IMAK meeqqat pillugit oqaaseqartartumut avoqqaarivoq: Pasilliut sakkortuvoq, patsisissaqarnanilu tunngavissaqanngilaq

Nunatsinni meeqqat atuarfianni ilinniartitsisut ‘imersimatillutik suliartunngitsoortartut’, Meeqqat pillugit oqaaseqartartoq Stina Sværd KNR-imit marlunngornermi oktobarip arfineq-aappaani unnukkut apersorneqarami oqarpoq.

- Nunaqqatigut imigassaq ajornartorsiutigalugu aamma suliartunngitsoortarput. Meerarpassuit meeqqerivinni atuarfinni peroriartorput, inersimasut, naak maligassiuisussaallutik aamma toqqisssisimasumik ineriartornissaq pisussaagaluartoq, sumiginnaaneq naliginnaavallaarpoq ajoraluartumik nunatsinni.

Oqariartuut tamanna ilinniartitsisut kattuffiannut IMAK-mut qisuariartitsivoq.

- IMAK-imit isumaqarpugut pasilliut sakkortooq tunngavissaqanngitsoq, taamak kattuffimmi siulittaasoq tusagassiutinut nalunaarummi allappoq.

Ilungersorlutik sulisut

Akerlianik pisoqartoq, taanna isumaqarpoq.

- Ullumikkut ilinniartitsisut ilungersorlutik atuartuutitik pitsaanerpaamik toqqissisimatinniarlugit angusaqartikkusullugillu sullissiniarsaripput, naak nukissat ikiortigisinnaasallu killeqaraluaqisut, Elna Heilmann allappoq.

Taamaattumik IMAK-imit paaserusupparput, ullumikkut nunatsinni takussutissartalimmik kisitsisinik aallaaveqartumik ersittoqarnersoq ilinniartitsisut imersimatillutik sulinngitsoortarnerannik ersersitsisumik.

Nunatsinni ilinniartitsisut ullut tamaasa ulapputeqangaatsiartarnerat nersualaarini, IMAK-ip Stina Sværdimik isornartorsiuineranik saqqummiunneqareersorlu meeqqat pillugit oqaaseqartartoq allakkatigut KNR-imut akissuteqarpoq. 

- Ilinniartitsisut hunnorujulikkaarpassuit tunniusimalluinnartut suliaat ataqqisorujussuuakka – siunertarinikuunngisaannarpara ilinniartitsisut sulilluarnerat tunniusimaneralluunniit nalorninartutut isigineqalernissaa, taanna allappoq.

Kisianni nunatsinni oqallittoqartillugu ilinniartitsisut meeqqallu atuarfiat ajortumik, eqqunngitsumik tunngavissaqanngitsunillu ataatsimut nalilersorneqartarnera kattuffimmiit tusakatapparput, siulittaasoq allappoq.

Meeqqat tusaagai

Nuna tamakkerlugu ilinniartitsisut ataatsimut taamatut taassallugit siunertarisimanngisaannarlugu, isornartorsiuinermut Stina Sværd akissuteqarpoq.

- Ilinniartitsisut ataatsimut suliaqaqatigiittut pineqannginneri erseqqissaatigissallugu uannut pingaaruteqarpoq, kisianni pisut ajornartorsiorfiit ataasiakkaat, meeqqanut ajorluinnartumik kinguneqarsinnaasunut erseqqissaaneruvoq – pingaartumik inersimasut meeqqat inuunerannut immikkut akisussaaffeqarneri pineqartillugit.

Kisianni meeqqat pillugit oqaaseqartartup apersorneqarnermini oqaatigisamini suminngaanniik aallaaveqarnersoq pillugu akissutisinissaq, tusagassiutinut nalunaarummi IMAK-imit kissaatigineqarpoq. 

Stina Sværdimit akissut:

- Apersorneqarninni, innersuussutigisassinni, Meeqqat Oqaaseqartartuata allaffianit saaffiginninnerit aammalu meeqqanik, inuusuttunik ilisimasalinnillu oqaloqateqarnermi misigineqartarsimasut aallaavigalugit ernummatikka oqaatigaakka.- Aamma eqqorpoq Naalakkersuisut innersuussusiornerminni misissuinermit paasisat aallaavigineqarmata, taakkualu paasisinnaavakka. 

- Meeqqanulli Oqaaseqartartutut kisitsisisit misissuinerillu kisiisa aallaavigisinnaanngilakka – kisiannili meeqqat namminneq oqaasii, misilittagaat oqaluttuaallu aallaavigaakka – taakkuuppullu inatsisit malillugit suliassaqarfinnut suliakkiutaasut.