Air Greenlandimi isumaqatigiissusiortoqarmat suliumajunnaarnissaq taamaatiinnarpoq

Air Greenlandip timmisartuutaanut saqisunut nutaamik isumaqatigiissusiortoqarpoq, taamaalilluni juullip nalaani suliumajunnaartoqarniarunnaarpoq.
Air Greenland FPU-lu maanna saqisut akissarsiai pillugit ukiunik sisamanik tullernik atuuttussamik isumaqatigiissuteqarput. Assi © : Christine Hyldal/ KNR
novembarip 30-at 2022 13:51

Piffissami kingullermi Air Greenlandimi suliumajunnaartoqaratarsinnaanissaanik nutaarsiaassiillattaanerput malinnaaffigisimassajunnarsivat.

Illuatungeriit Air Greenland aamma Air Greenlandimi sulisut peqatigiiffiat, FPU saqisut akissarsiai pillugit aaqqiiagiinngissuteqarput, tamatuma kingunerisaanik timmisartuni saqisut decembarip ulluisa aappaaniit suliumajunnaarniarlutik ilimasaaruteqarlutik sapaatit akunnerata siuliani nalunaaruteqarput.

Suliumajunnaarnissaq maanna atorunnaarsinneqarpoq.

Air Greenland FPU-lu maanna saqisut akissarsiai pillugit ukiunik sisamanik tullernik atuuttussamik isumaqatigiissuteqarput.

AAMMA ATUARUK Immikkut ilisimasalik suliumajunnaartoqalersaarnemut: Suli tupaallannartoqariaannaavoq

Air Greenlandimi sulisoqarnermut pisortaq, tusagassiuutinut taama nalunaaruteqarpoq.

- Nuannaarutigaara suliffik kajuminnarlunilu allanut unammillersinnaasoq maanna piffissami sivisunerusumik ukkatarisinnaaleratsigu nuannaarutigaara.

Isumaqatigiissut FPU-mit iluarisimaarneqarpoq.

- Pitsaasumik angusaqaataasumik naapeqatigiilluarnerput nuannaarutigaara, Naammassinninnisssamik qulakkeerinnittumik  ilaasortattalu suliaasa putsaassusaannik nassuerutiginnittumik, Flyvebranchens Personale Unionimi siulittaasup tullia Anders Mark Jensen oqaaseqarpoq.

Isumaqatigiissut sumerpiaq imaqarnersoq arlaannaanilluunniit oqaatigineqarusunngilaq. Nutaamilli isumaqatigiissuteqartoqannginnerani saqisut akissarsiamik qaffaavigineqarnissaanik kissaateqarlutik suliumajunnaarnissaminnik ilimasaaripput. Piumasaqaat Air Greenlandimiit ammaffigineqaraluarluni saqisulli sulinerminni piffissaliussamut akuersaarnerunissaat Air Greenlandimit isiginiarneqarpoq.

Timmisartumilli sulisut sullisaat arnanit angutinillu immikkut atorneqartartut 2023-mi assigiissaartinneqalissasut illuatungeriit isumaqatigiissummik nutarsaanermi immikkut ittumik isumaqatigiissutigaat.

Juullimut angallannissat kalluarneqarniarunnaartut

Aaqqiiagiinnginnerup kingunerisaanik Air Greenlandimut ilaallutik juullip nalaani angalasussat nalorninartorsiortinneqarput.

AAMMA ATUARUK Ajorlunilu imminuinnaq eqqarsaatigineruvoq: Ilinniartut Air Greenlandip juullimut suliumajunnaarniarnera kamaatigaat

Isumaqatigiissuteqarnerlu Air Greenlandimi pisortaanermut, Jacob Nitter Sørensenimut oqiliallatsitsivoq.

- Pilersaarutit malillugit suliassagut ingerlassinnaaleratsigit oqiliallaqaanga. Atuisut, sulisut ingerlatseqatigiiffillu sinnerlugit juullimi angallannerup pilersaarutit naapertorlugit ingerlanneqarsinnaalernera oqiliallaatigeqaara, atuisullu paasinnilluarnerinut qutsavigiumavakka, Jacob Nitter Sørensen oqarpoq.

Piffissami sivisuumi arlaleriarluni isumaqatigiinniartoqartaraluartoq 2021-mi ukiakkut aallartikkami maanna akunnerit 29-it Forligsinstitutionimeereerluni naammassineqarpoq. Isumaqatigiinniarnerit kinguneqartussamik torersumillu ingerlanneqarsimasut illuatungeriit tamarmik oqaatigaat.

Isumaqatigiissutip pisinnaatinneqartunik ataatsimiisitsinikkut maanna akuerineqarnissaa amigaataaginnalerpoq.