Issittumi umiarsuit sorsuutit marluk ukiuni 15-ini qamutilittarsinnaanngitsut

Illersornissaqarfiup issittumi alapernaarsuutai angisuut sisamat Thetis, Triton, Vædderen aamma Hvidbjørnen piffissami sivitsortumi isornartorsiorneqareersut alapernaarsuutit mikinerit marluk aamma ajornartorsiuteqartut maanna paasinarsivoq.

Umiarsuit alapernaarsuutit Knud Rasmussen aamma Ejnar Mikkelsen qamutilinnut aqutsissutinik ikkussuisoqarsimanngisaannarsimanera pissutigalugu ukiuni 15-ini qamutilittarsinnaasimanngillat.

Illersornissamut ministereqarfiup sakkulisarnermi aqutsissut "pingaarluinnartuunerarpaa". DR ullumi taama allaaserisaqarpoq.

Umiarsuit alapernaarsuutit Knud Rasmussenitut ittut nunatta Savalimmiullu imartaani alapernaarsuinissamik kisermaassisuunermillu atortitsinissamut siunertaqarput.

Taamaaliornissamullu 76 millimeterinik M/85-inik qamutileqarnermik sakkut atorneqarput. Qamutillilli ukiorpassuarni takussutissaannaapput. Taakkumi atornissaanut aqutsissut ikkussorneqarsimanngisaannarpoq.

Aqutsissuteqartinnagu qamutillit iluamik atorneqarsinnaanngillat.

Tamanna illersornissamut ministerip, Troels Lund Poulsenip (V) DR-imit tamanna pillugu aperineqarami uissuummissutigaa.

- Akuersaarneqarsinnaanngilluinnarpoq, Troels Lund Poulsen oqarpoq.

Atortorissaarut umiarsuarni piareerneqanngisaannartoq

Umiarsuit alapernaarsuisussanik ilaqarlutik aallannginnerminni qitiusumik pingaaruteqartumillu atortorissaarutilersorneqanngisaannarsimapput.

Aallartitsinermut aqutsissut qamutillip qanittumi ungasissumilu eqquisinnaanissaanut atorneqartarpoq.

Aqutsissuteqartinnagu sakkutuut umiarsuini qamutillit taamaallaat qununarpasinnissamut silaannarmullu aarlerisaarinermik seqqorsinnaanissamut atorneqarsinnaapput.

Illersornissamut ministereqarfiup sakkutunut aqutsissutit svenskit suliffeqarfiannit Saab-imit 42 millionit koruunilerlugit pisiariniarlugit aalajangeraa, Folketingip Aningaasaqarnermut ataatsimiititaliaa 2015-imi ilisimatinneqarpoq.

Ukiulli arfineq-marluk qaangiuttut qaangiummata umiarsuarni alapernaarsuutinit marlunnik ataatsimut atulersitsiniarneq aatsaat aallartilluarpoq. Pilersaarut malillugu alapernaarsuutip aappaanut 2024-p ingerlanerani atortuliisoqassaaq.

Illersornissamut ministereqarfik DR-ip saqqummiussaa tunngavigalugu Illersornissamut ministereqarfik suliap ingerlaneranik nalunaajaaqquaa, tamannalu januaarip naanerani pinissaa naatsorsuutigineqarpoq.

- Nassuiaatissaqanngilanga. 2015-imi aalajangiinermik naammassinnittoqarsimannginnera uanga aamma ajoraluartumik uissuummissutigaara, Troels Lund Poulsen DR-imut oqarpoq.

Illersornissap nutarternissaanut 100 milliardit koruunit sinnerlugit ukiuni qulini tulliuttuni atorneqassapput. Illersornissamut ministerip suliaqarnermi unammillernartoqarneranik taavaa.