Aasaanerani nalunaaqutaq siuartinneqassasoq - aammaartumik

Nalunaaqutaq nikiseqqinneqartussanngorpoq. Tassa aasaanerani nalunaaqutaq nunatta annersaani unnugu siuartinneqassaaq.

Seqernup tarrinera. Qaqortoq, oktobarip 31-at 2021

Allattoq Hanna Vestergaard Hviid

marsip 30-at 2024 14:17

Nutserisoq Hanne Petersen

Aasaanerani nalunaaquttaq nunatta annersaani atuutilertussanngorlugu akunnermik ataatsimik unnugu siuartinneqassaaq.

Tassa ukiaanerani nalunaaqutaq aasaaneranilu nalunaaqutaq naleqqussarfiginiarlugit ukiut tamaasa oktobarimi akunnermik ataatsimik kinguartittarparput aasaaneranilu marsimi akunnermik ataatsimik siuartittarparput. Siornali ukiaanerani kinguartinngilarput.

Danmarkimmi Europallu sinnerata nalunaaqutaat 2023-mi oktobarip 28-ani kinguartinneqarmata, nunatsinni nalunaaqutaq nikisinneqanngilaq. Nunatta Europallu kippasissuata nalunaaqutaasa nikingassutaat akunnerit pingasuinnanngorniassammata nunatsinni nalunaaqutaq ukiaq kinguartinngilarput.

Aamma atuarukEuropamut ullumikkut akunnermik ataatsimik qaninnerulissaagut

Tassa nunatta Europallu kippasissuata nalunaaqutaasa nikingassutaat pingasuinnaaqqullugit aasaanerani nalunaaqutaq nunatta annersaani aammaartumik siuartinneqassaaq.

Taamaammat Kitaaniittut, Tasiilamiittut taassumalu eqqaaniittut nalunaaqutartik unnugu aqqanermiit unnuap-qeqqanut siuartissavaat.

Ittoqqortoormiinittut nalunaaqutartik nunatta annersaani nalunaaqutaq naleqqussarfiginiarlugu nikisissanngilaat. Arfininngorpat aasaanerani nalunaaqutamut ikaarsaassaagut (naalakkersuisut.gl)

Nalunaaqutatta nikittarfii allanngortut

Nalunaaqutatta nutaanik nikittarfeqalernissaanik siunnersuut Inatsisartut 2022-mi novembarimi akuersissutigaat.

Tamatuma ilutigisaanik nunatta, Europap kippasissuata Amerika kangisissuatalu nalunaaqutaat akunnernik pingasunik nikingassuteqalerput.

Aamma atuarukNunatsinni nalunaaquttap allanngortinnissaa taperserneqarluartoq

Nalunaaqutarput sisamanik nikittarfeqarpoq. Tassa taakku ilaat nunatta annersaani atuuttuusoq Danmarkip nalunaaqutaalu nikingassutaat akunnerit sisamaniit pingasunut, tassa akunnermik sivikillinikuuvoq.

NALUNAAQUTATTA NIKITTARFII

Nalunaaqutarput sisamanik nikittarfeqarpoq:

Nalunaaqutatta nikittarfii tamarluinnangajammik UTC -3-miikkunnaarlutik 2023-mi oktobarimi UTC-2-miilerput.

Ittoqqortoormiit Islandillu nalunaaqutaasa nikittarfii assigiipput, tassa UTC -1-miipput. Taakkunaniittulli nalunaaquttatik unnugu nikissittussaanngilaat, tassa nalunaaqutaasa nikittarfii aamma UTC-2-miilissapput.

Pituffiup Amerika kangisissuatalu nalunaaqutaasa nikittarfii assigiipput, tassa UTC -4-miipput.

Tunumi nunap eqqissisimatitaasup ilaani silasiorfimmi Danmarkshavnimi nalunaaquttap nikittarfia UTC +0-miippoq.

Allisiguk

Ittoqqortoormiinili nalunaaqutaq siorna oktobarimi kinguartippoq, tassa nikittarfii allanngunngillat.

Silasiorfimmi Danmarkshavnimi sakkutooqarfimmilu Pituffik Space Basemi aasaanerani nalunaaqutaat siuartittanngimmata unnugu nikisinneqassanngillat.

Nalunaaqutarput aasaanerani siuartinneqartarunnaavissasoq ukiaaneranilu kinguartinneqartarunnaavissasoq, Inatsisartut aalajangernikuuaat, EU-lu aatsaat taamaaliussaarpat tamanna atuutilertussaassalluni.

Nutaarsiassami kukkunermik nassaarsimaguit uunga allaffigineqarsinnaavugut.