Inuussutissarsiutit

GMM-ip NunaMinerals annaanniarsaraa

Suliffeqarfiup misissueqqaarnernik ingerlatsiviusartup akiliisinnaaqqajaasup NunaMineralsip annaanniarnera suli sulissutigineqarpoq. Suliffeqarfik ippassaq unnukkut kingusissukkut taama nalunaaruteqarpoq.

Allattoq Hagen Højer Christensen

maajip 15-at 2015 09:44

NunaMineralsip siulersuisuisa suliffeqarfiup akiliisinnaajunnaartutut nalunaarutigineqarnissaa apriilip 19-ianni nalunaarutigaat. Qinnuteqaallu Kalaallit Nunaata Eqqartuussiviani marlunngormat suliarineqartussaagaluarpoq. Eqqartuussivimmili suliassaq minutsit 20-t qaangiutiinnartut sumik pissuteqaraluarnersumik kinguartinneqarpoq. Tamanna illuatungeriinnit oqaaseqarfigineqarusunngilaq.

Aamma atuaruk Nunaminerals akiliisinnaajunnarluni nalunaarutigineqarnissaannut Koreamiut ambassadøria malinnaavoq

Eqqartuussivimmi suliarineqarnissaa ullumi tallimanngornermi nalunaaqutaq 10.00 pisussanngorpoq.

Nalunaarummi naatsumi oqaatigineqarpoq, Greenland Mining Management - GMM - aatsitassarsiornernut aningaasaliisartoq Patrick Newman siuttoralugu NunaMineralsip suleriaasissaanik nutaamik maanna suliaqaleruttortoq - tamannalu Namminersorlutik Oqartussat aamma NunaMineralsip akornanni oqaloqatigiissutigineqartoq.

- NunaMineralsip suliarisartagai piffissaq kingullerpaaq atorlugu allanngortinneqassanersut oqaloqatigiinnerit inernerisinnaaneraat suli nalunartulerujussuuvoq. Periarfissanut nutaanut siulersuisut naleqqussaarusupput, nalunaarummi ilaatigut taama allassimavoq.

Aamma atuaruk NunaMinerals akiliisinnaajunnaarluni matusinnaanngorpoq

Greenland Mining Management annaassiniarluni pilersaarumminik siusinnerusukkut saqqummiussereeraluarpoq, tamannali Namminersorlutik Oqartussanit, NunaMineralsimi piginneqataasuni annerpaasunit itigartitsissutigineqarluni.