Europamut ullumikkut akunnermik ataatsimik qaninnerulissaagut

Unnugu nalunaaqutaq aqqanermut Europamut akunnerit nikingassutigisarput annikinnerulissaaq, tamannalu nunatsinni suliffeqarfiit annersaata ilaani pisareersartariaqarnermik kinguneqarpoq.

Allattoq Nicole Sander Bertelsen, Paarnannguaq Nielsen

oktobarip 28-at 2023 10:53

Danmarkimi Europallu sinnerani nalunaaquttat akunnermik ataatsimik kinguartinneqarpata nunatsinni nikisissanngilarput.

Tamanna europap kitaanut akunnernik pingasuinnarnik kinguarsimalernitsinnik kinguneqassaaq.

Nunatta nalunaaqutaata allanngortinneqarnissaa Inatsisartuni qinikkanit siorna novembarimi akuersissutigineqarpoq.

Aamma atuarukNunatsinni nalunaaquttap allanngortinnissaa taperserneqarluartoq

Nunatta Europamut niueqateqarnerata ullormut akunnermik ataatsimik ilaneqarnissaa allannguinissamut tunngavilersuutit ilagaat.

Ukioq mannali taamaallaat nalunaaqutaq nikisissanngilarput. Danmarkip nalunaaqutaq aappaagu aasaaneranut nikisilerpagu aamma uagut akunnermik ataatsimik siuartissavarput, taamaalillutalu akunnerit assigiinngissutaasut attatiinnassallutigit.

Inatsisartut aasaanerani ukiuuneranilu nalunaaqutap atorunnaarsinneqarnissaa aalajangiunnikuuvaat, tamannali EU-p aatsaat taamaaliornerani pissaaq.

Piffissaq nakkutigilluaruk

Nalunaaquttap allanngornera pissutigalugu Air Greenlandip timmisartuussinissamut pilersaarutai tamarmik nutarterneqartariaqarput.

- Allannguuteqarnissamut suliaq ingerlaterujoorparput piareersimavugut taannalu piffissaq aamma sivitsortoq atorlugu suliarinikuuarput taamaammat nalunaaqutaq nikittussanngorpat uagut systemigut piareereerlugit aaqqereersimassapput, attaveqaqatigiinnermut siunnersorti, Paarnaq Hansen, oqarpoq.

NUNATSINNI NALUNAAQUTTAT INGERLAAQATIGIIFFII

Nunatsinni nalunaaquttat ingerlaaqatigiiffii sisamanut agguarneqarpoq.

Nunatta annerpaartaani ingerlaaqatigiiffik UTC-3 atorneqartartoq, unnugu UTC-2-nngussaaq.

Ittoqqortoormiit Islandimi nalunaaqutaq UTC-1 ingerlaqatigisarpaa.

Pituffimmi Amerikap kangiani nalunaaquttap ingerlaaqatigiiffia UTC-4 malinneqarpoq.

Kiisalu Danmarkshavnimi tassa Tunumi nunami allanngutsaaliukkami silasiorfimmi nalunaaqutaq ingerlaaqatigiiffimmi UTC+0-iuvoq.

Timmisartumut ilaasussat oktobarip 29-at sioqqullugu angalanissaminnut billetsersisimasut, sulilu aallanngitsut piffissamik nutartikkamik sms-isiumaarput. SMS taanna paasissutissiinerinnaavoq, attaveqaqatigiinnermut siunnersorti paasissutissiivoq.

Angalanissamut piffissap qanilliartornerani angalanissaq qulakkeerniarlugu Air Greenlandip nittartagaa misissorneqassasoq, Paarnaq Hansenip kaammattuutigaa.

Tamarmik piareersimallutik nalunaartut

Grønlands Rejsebureaup aamma umiarsuaatileqatigiiffiup pisortaasa piffissap nikinnissaa piareersimaffigalugu KNR-imut uppernarsarpaat.

Europamut piffissap assigiinngissutaasup nutaanngornerani nunarput Europap kangiata sineriaanut Amerikallu avannaata kitaata sineriaanut akunnerit assigiinngissutaasut pingasunik nikingaffianniilissaaq.

Nunatsinni nalunaaquttat atorneqartut sisamaapput. Nalunaaqutarlu nalinginnaasoq nunatta annerpaani atorneqartut maanna Danmarkimi nalunaaqutamut akunnermik ataatsimik qaninnerulissaaq.

Silasiorfik Danmarkshavnimi sakkutooqarfimmilu Pituffik Space Basemi aasaanerani nalunaaqutaq atorneqanngilaq, taamaammat tassani nalunaaquttamik nikisitsisoqassanngilaq. Ittoqqortoormiinili najugallit nalunaaqutaq akunnermik ataatsimik unnugu kinguartissavaat.