Nunatta ilarujussuani sila – pingaartumik immaqa ullaaq – kiavissutut oqaatigineqarsinnaanngikkaluartoq, taamaattoq Danmarkimi silasiorfimmiit, DMI-miit tusarluarpugut, aasaq-mannamigooq pisarnermit kiannerussaaq.
DMI-miit nutaarsiassaq kingulleq taanna juli-miit septemberip tungaanut atuuttussaavoq. Ilimasaarutigineqarpoq Nunatta kujataata kitaani aasarissaarnerunissarput silallu kiannerussaa 40 procentimik ilimagissagipput.
Junimissaaq manna tikillugu pisarnermit aamma kiannerusimavoq – naak immaqa taama misigisimanngikkaluartugut. Taamaallaat Tasiilami pisarnermit nillernerusimavoq.
Neriuutigiinnariartigulu aasarsiutilerluta erniinnaq aneertalissasugut, seqinermut illersuutitalimmik timitsigut kiinnatsigullu tanittarnissarput puigussanngilarput aamma – tamattalu aasarsiorluarisatoq.