Aaja: Pineqaatissinneqarsimasunik nakkutilliisut akissarsiaat ilinniagaallu pitsaanerulerlik
Nunatsinni pineqaatissinneqarsimasunut inissiisarfinni nakkutilliisunik amerlanerusunik sulilersitsiniassagaaanni taakkualu sulisoriinnarneqassagunik akissarsiaqarnerusariaqarput ilinniartitaanerisalu qaffasissusaa pitsanngorsaaniarluni misissorneqassaaq.
Folketingimut ilaasortaq, Aaja Chemnitz Larsen (IA) taama oqarpoq.
Taanna Inatsiseqarnermut ministereqarfimmi suleqatigiissitaq nunatsinni politiini pineqaatissinneqarsimasunullu inissiisarfinni nakkutilliisut akissarsiaat sulinerminnilu atugaat pillugit oqaaseqaammik saqqummiussereernerani taama oqaaseqarpoq.
- Nalunaarusiat sisamat, 2017-imili imissutigisatta, nikingassutinut tapeqartariaqartoq erseqqissaatigereernikuuaat, taamaaliornikkummi pineqaatissinneqarsimasunik nakkutilliisut akissarsiaannik qaffaasoqarsinnaammat.
- Tamanna uagut tungitsinniit tapersingaatsiarnikuuarput, aammalii ilinniakkap qaffasissusaanut atanera pingaaruteqarpoq, Aaja Chemnitz Larsen oqarpoq.
Nunatsinni pineqaatissinneqarsimasunik nakkutilliisut politiitulli naligiissaarinermut tapeqanngillat.
AAMMA ATUARUK Inissiisarfinni paarsisut aningaasarsiaqarnerulersinnaanerat nuannaarutigineqartoq
Danmarkimi nunatsinnilu ilinniakkat assigiinngitsut
Danskit aningaasanut inatsisissaannit 49,2 millionit koruunit nunatsinni eqqartuussiveqarnermut immikkoortinneqarput. Aningaasat ilaat pinerluuteqarsimasunik nakkutilliisut akissarsiaasa qaffannissaannut atorneqassasut, Aaja Chemnitz Larsenip erseqqissaatigaa. Qanorli qaffanneqartigissanersut oqaatigerusunngikkallarpaa.
Akissarsiat sanileriisillugit:
- Pineqaatissinneqarsimasunik nunatsinni ukiut marluk tungaannut nakkutilliisoq tapisiat aalajangersimasut ilanngullugit 19.365 koruuninik qaammammusisarpoq.
- Danmarkimi paarnaarussivimmi ukiut marluk tungaannut nakkutilliisoq tapisiat aalajangersimasut ilanngullugit 24.769 koruuninik qaammammusisarpoq.
Paasissutissanik pissarsiffik: Inatsiseqarnermut ministereqarfiup ataani suleqatigiissitaq
Nunatsinni pineqaatissinneqarsimasunik nakkutilliisunngorniarneq ukiunik marlunnik sivisussuseqartarpoq, Danmarkimili parnaarussivinni nakkutilliisunngorniarneq ukiunik pingasunik sivisussuseqartarluni.
Tamatuma saniatigut nunatsinni inissiisarfinni nakkutilliisunngorniat ilinniarnertik tamaat akissarsiaqartarput, Danmarkilu atuartut atuarnermi nalaani suliffimmik misiliileraangamik aatsaat akissarsiaqalertarlutik, atuagarsornermilu nalaanni SU-nik ilinniarnermusiaqartarlutik.
Ilinniarnerup nalaani pissutsit naligiissaarinermut aamma sanilliunneqassasut, Aaja Chemnitz Larsen erseqqissaavoq.
Ilinniarnermi atuagarsornerusumik aamma ilaatigut ilaqartariaqartoq, folketingimut ilaasortaq isumaqarpoq.
AAMMA ATUARUK Paarnaarussivinni sulisut kattuffiat 5000 koruuninik assigiinngissuteqarneq pillugu: Iliuuseqarfigisariaqarparput
Akissarsiat ilinniartitaanerlu ataatsikkut misissorneqassasut
Aperineqarami, ilinniartitaaneq akissarsialluunniit sorliit siullertut pitsanngorsarneqassanersut, ima akivoq:
- Ataatsikkut misissorneqartariaqarput.
Aaja Chemnitz Larsenip akissarsiat sukkanerpaamik qaffanneqarnissaat siunnersuutigaa, piffissamilu ungasinnerusumi suli qaffaanneqaqqissinnaalluni.
Tamatuma saniatigut ilinniakkap qaffasissusaata pitsanngorsarnissaa sulisut sulisoriinnarnissaannut pingaaruteqarluinnartoq erseqqissaatigaa.
Nunatsinni pineqaatissinneqarsimasunut inissiisarfinni nakkutilliisut Danmarkimi parnaarussivinni nakkutilliisunit akissarsiakinnerusut piffissami sivitsortumi ilisimaneqartoq oqaaseqaammi allassimavoq.