Aalisartut illoqarfiit pingaarnersaanni KNAPK allaffeqarfianit Royal Greenlandip umiarsuavimmi allaffissuata eqqaaniittumit illoqarfikkut ingerlaarput.

Taakku Inatsisartunut ataatsimiittarfimminnerminni aalisarnermut inatsisissamik utaqqineqartuarsimasumik ullumikkut siullermeeralutik oqaluuserinnittussanut maanna apuussimalerput. Inatsit suli akuerineqanngilaq – inatsisissarli qinikkanit siullermeertumik ullumikkut oqaluuserineqartussaavoq. Oqaluuserisassarpassuuppullu, aalisarnermummi inatsisissaq amersuunik isumaqarfigineqarpoq.

Aalisartut ilaat allagartarsuarmik ima oqaasertaqartumik tigummiaqarpoq: "Pisuut pisuunngussapput, sinerissallu qanittuani aalisartut nungusagaapput." 

Aalisarnermut inatsisissaq aalisartut ullumikkut akerliussutsimik takutitsiffigisaasa ilagiinnarpaat. Aalisartummi orsussap akia nipisaallu suaasa akii aamma naammagisimaanngilaat.

Aalisarnermulli inatsisissaq inituvoq: Aalisartut piniartullu kattuffiata inatsissaq atuutilerpat pisassiissutit qanoq agguaanneqartalernissaat pingaartumik naammagisimaanngilaa, inatsillu sinerissap qanittuani nunaqarfinnilu aalisartunut qanoq kingunerluuteqarumaarnera ernumassutigaa.

Aalisartut Inatsisartut saanni ammarlortunnguusallutik qeqqisimapput. Ataatsimiittarfimmi qinikkat inatsisissamik suli oqaluuserinnilinngillat – ilaallu silataanut anillallutik akerliussutsimik takutitsisut naapippaat. Kim Kielsen (Siumut) aalisarnermut naalakkersuisuusoq taakku ilagaat. Taanna oqaaseqanngilaq, akerliussutsimilli takutitsisut suaartarnerannut tusarnaarpoq.

Ataaseq tigusarineqartoq

Inulli ataaseq sakkortuumik pissusilersuuteqarpoq.

Akerliussutsimimmi takutitsisoqarnerani inuk ataaseq tigusarineqarpoq. Pineqartoq tamat torersumiinnerat pillugu nalunaarummik unioqqutitsisutut tigusarineqarpoq. Kalaallit Nunaanni Politiit pigaartuisa pisortaat, Anette Ostenfeldt paasissutissiivoq.

Poltiiilli tigusarinninnermut tunngavilersuutigineqartoq pillugu  imaluunniit maanna susoqassanersoq pillugu annersuumik piffissami matumani oqaaseqarsinnaanngillat. Tigusarinninneq eqqaassanngikkaanni akerliussutsimik takutitsinermi eqqissisimasoqartoq, Anette Ostenfeldt oqarpoq.

- Eqqissisimasumik ingerlasisoq isumaqarpugut. Nikipiorput, kisianni ajunngillat. Innersuussutigut malippaat, taanna oqarpoq.