Kunngissaq Frederik Arctic Winter Games 2016-ip illersuisorissagaa
Kommuneqarfik Sermersuumi Borgmesteri, Asii Chemnitz Narup (IA), unammersuarnissat qilanaarai nuannaarutigalugulu Kunngissaq Frederik aaqqissuussinissamut angisuumut illersuisutut inissimmat.
- Kunngikkormiusut Ataqqinassusilik Frederik, Arctic Winter Games 2016-imut Nuummi ingerlassasussami illersuisujumalluni angernera isumaqartorujussuuvoq. Tamassuma erseqqissarpaa nukittorsarlugulu Danmarkip aamma Kalaallit Nunaata akornanni attaveqatigiinnerup pingaaruteqarnera aammattaaq Kunngissap Kalaallit Nunaannut asanninneranut attaveqarneranullu ersiutaalluni.
- Unammersuarnerit Nuummi annertoorujussuarmik pisoqarfiussapput, issittumi najugaqarfinni kulturikkut ataatsimoorussaqarneq ileqqullu nalliuttorsiutigineqassapput. Aappaagu marsimi sapaatip-akunnerani timersornikkut kulturikkullu pisussarpassuit assut qilanaaraakka, Nuuk annertuumik isiginiarneqassaaq nunarsuup assingani sumiiffia isiginiarneqarluni.
AAMMA ATUARUK AWG 2016: Ammaanersiornermik misiliineq
Unammersuarnerit aappaagu marsip arfernganiit aqqarngannut Nuummi ingerlanneqassapput. Unammersuarnerit aallartinnerisa kingorna aappassaanik Nuummi unammersuarnernik ingerlatsisoqassaaq. Siullermik taamannak ingerlatsisoqarpoq ukioq 2002.