28-nik ukiullip inuarsimanini agguisimaninilu nassuerutigigaa
Unnerluutigineqartoq angut 28-nik ukiulik toqutsinermut inuullu toqusimasup timaanik assuarnartumik ikkatilliisimasutut pinngitsuuneraqqaaraluarpoq.
Taassumali isumaa eqqartuussivimmi suliap ullut pingajussaani suliarineqanerani ullumi mumeriasaarpoq. Angut maanna nassuerpoq. Tamanna oqaloqatigiinnerup immiunneqarsimasup eqqartuussivimmi suliaqarnermi ippassaq marlunngornermi tusarnaartinneqareernerata kingorna pivoq.
-
Ilulissani toqutsillunilu agguisoqarnera
Angut toqutsisimasutut toqungasullu timaanut ileqqussaanngitsumik iliuuseqarsimasutut unnerluutigineqarpoq.
Taanna biilimik tillissimasututut biilernermullu allagartaqarani 2017-imi juunip aqqaneq-aappaani biilersimasutut aamma unnerluutigineqarpoq.
Angut Ilulissani 2020-mi februaarip 13-ianni peqqarniitsumik nakuusersimasututut aamma Nuummi pineqaatissinneqarsimasunut inissiisarfimmi 2022-mi januaarip tallimaani aamma peqqarniitsumik nakuusersimasututut aamma unnerluutigineqarpoq.
Toquneranut pissutaasoq suli ilisimaneqanngilaq. Tamanna toqungasup timaanik misissuisartut nassaarineqartut tunngavigalugit paasisinnaanngilaat.
Tamanna KNR-ip allagaatinik takunniffigisaanik unnerluussissummi allassimavoq.
Suliaq Qaasuitsup Eqqartuussisoqarfiani novembarip ulluisa 21-anni, 22-anni, 23-anni 24-anilu suliarineqarpoq.
Oqarasuaatikkut oqaloqatigiinneq taanna unnerluutigineqartup Nuummi pineqaatissinneqarsimasut inissiisarfianni tigummigallarneqarnerani immiussaavoq.
Unnerluutigineqartup angutit allat marluk oqaloqatigiinnermi tassani oqaloqatigai. Tassanilu unnerluutigineqartup qanoq iliorsimanini oqaluttuaraa. Unnerluutigineqartoq ilaatigut oqarpoq, angut siorna 24-nik ukiulik toqussimallugu timaalu aggorsimallugu.
- Iniga aaqartorujussuuvoq. Aassunni suli ullumikkut naamariasaartarpara.
- Inuup timaa aggorlugu uunartorujussuuvoq. unnerluutigineqartoq oqarasuaatikkut oqaloqatigiinnermi oqarpoq.
Illaqattaartut
Angutip 28-nik ukiullip toqunneqartoq siorna pisumi tassani kisimeeqatigisimallugu oqarasuaatikkut oqaloqatigiinnermi oqaluttuaraa.
Angutip unnerluutigineqartup toqusoq savimmik kapisimallugu oqaloqatigiinnermi oqaluttuaraa. Unnerluussisussaatitaasut eqqartuussivimmi suliami tunngavilersuutaat naapertorlugit angut toqusoq niaqqumigut 58-riarluni kapineqarsimavoq. Taassuma niaqua Ilulissani eqqakkanik ikuallaavimmi nassaarineqarpoq.
Angutit oqaloqatigiinnermi peqataasut pasineqartoq sakkortuunik oqaluleraangat arlaleriarlutik illaatigeqattaarpaat.
Unnerluutigineqartup oqarasuaatikkut oqaloqatiginnermi oqaluttuaraa toqusoq aggoreeramiuk timai eqqaaveqarfinnut assigiinngitsunut, Nammaarfimmiittunut igittarsimallugit.
AAMMA ATUARUK Ataatsimut isigalugu: Eqqartuussinerup ulluisa siulliup aappaata kingorna uku ilisimavagut
- Timit iginneranni eqqaaviit assigiinngitsut atorpakka, unnerluutigineqartoq oqarpoq.
Taassuma oqaluttuarnera naapertorlugu inaa angummik agguereerami aarasattuinnaavoq. Taamaattumik unnerluutigineqartup inini allanik takkuttoqannginnerani asassimanerarpaa.
- Iniga tamaat asappara. Qaqorsaat aqittoq ajaxilu qaqorsaatigaakka, taanna oqarpoq.
Unnerluutigineqartoq inuarnini agguininilu ulluni arlalinni inunnut allanut oqaluttuarisimanagit aamma oqarpoq.
- Ullut taamani takisaqaat. Unnuami sinissinnaaneq ajorpunga.
Ilulissani politeeqarfimmit ullut arlallit qaangiuttut sianerfigineqarsimalluni oqarpoq. Politiit inummik toqutsisimasutut pasigaanni oqaluttuaraa. Unnerluutigineqartullu oqarnera naapertorlugu politiit politeeqarfiliarsinnaannginnersoq aperaat, taamaaliorporlu. Najukkaminiillu anisimatsiaannarluni tigusarineqarsimanerarpoq.
Arnaataa politiinit killisiorneqartoq
Unnerluutigineqartup inunnut allanut ulluni arlalinni oqaluttuarsimannginnerarnera unnerluussisussaatitaasut uppernarsaatissaqartippaat. Unnerluutigineqartup arnaataa killisiorsimavaat. Arnap taassuma unnerluutigineqartoq, toqunneqartoq ilisimannittorlu siorna septembarip 29-anni inimi pisoqarfimmeeqatigisimanngilai.
Arnaq taanna taamani sulivoq, kammalaatimilu nalaasaarfiani unnuami sinippoq. Taannami aalakoortunut angerlarusussimanani killisiorneqarnermini oqarpoq. Ullup tulliani ullo-qeqqata siorna unnerluutigineqartup namminermilu angerlarsimaffianukarpoq. Tassani allanartumik takusimasatuani tassaanerarpaa saviup ipua savittaqanngitsoq, ipuinnaasoq.
AAMMA ATUARUK Toqutsineq pillugu eqqartuussinerup ullua siulleq: Unnerluutigineqartoq toqutsinermi agguinermilu pinngitsuunerartoq
Ullut qulingiluat qaangiupput. Unnerluutigineqartoq arnaatinilu oktobarip arfineq-pingajuanni ullaassakkut sisamap missaani innarput. Arnallu oqaluttuarnera naapertorlugu arnaq taanna akunnialunni sinereerluni unnerluutigineqartup nipituumik qianeranik iterpoq.
Arnaataasoq killisiorneraqami oqarpoq, unnerluutigineqartup qanoq iliorluni angummik toqutsinini agguininilu oqaluttuarisimagai.
- Angut paasineqarnissaminik annilaagasimavoq. Oqaluttuaraagamili nipituumik illallatsiartarsimalluni. Tamanna quilertanarpoq, unnerluussisoq, Marutha Thayapharan, arnaataasup killisiorneqarneranit issuaavoq.
Unnerluutigineqartup arnap oqarasuaataa angallattagaq tigusimavaa, oqarlunilu ulloq taanna sulissanngitsoq. Unnerluutigineqartup tigusaanissami tungaanut arnaatini ilagerusussimavaa. Arnaataasorlu ersisimasoq, killisiuinermi paasineqarpoq.
