Timersorneq

ACR sunut tamanut piareersimavoq - aamma kunngissaq Frederimmut

Arctic Circle Racemik, ACR, aaqqissuisut Sisimiut timaani ukiut 20-ssaannik ujakkaarluni ulluni pingasuni sakkortuumik sukkanniuuttoqarnissaanut qilanaarput. Peqataaniarlutik nalunaarsimasut aatsaat taama amerlatigipput kunngissallu peqataanissaa aamma neriuutigineqarpoq.

Allattoq Camilla Dam

februaarip 16-at 2016 10:59

Nutserisoq Simon Uldum -

Kunngissaq Frederik Sverigemiut aviisiannit siorna septembarip qaammataani apersorneqarluni oqaluttuarpoq utoqqalivallaartinnani "sisoraaserluni sukkaniunnerit nunarsuarmi sakkortunersaat" kilometerinik 160-inik isorartussuseqartoq peqataaffigerusullugu.

Qaaqqusissut kunngikkormiunut nassiunneqareerpoq kunngissarli peqataassanersoq suli nalunarallarpoq.

- Pisortatigoortumik tamatuminnga nalunaarfigineqanngilagut. Nuannissagaluaqaaq peqataassappat.

- Kunngissaq ukiut siuliini pisarnitsitut soorunami qaaqquarput, aaqqissuussinerulli aallartinnissaa sioqqutilaarlugu aatsaat akissuteqarfigineqartarpugut, takussavarput qanoq tamatumuuna nalunaassanersoq, ACR-ip siulersuisuini siulittaasoq, Jens Klaus Lennert, KNR-imut taama oqarpoq.

Aamma atuaruk Arctic Circle Race aappaagu aallartippat kunngikkormiunit peqataasoqariaannaasoq

Kunngissaq piffissaq kingulleq atorlugu peqataaniarluni nalunaaraluaruniluunniit tikilluaqqusaavoq, aaqqissuisummi misilittagartuut sillimaniarnikkut piareersarluarsimapput.

- Soorunami annertusaasoqalaassaaq (kunngissaq tikissappat, aaqq.), sillimaniarnermulli tunngatillugu piareersarluarsimajuaannarpugut. Upalungaarsimaniarnermut pilersaaruteqarpugut, taannalu politiit, qatserisartut peqqinnissaqarfillu suleqatigalugit ukiut tamaasa naleqqussartarparput.

Taamaammat piareersimalluarpugut, Jens Klaus Lennert taama oqarpoq.

Kunngikkormiuunini pillugu immikkut tupeqartinneqassanngilaq

Kunngikkormiumut immikkut ittumik tupeqartitsinissamut piareersaateqartoqarsimanngilaq. Kunngissaq Frederik peqataasut allat assingalugit atugassaqartinneqassaaq.

- Uagut aalajangiissagutta allatuulli tupeqartinneqassaaq. Peqataajartussaguni allatuulli atugassaqartinneqassaaq. Peqataasut tamarmik assigiimmik misigisaqartinneqassapput, Jens Klaus Lennert taama oqarpoq.

Aamma atuaruk Kunngissaq Frederik Arctic Winter Games 2016-ip illersuisorissagaa

Arctic Circle Racep 20-ssaannik ingerlanneqarnera kunngikkormiumit peqataaffigineqanngikkaluarpalluunniit ukioq manna aatsaat taama peqataasoqartiginissaa Jens Klaus Lennertip nuannaarutigaa. Sisorartartut piareersarluarsimasut 200-t Sisimiut timaani apriilip aallaqqaataanit pingajuata tungaanut ingerlaartinneqassapput.