaata nammineq oqarnera naapertorlugu imminut tusagaanerlutsisitsiniaasoqarpoq.

- Suliaq tamarmi politikkikkut peqatigiinniapiluttoqarneruvoq, ’Kim Kielsenimi uppisinneqassaguni Mikael Petersen siulliullugu uppisinneqartariaqarpoq’, taanna killisiorneqarnermini oqarpoq.

Unnerluussisussaatitaasut tassunga apeqquteqaraangata ilaatigooriarluni ulussami illuatungaa attuuasarpaa.

Taannali eqqissisimalluinnarpasippoq, eqqartuussinerullu unikaallannerani inuit allat eqqartuussiffiusup silataani oqaloqatigisarlugit.

Eqqartuussineq aqagu sisamanngorpallu nanginneqaqqissaaq.

AAMMA ATUARUK Aki-Matilda Høegh-Dam: Mikael Petersenimit inniminniilliorfiusunut ilaavunga

Eqqartuussinermi inuit qulingiluat nassuiaateqarput, folketingimullu ilaasortaq Siumumeersoq, Aki-Matilda Høegh-Dam taakku ilagaat. Taanna Mikael Petersenip kannguttaatsuliorsimanerarneqarnerani unnerluussisut ilagaat.

Taanna Siumup siulersuisuinut arnanit qulinit allakkanik qulinik 2020-p aallartinnerani nassiussisunut ilaavoq. Allakkani Mikael Petersenip kannguttaatsuliorneragaanera nassuiaatigineqarpoq.

Mikael Petersen partiip allattaatut tamatuma kingorna suliunnaarpoq kinguaassiuutitigullu innimiilliortarneq pillugu nunatsinni oqallinnersuaq aallartippoq.

Aki-Mathilda Høegh-Dam aqagu nassuiaateqassaaq.