Kim Kielsen politikkikkut ukiaru siunissamilu anguniakkat pillugit quppernernik 16-inik takitigisumik ataatsimiinnermik ammaanermi oqalugiarpoq.Assi: KNR / Malik Brøns

Adjunkti: Oqalugiarneq nutaartaqarpallaanngitsoq

Sammisat ilisimaneqarluartut Kim Kielsenip Inatsisartut ukiakkut ataatsimiinnermik ammaanermi oqalugiaataani oqaluuserineqarnerupput, aammali nutaanik imaqarluni. Adjunkti taama naliliivoq.

Inatsisartunut ilaasortat kalaallisuulerlutik ukiakkut ataatsimiinnissartik ippassaq aallartippaat.

Pisarnerlu malillugu Naalakkersuisut siulittaasuat, Kim Kielsen, politikkikkut ukiaru siunissamilu anguniakkat pillugit quppernernik 16-inik takitigisumik ataatsimiinnermik ammaanermi oqalugiarpoq.

AAMMA ATUARUK Kielsenip ammaanermi oqalugiarnerani pingaarnerit pingasut ukuupput

Ataatsimullu isigisumik politikkikkut sammisat oqaluuserimmagit ammaanermi oqalugiaataasoq malunnartoq, Ilisimatusarfimmi inuiaqatigiilerinermik, aningaasaqarnermik tusagassiornermillu adjunkti, Rasmus Leander naliliivoq.

- Oqalugiarnerit taama ittut sulianut nersorinninnerusuugajupput, "maani ingerlalluarpugut", Kielsenillu Inatsisartut ataatsimiinnerannik ammaanermi oqaluuserisai ilisimaneqarluareerput.

- Aamma suliat ilaannut killiffimmik nalunaarutiginninneruvoq. Aalisarneq pillugu ataatsimiititaliarsuaq pilersaarutigineqartutut ingerlasoq oqarpoq, sumilli suliaqarnersut annerusumik oqaatiginagu. Isumaginninnermi iliuusissatut pilersaarusiortoqarpoq. Tassalu ilisimaneqarluartut arlaqarput nutaartaqarpallaarnanilu, Rasmus Leander oqarpoq.

Peqqinnissaq silallu pissusia

Oqaluuserineqartunili nutaartaqarpoq.

- Nutaajusuni peqqinnissaqarfimmik pingaarnerutitsineruneq inuussutissallu pillugit inatsisissatut siunnersuut soqutiginartupilussuaq maluginiakkama ilagivaat, Rasmus Leander oqarpoq.

Naalakkersuisullu siulittaasuata silap pissusaata allanngoriartorneranik oqaluuserisaqarnera adjunktip maluginiarpaa.

- Maani silap pissusia sukkanerpaamik allanngoriartoraluartoq Kalaallit Nunaata tamanna pillugu tunuarsimaalaarnera ilisimatuut ilaasa akornanni isornartorsiorneqareerpoq. Kim Kielsenilu arlalinnik taasaqarpoq, soorlu avatangiisit kisianni aamma Naalagaaffiit Peqatigiit piujuaannartitsinissamut anguniagaat, tamannalu soqutiginartupilussuuvoq, Rasmus Leander oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat