Aappassaanik suliariumannittussarsiuussisoqassaaq

Islandimiut suliffeqarfiutaat sanaartornermi atorneqarpoq. Maannalu tassa suliffeqarfik akiliisinnaajunnaarmat, suliaq aappassaanik suliariumannittussarsiuunneqassaaq.

Suliariumannittussarsiuineq ingerlanneqaqqittariaqalersoq, A/S Inissiaatileqatigiiffik Inimi pilersaarusiornermi pisortaq Robin Svendsen oqarpoq.

Islandimiut suliffeqarfiutaat Greenice akikinnerpaamik neqerooruteqarnermigut Narsami Inuilip allilerneqarnissaata suliarineqarnissaanut ajugaavoq. Suliffeqarfilli Kalaallit Nunaanni sulinermik misilittagaqanngilaq, kalaallinillu ilinniartoqarani.

Kommune Kujalleq nittartakkaminni Inuilip allilerneqaraluarnera pillugu, tusagassiutinut nalunaarumminni ima allappoq:

-  Kommunimi nuannaarutigisorujussuusarparput Namminersorlutik Oqartussat aningaasaligaanik sanaartugassanik kommunimut takkuttoqaraangat. Sanaartukkammi akileraarutinik isertitaqarfiusarput, suliffeqarfiit najukkamiittut suliassaqartarput, nutaanik suliffissaqartarpoq ilinniartunngortoqartarlunilu. Tamakkuli pinngitsuuissimapput INUILI-mi sanaartornermut tunngatillugu. Inuiaqatigiittut akissaqanngilluinnarpugut suliffiit akileraarutinillu isertitassat nunatsinniit avammut nassiussornissaannut.

A/S inissiaatileqatigiiffimmi Inimi pilersaarusiornermi pisortaq Robin Svendsen,  sooq kalaallit pinnagit Islandimiut sulisorineqarpat?

-  Suliffeqarfik GreenIce Kalaallit Nunaanni sulisinnaasutut nalunaarsoqqavoq, kiisalu aamma Inuilimi alliliinissaminnut akikinnerpaamik neqerooruteqarnikuulluni, A/S Inissiaatileqatigiiffimmi Inimi pilersaarusiornermut pisortaq Robin Svendsen oqarpoq.