AWG 2016: Ammaanersiornermik misiliineq
Ammaanersiornermik misiliineq pivoq Arctic Winter Gamesip aallartinnissaanut qaammatit arfiniliinnanngortullu, tassa AWG 2016 marsip ulluisa arfernanni aallartissammat.
AWG 2016-imi nammineq kajumissutsiminnik sulisussat ammaanersiornissamut piareersarnermi ikiuutaapput, ippassaq sapaammi peqataasut 1100-t missaat uiguleriiaanut inissillugit, nunat Arctic Winter Gamesimut peqataasussat erfalasuisa tunuanni inissillugit.
AAMMA ATUARUK VIDEO Nuummiut: Arctic Winter Games sapaatiuppat ikiorsiuk
Erinarsuut ilisarnaatissaq saqqummiunneqarpoq
Inuppassuit Nuup qiterpasissuani kingorna ingerlaaqatigiipput, Katuaq Nuuk Centerilu sanioqqullugit Inussiviup tungaanut ingerlaaqatigiillutik. Inussivimmi pisorpassuaqarpoq, torlussortoqarpoq, inngertoqarluni, nipilersoqatigiillu Small Time Giantsikkut Arctic Winter Gamesip nipilersuutaanik ilisarnaammik "We are the Arctic"-imik aamma atuillutik.
Erinarsuutip taassuma saqqummiunneqarnissaanut atatillugu videoliortoqarpoq, tassa videomut assiliisoqarluni:
- Peqataasusi tamassi nuannersumik misigisaqartitsinermut peqataagassi. Pisussanut atatillugu suli iluarsaassassaqarpoq, qaammatinilu tulliuttuni suliassaqaqaagut, taamaattormiuna aamma misiliisariaqartugut, AWG 2016-imik aaqqissuisut Facebookikkut quppernerani tamanna atuarneqarsinnaavoq.
