Aalisartut akerliussutsimik takutitsipput, ilisimatusartut suaarutigeqarput inatsisissarlu ikuallanneqarluni.

Aalisarnermut inatsisissaq amerlasuunit akerliliiffigineqarpoq, piffissami kingullermi tusagassiuutitigut sammineqangaatsiarluni.

Inatsisissatut siunnersuut Inatsisartuni qinikkat ullumi kiisami oqaluuseraat.

Piffissap ilaani oqallitingaatsialertarput, oqallinnermilu ilisimatusartut aalisarnermillu suliaqartut arlallit inatsisissaq suliffinnik annaasaqarnermik aalisartukinnerulerneranillu kinguneqarsinnaasoq ernumassutigalugu oqaaseqarsimanerat oqallinnermi erngertumik qitiulerpoq.

Assersuutigalugu Polar Seafoodip raajartassiissutissarsiatit apparneqassasut tamannalu tunitsivinnik matusisariaqarneranik kinguneqarsinnaasoq – taamaalillunilu suliffissanik annaasoqarsinnaasoq KNR-imut oqaatiginikuuaa.

Aalborg Universitetiani Pilersaarusiornermut Piujuaannartitsinermullu lektorip, Rikke Becker Jacobsenip aalisarnermut inatsisissaq ukiuni tulliuttuni sinerissap qanittuani aalisartut ikilinerannik kinguneqarnissaa siulittorpaa.

Tamanna aalisarneq pillugu inatsisissatut siunnersuummi aalisartut ataasiakkaat annerpaamik aalisagartassat 2,5 procentiannik pisassaqarsinnaanerannik siunnersuuteqarnermik peqquteqarpoq.

“Aalisartut uumatiinnarlugit matoorniarneqalerput”

Naleqqamit oqaaseqartartup, Jens Napãttuup inatsisissatut siunnersuummut oqaatsit sakkortuut atorlugit oqaaseqartarfimmit nassuerutigaa. Taassuma inatsisissaq maannakkutut itsillugu oqallisigineqarnera ajorluinnarpoq.

- Aalisartut suliffeqarfiillu namminersortut ajortumik sunniivigineqassapput. Aalisartut inatsit atorlugu uumatiinnarlugit matoorniarneeqarput, taanna oqarpoq.

Ernumassutit illuatungiliuttut partiivinit allanit isumaqatigineqarput, taakkulu Royal Greenlandip suliffeqarfinnit aalisartuniillu namminersortunit pisassinneqarnerulluni immikkut pineqartussaanera pingaartumik naammagisimaanngilaat.

Inuit Ataqatigiit ernumassutit paasisinnaavaat, inatsisissallu ajortumik kinguneqannginnissaa qulakkeerusullugu.

- Inatsit suliffissakinnerulerneranik aalisartukinnerulerneranillu kinguneqassanngilaq. Aalisartut inatsimmut nutaamut pilliutigissanngilagut. Aalisartunut iluaqutissiissaagut, taanna oqarpoq.

“Taammaattoqanngilluinnarporli”

Ilisimatusartut aalisarnermut inatsisissaq nunatsinni aalisartukinnerulerneranik kinguneqassasoq siusinnerusukkut oqaatiginikuuaat.

Aalisarnermut piniarnermullu Naalakkersuisup, Kim Kielsenip (Siumut) naalakkersuisut sinerissap qanittuani aalisartukinnerulersitsinissaimk pilersaaruteqannginnerat aalajangiusimaannavippaa.

Tamanna aamma Inatsisartuni oqaaseqartarfimmit erseqqissaatigaa.

- Naalakkersuisut aalisartut nunamiilerniassammata aalisartuerussaaniartut ilaannit oqaatigineqarpoq. Taamaattoqanngilluinnarporli, taanna oqarpoq, nangillunilu:

- Aalisartut aalisareerpata nunami suliffissaqarnissaannut periarfissiiniarpugut. Ataasiakkaat sorusunnerat apeqqutaavoq.

Naalakkersuisuli namminneq oqaaseqataat aalisarnermut inatsisissatut siunnersuummi qupperneq 33 qupperaanni siunnersuut sulisoqarnikkut ukioq naallugu sulisut 480-it missaannut naapertuuttumik ikilinerinik kinguneqassangatinneqartoq tusarniaanermi novembarimi nassiunneqartumi atuarneqarsinnaavoq.

Tassa naalakkersuisut nammineerlutik aalisarnermut inatsisissaq aalisartukinnerulerneranik kinguneqassasoq siulittorpaat.

Politikerit siunnersuummik akunnerni arfineq-marlunni oqaluuserinnipput, inatsisissatullu siunnersuutip Aalisarnermut, Piniarnermut Nunalerinermullu ataatsimiititaliamut innersuunneqarnissaa naggataatigut aalajangerneqarpoq.

Aalisarnermut inatsisissaq maajip arfineq-pingajuani oqaluuserineqaqqissaaq.