Aatsitassarsiutileqatigiiffik allaffittaarpoq

oktobarip 24-at 2006 10:45

Canadamiut aatsitassarsiutileqatigiiffiat Nunavup illoqarfiisa ilaani Qamanittuami allaffimmik ammaanialerpoq. Aatsitassarsiutileqatigiiffiup pingaarnertut aatsitassaq piiartagaa, Uran, pillugu paasissutissiisarnissaq tapersersorneqalernissarlu taamatut allaffittaarnermi siunertarineqarpoq.

Aatsitassarsiutileqatigiiffik Areva Ressources Canada, uranimik Qamanittuup eqqaani piiaaviliorniarluni pilersaarpoq. Naggueqativut 1500-t tamaani najugallit piiaaviliornissamik pilersaarutit taasissutigissavaat – taasinissaq kisiat tunngavigalugu allaffiliortoqarnianngilaq.

- Ukiorpassuarni allaffipput siunnersuisarfittut atorneqassaaq, taamaattumik innuttaasut arlaannik aarlerissuteqarunik uatsinnut saaffiginnissinnaapput sukkasuumillu siunnersorneqarlutik, Areva Ressourcesimeersoq Barry McCallum nutaarsiassaqartitsivimmut CBC News-mut oqarpoq.

Qamanittuami, ilami Nunavumi tamarmi, uranisiorfiit pilersinneqarnissaat innuttaasut ukiut 15-t matuma siorna itigartitsissutigaat - uranili maanna tassa eqqartorneqaqqilerpoq.

Innuttaasut akuerissappassuk, Nunavumi misissueqqissaarnerit suliarineqareerpata aatsaat, ukiut qulit qaangiuppata, uranimik piaasoqarsinnaalissaaq – piiaavissarlu ukiut tallimat qaangiuppata sanaartorneqarsinnaalissalluni.