NunaMineralsimit aningaasanik pisassallit amerlasuut
Suliffeqarfiit assigiinngitsut aningaasanik pisassaqarput, ilaatigut eqqartuussissuserisoqarfiit, nukissiorfiit, Inu-IT, aatsitassanut aqutsisoqarfik, Trolles Tankilu aningaasanik pisassaqarlutik.
Aamma asaasut UloRengøring 27.000 koruuningajannik pisassaqarput.
- Mikisuugatta namminersortuullutalu, aningaasassatta tamarmik akilerneqarnissaat pingaaruteqarpoq, UloRengøring og Servicemi pisortaq, Rosa Andersen oqarpoq.
Akiitsut akilerneqarnissaannut pilersaarusiaq
Tuluit nunaanneersoq aatsitssarsiorfik GMM, Patrick Newmanimit ingerlanneqartoq, NunaMineralsip ingerlaqqilernissaanik anguniagaqarluni aaqqissuuteqqinnissamik pilersaarusiorpoq, ilaatigut akiitsut qanoq akilerneqarnissaannut pilersaarusiorluni.
100.000 koruunit ataallugit aningaasanik pisassallit maanna pisassatik tigussagaat anguniarneqartoq pilersaarusiami erserpoq.
Aamma atuaruk GMM-ip NunaMinerals annaanniarsaraa
100.000 koruuniniilli amerlanerusunik akiitsoqarfigineqartut pisassaat akiliinerni arfineq pingasuni akilersorneqassapput.
Akilersuinerilli qaqugu ingerlanneqassanersut pilersaarusiami ersinngitsut, kukkunersiuisumit Knud Østergaardimit oqaatigineqarpoq.
- Akiitsut akilersuinerni akilerneqarnissaanut qularnaveeqqusiisoqarsinnaanngilaq, tassami NunaMinerals piffissami sivisunermi ingerlaannassaguni aatsaat taamaattoqarsinnaagami. NunaMineralsili ingerlaannarnissaanut pilersaarusiap periarfissaqartinnerulerpaa, Knud Østergaard oqarpoq.
Aningaasanik annaasaqarsorisoq
Grønlandsbankenip atukkiussatik 11 millionit koruunit qularnaveeqqusersimavaat, akiligassaqarfiilli annerit allat, katillugit 17 millionit koruuninik aningaasanik pisassallit, aningaasaatitik annaasinnaavaat.
Namminersorlutik Oqartussanit pigineqartoq, Greenland Holding 4 millionit koruuninik pisassaqartoq, taakkununnga ilaavoq.
Ingerlatsiviulli pisassami tigunissaat ilimaginngikkaa, Greenland Holdingimi pisortaq, Karsten Høy oqarpoq.
- Aningaasat pisassavut annaallugit ilimagaarput, Karsten Høy oqarpoq.
Akiitsut akilerneqarnissaannut eqqartuussivimmi pinngitsaaliinikkut akiligassaqarfinnik tulleriiaarisitsineranik akilerneqassapput. Tassani akiitsoqarfiit tamarmik NunaMineralsip ingerlaannarnissaannut aamma akuersisussaassapput.
