Inuussutissarsiutit

NunaMineralsimi kinguaattoorneq eqqartuussissuserisup uissuummissutigaa

NunaMineralsip akiliisinnaajunnaarluni matunnginnissaa anguniarlugu nutaatut aaqqissuullugu annaanniarneqarneranut pilersaarutinut aningaasaliinissap kinguarteqqinneqarnera nakkutilliisumit uissuumminartutut taaneqarpoq.

Allattoq Charlotte Holten-Møller

januaarip 21-at 2016 09:44

Nutserisoq Ivik Kristiansen

- Akilersuinermik unitsitsinerup sivisungaatsiartumik ingerlanneqarneranut tunngatillugu uissuumminarpoq, eqqartuussissuserisut Malling & Hansen Damm aamma Kromann Reumert, NunaMineralsimit aningaasanik pisassalinnut taama nalunaaruteqarput.

NunaMineralsip Kalaallit Nunaanni Eqqartuussivikkut akilersuinermik unitsitsinerata atuuttussaanera februaarip 29-anut 2016-imut sivitsoqqinneqaqqammerpoq.

Aamma atuaruk NunaMineralsip akiliisinnaajunnaarnera sivitsoqqinneqarpoq

Suliffeqarfiup NunaMineralsimut piginnittuuleqqammersup, Greenland Mining Managementip, Tuluit Nunaanneersup, aningaasaliiniarlutik siulersuisunut nalunaarnerat, eqqartuussissuserisut aamma maluginiarpaat.

- Aningaasaliinissanik maanna amigaateqaraluartoq aqutsisut nutaat aningaasanik pissarsisoqarnissaanik naliliinerat pingaartilluinnarparput, eqqartuussissuserisut aningaasanik pisassalinnut ilisimasitsissutini allapput.

Aamma atuaruk NunaMineralsimit aningaasanik pisassallit amerlasuut

Aningaasaliinissallu isumannarunnaarpata NunaMineralsip nutaatut aaqqissuullugu annaanneqarnissaanut isumaqatigiissummi tapisianik ilanngutsisoqarnissaa pisariaqassasoq nakkutilliisut aamma allapput.

Aamma ataatsimeersuartitsisoqaqqinnissaa pisariaqassasoq, nakkutilliisut aningaasanik pisassalinnut ilisimatitsissummi allapput.

Aamma atuaruk NunaMinerals nunanit allamiunit pigineqalerpoq