Mikael Petersenimut nunatta eqqartuussisuuneqarfiani suliaq ullumi aallartissasoq
Mikael Petersen Eqqartuussiveqarfik Sermersuumit kannguttaatsuliorsimasutut januaarip ulluisa 14-ianni ulluni 60-ini pineqaatissinneqarsimasunut inissiisarfimmiittussanngortinneqarpoq.
Taanna partiimi allattaasimavoq nunatsinnilu politikkikkut suliaqarnermi pissaaneqarsimalluni. Eqqartuussivimmilu suliaq nunatsinni oqaluttuarisaanermi kinguaassiutitigut innimiilliornermut tunngatillugu suliani oqallisaanerpaalluni.
Arnat sisamat Siumup Nuummi partiip allaffianut attuumassuteqartut taanna kannguttaatsuliorsimasutut unnerluutigaat.
Mikael Petersenip arnat nuluisigut attorsimagai, iviangiisigut kuglepenimik attorsimagai kinguaassiutitigullu kannguttaatsuliortumik arnanut tunngasumik oqaaseqartarsimasoq, unnerluussutimmi ilaatigut allassimavoq.
Arnat nuluisigut patikkai
Eqqartuussisuuneqarfik Sermersuumi eqqartuussinermi siullermi Mikael Petersenip arnat nuluisigut patissimallugit nassuerutigaa – tamannali nammineq sulinermut kajumissaataanerarpai.
Mikael Petersen eqqartuussisoqarnera tamaat kannguttaatsuliorsimasutut pinngitsuunerarpoq, eqqartuussiviullu aalajangernera nunatta eqqartuussisuuneqarfianut suliassanngorteqqillugu. Eqqartuussisuuneqarfimmilu suliassaq ullumi aallartissaaq, tassaungalu ullut pingasut atorneqarnissaat naatsorsuutigineqarpoq.
Mikael Petersenip illersuisuatalu pinngitsuutinneqarnissaq piumasarigaluarpaat, Jens Paulsen, eqqartuussivimmi suliami illersuisoq oqarpoq. Taassuma eqqartuussivimmi suliap suliarineqannginnerani apersorneqarnissani itigartitsissutigaa.
AAMMA ATUARUK Mikael Petersen kannguttaatsuliornernut Nunatta Eqqartuussiviani pinngitsuutinneqarusuttoq
Akerlianilli unnerluussisussaatitaasut suliamut allatut inerniliinissamut isiginnittut, unnerluussisussaatitaasut pisortaat, eqqartuussivimmi suliami aamma unnerluussisuusoq, Morten Nielsen KNR-imut qaammat kingulleq oqarpoq.
- Unnerluussisussaatitaasut aalajangersaasoqartikkusuppaat, unnerluutigineqartorli pinngitsuutinneqarusuppoq. Taamaattumik Nunatta Eqqartuussiviata suliaq nutaamik suliarissavaa uppernarsaatillu nutaamik naliliiffigalugit, Morten Nielsen oqarpoq.
Taamaammat suliamut uppernarsaatit maanna qaqinneqaqqissapput. Qanorlu inerneqassanersoq nunatta eqqartuussisuuneqarfiata naliliiffigissavaa.
Eqqartuussissuserisoq tupaallattoq
Suliamut ilisimannittut qulingiluat eqqartuussivimmi nassuiaateqarput.
Siumut sinnerlugu folketingemut ilaasortaq, Aki-Mathilda Høegh-Dam, ilisimannittutut nassuiaasunut akuuvoq. Taanna arnanut kannguttaatsuliorfigineqarsimanerarlutik Mikael Petersenimik unnerluutiginnittunut akuuvoq.
Eqqartuussisup suliamik inerniliineq saqqummiukkamiuk arnat ilisimannittut nassuiaataat tutsuiginartutut nalilerpai.
AAMMA ATUARUK Aki-Matilda Høegh-Dam: Mikael Petersenimit inniminniilliorfiusunut ilaavunga
Mikael Petersen eqqartuussiviup suliamut aalajangerneranut nammineq oqaasissaqanngilaq: Tassumali eqqartuussissuserisua oqaaseqarluni:
- Unneqqarillunga oqassaguma Mikael Petersen suliami saqqummertut pillugit pinngitsuutinneqassasoq naatsorsuutigigaluarpara. Taamaammat aalajangerneq tamanna tupaallaatigaara, Jens Paulsen KNR-imut januaarimi oqarpoq.
