Timmisartortitsinermik paasiniaaqqissaartartoq: Air Greenland Namminersorlutik Oqartussanut qanoq akeqassava?
Danskit Air Greenlandimik piginneqataassutitik, 25 procentiusut, Namminersorlutik Oqartussanut tunissappassuk, nalinga naatsorsorneqartariaqarpoq. Tassami timmisartortitseqatigiiffiup nalinga maannamut aalajangerneqarnikuunngilaq.
Danskit mittarfissualiornissamut aningaasaleeqataanissaat ataasinngormat isumaqatigiissutigineqarpoq, tassanilu Air Greenlandimik piginneqataassutsit aammattaaq eqqaaneqarput. Timmisartortitseqatigiiffimmi piginnittuussuseq allanngortinnissaannut pilersaarnissamik nalunaarummik aamma allattoqarpoq, tassa danskit Air Greenlandimik piginneqataassutaat Namminersorlutik Oqartussat pisiarissagaat.
AAMMA ATUARUK Selvstyret kan købe statens andel af Air Greenland
Tamannalu tupaallannanngitsoq, Sydbankimi timmisartortitsisarnermik paasiniaaqqissaartartoq Jacob Pedersen isumaqarpoq.
Nunatsinnut pingaarutilik
Tassami attaveqatigiinermik annertusaaniarluni taama aningaasaliitiginiaraanni timmisartortitseqatigiiffiup kikkunniit piginneqarnera qiviassallugu pisusissamisoortoq, taanna isumaqarpoq.
- Air Greenland Kalaallit Nunaanni attaveqatigiinnermut pingaaruteqartorujussuuvoq, aamma mittarfiliortiternermi aamma taamaaginnartussaavoq. Taamaammat Air Greenland Kalaallit Nunaannit pigineqaruni pissussimasoorneruvoq, Jacob Pedersen oqarpoq.
AAMMA ATUARUK Air Greenlandimi piginneqataassutsit tamaasa pigilernerisigut nunarput pitsaasumik inississinnaasoq
Danskilli piginneqataassutaat Namminersorlutik Oqartussat pisiarissappatigit taakku nalingi naatsorsorneqartariaqarput.
- Suliassaq pissanganartorujussuuvoq, tassami timmisartortitseqatigiiffiup nalinga naatsorsorneqaqqaartariaqarpoq.
Skandinavia qiviarneqartoq
Tamatumanilu assigiinngitsunik periuseqartoqarsinnaasoq, timmisartortitsinermik paasiniaaqqissaartartup oqaatigaa.
Piginneqataassutit naatsorsortinneqarsinnaapput. Aningaasaliisarnermi aningaaserivimmik suliakkiisoqarsinnaavoq, taamaalilluni piginneqataasutit nalilertillugit, tamannalu akisoorujussuussaaq. Taamatullu iliornissaq ilimananngilaq. Skandinaviamili niuffateriaatsit qiviarneqarsinnaasut, Jacob Pedersen isumaqarpoq.
- SAS-imut piginneqataassutit suliffeqarfiup nammineq pigisasa nalingi napertukannerlugit tunineqartarput. Eqqarsaraannilu Air Greenlandip akia pappialamut kisitsipallanneq aningaasaliisarnermi aningaaserivinnut akisuunut nalilersuititsinermiit sukkanerusoq, taava taamaaaliornissaq piuminarneruvoq.
