28-nik ukiulik pinngitsuunerarpoq.Assi: KNR

Toqutsineq pillugu eqqartuussinerup ullua siulleq: Unnerluutigineqartoq toqutsinermi agguinermilu pinngitsuunerartoq

Nunatsinni toqutsinerit pillugit suliani peqqarniinnerpaat ilaat pillugu eqqartuussineq Ilulissani ullumi aallartinneqarpoq. Unnerluutigineqartoq oqaaseqarusunnanilu illersuisumi saniani assani paarlallugit nipaaqaluni issiavoq.

Saviit arfinillit. Timip ilai marluk. Annoraamerngit, allarutit qaliillu aarasattut.

Angut 28-nik ukiulik pillugu eqqartuussivimmi suliami taakku saqqummersinneqarput. Taanna siorna septembarip ulluisa 29-anni inuarsimasutut toqungasullu timaanut ileqqussaanngitsumik iliuuseqarsimasutut unnerluutigineqarpoq. Ilulissani ikuallaavimmi eqqakkat akornanni nassaartoqarnerata kingorna ullut ingerlaneranni timip ilai, saviit, atisallu aarasattut nassaarineqarput.

Ilulissani toqutsillunilu agguisoqarnera

 

Angut toqutsisimasutut toqungasullu timaanut ileqqussaanngitsumik iliuuseqarsimasutut unnerluutigineqarpoq.

 

Taanna biilimik tillissimasututut biilernermullu allagartaqarani 2017-imi juunip aqqaneq-aappaani biilersimasutut aamma unnerluutigineqarpoq.

 

Angut Ilulissani 2020-mi februaarip 13-ianni peqqarniitsumik nakuusersimasututut aamma Nuummi pineqaatissinneqarsimasunut inissiisarfimmi 2022-mi januaarip arfineq-aappaani aamma peqqarniitsumik nakuusersimasututut aamma unnerluutigineqarpoq.

 

Tamanna KNR-ip allagaatinik takunniffigisaanik unnerluussissummi allassimavoq.

 

Suliaq Qaasuitsup Eqqartuussisoqarfiani novembarip ulluisa 21-anni, 22-anni, 23-anni 24-anilu suliarineqassaaq.

28-nik ukiulik pinngitsuunerarpoq. Taanna eqqartuussivimmi aamma oqaaseqarusunngilaq. Unnerluutigineqartoq illersuisumi, Finn Meinelip saniani eqqissisimalluni issiavoq.

Unnerluutigineqartoq tujuuluaqqamik putulimmik qernertumik qarlinnillu timersuutinik qasertunik atugaqarpoq. Nujai takisuut hastehaletut qilersimapput. Kiinaani nukinnguamik nikittoqarpallaarneq ajorpoq, assaalu paarlassimasut nerrivimmi saaminiitsippai. Nakkutilliisut marluk taassuma tunuani nakkutilliillutik issiapput.

28-nik ukiulik akuerineqaqqaarnani atorsimasutut, biilernermut allagartaqarani biilinik ingerlatsisimasutut marloriarlunilu nakuusersimasutut aamma unnerluutigineqarpoq. Taakku tamarmik nassuerutigai.

Pissutsilli taakku eqqartuussinerup ulluani siullermi suliarineqanngillat. Unnerluussisussaatitaasup, Marutha Thayapharanip eqqakkanik ikuallaavimmi nassaarineqartut politiillu misissueqqissaarnerat unnerluussinermik kinguneqartut annikitsortalersorlugit saqqummiuppai.

AAMMA ATUARUK Toqutsinermi agguisoqarneranut atatillugu suliaq ima ingerlanneqassaaq

Unnerluutigineqartup sooq oqaaseqarusunnginnera illersuisup, Finn Meinelip paasissutissiissutigerusunngilaa. Taassumali illersukkanilu inuartutut toqungasullu timaanik ileqqussaanngitsumik iliuuseqarsimasutut unnerluutiginninnermi pinngitsuutitsisoqarnissaa piumasaqaatigigitsik taamaallaat oqaatigisinnaavaa.

Taamaammat unnerluussisussaatitaasut suliamik saqqummiussinerat kisimi KNR-ip maani saqqummersissinnaavaa.

Niuimik siullermik nassaartoqartoq

Suliaq siorna arfininngornermi oktobarip ulluisa aappaani nalunaaqutaq 20.30-p missaani aallartippoq. Ilulissani eqqagassanik ikuallaavimmi aqutsisoq, Leif Mathiasen inuup niuanik eqqagassat akornanni nassaartoqarnera pillugu unnerluutiginnilluni politiinut sianerpoq.

Politiit nalunaaqutaq 21.00 ikuallaavimmut apuupput assersuilerlutillu. Nunap immikkoortuani nakorsaaneq aamma aggersarneqarpoq.

Eqqagassat tamarmik nassaartoqarnerata kingorna misissuiffigeqqissaarneqarput.

