Kielsenip ammaanermi oqalugiarnerani pingaarnerit pingasut ukuupput
- Nunarput tuniniagaanngilaq, kisianni niueqateqarnissamut ammavugut.
Naalakkersuisut siulittaasuat, Kim Kielsen Inatsisartut ukiami ataatsiinnarannik ammaalluni oqalugiaqqittoq taama oqariartuuteqarpoq.
Kim Kielsen uummatimigut nappaateqarluni ukiassariartulernerani napparsimalluni sulinngiffeqarnikuugaluarluni uummaarippasippoq. Kimip partiiani ukiassariartulernerani eqqissiviilliortoqarluni eqimattat Kielsenimut tatiginninnginnermik oqariartuuteqarsimapput. Eqqissiviilliortoqarnerani illuatungeriit maanna matussuserneqarsimanerarpaat.
Vivian Motzfeldt Inatsisartuni siulittaasussatut toqqarneqaqqippoq.
Siumumeersoq 47-nik ukiulik 17-inik, tassalu Siumumit, naalakkersuisoqataasunit Nunatta Qitornaanit, ikorfartortaasunut Demokraatinit taavalu Atassummit, toqqarneqarluni toqqarneqaqqippoq.
Illuatungiliuttut partiianit Inuit Ataqatigiinnit, Mimi Karlsen IA-mit Partii Naleqqamillu taperserneqarluni sassarpoq.
Vivian Motzfeldt Inatsisartuni oktobari 2018-imi siulittaasuulerpoq.
- Inatsisartuni partiit isumaat akimorlugit suleqatigiinnissat pingaaruteqaleraluttuinnarpoq. Puigussanngilarput nunarput tamaat sinnerlugu, inuiaqatigullu tamaasa pillugit sulisussaagatta, Nunatta avannaarsuani Siorapalummiiik, kujaterpiaani Narsarmijinut, kangianilu Ittoqqortoormiunut, Kielsen ammaanermi oqalugiarnermini oqarpoq.
Siulittaasup ammaalluni oqalugiarnermi uku pingasut eqqartorpai.
Piiaaviit, aalisarneq mittarfiillu
Nunatsinni aalisarneq aningaasanik isaatitsiviunerpaallunilu pingaarnerpaavoq, Naalakkersuisullu aningaasat isertut qaffanneqarnissaat pingaartuusoraat.
Aatsitassalli aamma pingaaruteqarput:
- Nunattalu inuutissarsiutitigut inerikkiartorfiisa ilaanniippoq aatsitassarsiorneq. Naalakkersuisut nuannaarutigaat nunatsinni aatsitassasiornermik pitsaasumik ingerlammat. Suliffeqarfiit aatsitassarsiornermik ingerlatsisut nunarsuatsinni annerpaat ilaat nunatsinnut uterput. Aatsitassarsiorfiit nutaat arlallit pilersaarusiorput akuersissuteqarnissaminnullu qinnuteqaatiminnik piareersaallutik. Massakkut piiaviit marluk ammareerput ingerlallutillu. Tassa Qeqertarsuatsiaat eqqaanni rubinisiorfik, taavalu Kangerlussuup paavani Qaqortorsuarmi anorthosit-imik piiavik. Aatsitassarsiorfiit taakku marluk suliffissaqartitsipput, taamaalillutillu nunatsinnut iluaqutaallutik, Kim Kielsen oqarpoq.
AAMMA ATUARUK Kielsen-kritikere begraver stridsøksen
- Aningaasaliisarneq qaffassarniarlugu aatsitassarsiornermut inatsisip eqaallisarneqarnissaa siunertaralugu Naalakkersuisut siunnersuummik saqqummiussaqassapput, Kim Kielsen oqarpoq.
Tamatuma saniatigut Nuummi Ilulissanilu mittarfiit sanaartorneqartussaapput, taakku suliffissallu amerliartortussat qaammatip tullia aallartinneqassapput – siulittaasulli oqarnera naapertorlugu nunatsinni innuttaasut ilarujussui sulinissamut piareersimanngillat.
Inuusuttut utoqqaallu
- Naalakkersuisut pilersaaruteqarput ilinniartunut ineeqqanik 1000-it sinnerlugit amerlassusilinnik sanaartortitsissallutik. Pingaaruteqarluinnarpoq ilinniartut ilinniarnerminni pitsaasumik inissaqartinnissaat, Kim Kielsen neriorsuivoq, ilinniartorpassuillu pingaartumik Nuummi inissaaleqisut eqqartorlugit.
Taamalu issittumi ilisimatusarfimmik pilersitsinissaq isumatsialaannginnersoq politikerit isumasiortariaqarsoralugit.
Issittumi ilisimatusarfimmik pilersitsinissaq eqqarsaatigissavarput.
- Nuannaarutigaarput ukiuni kingullerni nunatsinni innuttaasut suliffillit amerleriarsimammata, malitsinganillu suliffissarsiortutut nalunaarsorneqarsimasut ukiut sisamat iluanni 1.600 missaannik ikileriarsimallutik. Ajoraluartumilli nunatsinni innuttaasut ilai sulileriaannaanngillat, Kim Kielsen oqarpoq.
Inuusuttut ilinniarluarsimasut qulakkeernissaat pingaartuuvoq – utoqqarnulli politikki tassa utoqqaat suliinnarusuttut naak soraarnerulereertussaagaluarlutik sulerusuttut aamma pingaaruteqarpoq.
Naalakkersuisut utoqqarnut politikkimik suliaqaleruttorput, taanna aappaagu ukiup ingerlanerani saqqummiunneqassaaq.
- Massakkut aaqqissuussinermi utoqqaat utoqqalinersiutimik saniatigut akileraaruserneqartussanik isertitaqarsimagaangata utoqqalinersiutaat ilanngarneqartarput. Tamanna utoqqaat suli pisinnaagaluit inuiaqatigiinni suleqataanissamut kajumissusaannut akornusiisarpoq, siulittaasoq ammaanermi oqalugiarnermini oqarpoq.
Nunarsuarmit soqutiginnittoqarnera
Taavalu Trumpip taassumalu nunatsinnik pisinissamut pilersaaruteqarneranut. Amerikamiummi præsidentiata nunatsinnik pisinissamik soqutiginninnera nunarsuarmit soqutiginninnermik takussutissiilluarpoq.
- Qaammammi kingullermi pisut takutippaat nunatta soqutigineqarnera annertusiartuinnartoq – tamatumalu kingunerisaanik nunatta 15 nunarsuarmioqatitsinniit ilisimaneqarnera soqutigineqarneralu minnerulernavianngilaq. Nunatta nunarsuup issittortaani immikkuullarissumik inissisimanera peqqutaalluni ukiuni kingullerni illersornissamut tunngasut eqqumaffiginerulernissaat sukaterneqarnissaallu pingaaruteqalerluinnarput, Kim Kielsen oqarpoq.
Vivian Motzfeldt Inatsisartunut siulittaasutut toqqarneqaqqippoq
Kim Kielsenip oqalugiaataa uani atuarsinnaavat.