Sapaat oktobarip ulluisa pingajuanni nalunaaqutaq 18.45 iggavimmi savimmik qernertumik ipulimmik nassaartoqarpoq.

Aqaguanilu saviit puussiami plastikkimiittut inuup aavanik takussutissaqartut arlallit nassaaarineqarput. Aamma puussiaq allarummik, sungaartoq aappaluaartumik kinguleriiaartumik qalipaatilimmik imaqartoq kiisalu qaleq tungujortoq killingani nissalersugaq aattaqartoq nassaarineqarput.

Tamanna misissorneqarmat inuup aarigaa paasineqarpoq.

Saviit assigiinngitsut arfinillit unnerluussisussaatitaasut toqutsinermut agguinermullu atassuserpaat.

AAMMA ATUARUK Politimesteri toqutsinermi agguisoqarnera pillugu: Assingusumik nalaataqarnikuunngilagut

Politiit suliami oktobarip ulluisa sisamaanni paasisaqarluarput. Niaqoq 58-eriarlugu kapineqarsimasoq nassaarineqarpoq. Taakku pinerluffigineqartup toqunnginnerani toqoreerneranilu pisimasut misissuinermi kingornatigut paasineqarpoq.

Pinerliffigineqartoq ilisarineqarpoq, paasineqarlunilu tassaasoq angut 24-nik ukiulik Ilulissaneersoq. Angut politiinit ilisimaneqartooreermat taassuma DNA-vanut paasissutissat pigineqareersuupput.

DNA-mik misissugassamik tigusisoqarpoq, tamannalu politiit DNA-nut paasissutissaataannut sanilliunneqarluni.

Pinerluttunik misissuisartut nalunaarutaanni pinerliffigineqartoq politiit DNA-mik paasissutissaqarfigisareriigarigaat uppernarsarneqarpoq.

- DNA-mut paasissutissat kalaallinit inuiaqatigiinnit arlallnneersuusani pinerliffigineqartumeernissaannut ilimanaataasoq millioneriaammik annertussuseqarpoq. Pinerliffigineqartulli qanimut ilaqutaanneersut ilaanatik, unnerluussisussaatitaasoq Marutha Thayaphara oqarpoq.

- Politiit taamaalillutik toqungasup kinaanera uppernarsarpaat.

Isaannarnik takussaanngitsunik misissuinermi timip ipiutaasartaani imigassamik takussutissaqarpoq. Tassangali nakorsaatinik hashimilluunniit takussutissarsisoqanngitsoq, unnerluussisussaatitaasut oqarput.

Ullut ingerlaneranni timip ilaanik arlalinnik nassaartoqarpoq, kisianni arlallit ilaatigut ikuallassimallutik.

Toquneranulli pissutaasoq suli ilsiimaneqanngilaq. Toqungasut timaanik misissuisartut nassaarineqartut aallaavigalugit tamanna erseqqissarsinnaasimanngilaat.

Unnerluutigineqartoq pinerluffigineqartorlu immiaararseqatigiittut takuneqartut

Politiit pinerluffigineqartup aqqa saqqummersinnikuuaat. Taanna siorna septembarip qaammataani angerlarsimaffeqanngitsuuvoq.

Ikuallaavimmi nassaartoqaqqaanerata kingorna illoqarfiup pisiniarfiini videokkut nakkutilliissutit misissorluarneqarput. Spar-købmandimi nakkutilliissutip unnerluutigineqartoq, pinerluffigineqartoq angullu alla pisiniarfimmi ataatsimoorlutik septembarip ulluisa 28-anni nalunaaqutaq 19.49 immiaararsimasut takutippaa.

- Tassa pinerluffigineqartoq septembarip ulluisa 28-anni uumasoq ilisimavarput. Aamma ilisimavarput taassuma Facebookimi quppernerani septembarip ulluisa 29-anni assimik videomik ikkussisoqartoq, Marutha Thayapharan oqarpoq.

AAMMA ATUARUK Unnerluussut: Toqoriarlugu aggoriarlugu eqqaavimmut igippaa

Assimi videoliami pinerluffigineqartoq unnerluutigineqartorlu aamma savik iffiamut kitserut assitarineqarput. Politiit oqarnerat naapertorlugu videop taassuma ulloq ikkunneqarfia ullutut toqutsiffiusutut politiit nalilerpaat.

Angutit pingajuat piffissami sivitsumi tigusaaqqavoq. Pinerluffigineqartup atisaasa ilaat taassuma angerlarsimaffiani nassaarineqarput. Taannali erngertumik iperagaaqqippoq.

Unnerluutigineqartoq najukkamini siorna okotobarip ulluisa arfineq-pingajuanni nalunaaqutaq 16.41 tigusarineqarpoq. Taannalu taamanili tigummigallarneqaqqalerluni.

Eqqartuussivimmi suliaq aqagu marlunngornermi nanginneqaqqissaaq. Ilisimannittut qulit killisiorneqassapput, taakkunannga pingasut Danmarkimit videoliutikkut killisiorneqassallutik.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl