Siorna oktobarip ulluisa aappaani inuup niuanik nassaartoqarnerata kingunerisaanik ikuallaavimmi eqqakkat tamarmik misissorluaqqissaarneqarput.Assi: KNR / Andreas Wille

Ataatsimut isigalugu: Eqqartuussinerup ulluisa siulliup aappaata kingorna uku ilisimavagut

Ilulissani Qaasuitsup Eqqartuussisoqarfiani ulluni makkunani toqutsineq agguinerlu pillugit eqqartuussisoqaleruttorpoq.

- Kalaallit Nunaanni Politiinit Ilulissani suliatut ittumik suliaqarnikuusimanerluta eqqaamasinnaanngilara.

Politimesteri, Bjørn Tegner Bay Qaasuitsup Eqqartuussisoqarfiani sapaatip akunnerani matumani eqqartuussisoqarnissaanut atatillugu KNR-imut sapaatip akunnerata siuliani oqarpoq.

- Nunatsinni toqutsinermi agguisoqarnikuuvoq, kisianni tamanna qangali pivoq. Kisianni toqungasup eqqagassat akornannut toqqorneqarnera nalaannikuunngilarput, politimesteri oqarpoq.

AAMMA ATUARUK Dag 2 i drabssag: Vidne drak med tiltalte og offer få timer før drab

Eqqartuussinermi ullut siulliit marluk kingorna uku ilisimalerpagut:

  • Ilulissani eqqakkat ikuallatassat akornanni inuup niuanik siorna arfininngornermi oktobarip aappaani nassaartoqarpoq.
  • Inuup niaqua 58-eriarlugu kapineqarsimasoq ataasinngornermi oktobarip ulluisa sisamaani nassaarineqarpoq. Kapuineq toqunnginnerata toqoreerneratalu kingorna tamanna pisimasoq misissuinerup kingusinnerusukkut takutippaa.
  • Nassaartoqarnera kingorna ullut ingerlaneranni inuup timaata ilaanik allanik aamma nassaartoqarpoq, taakkuli ilaatigut ikuallassimapput.
  • Ilulissani toqutsillunilu agguisoqarnera

     

    Angut toqutsisimasutut toqungasullu timaanut ileqqussaanngitsumik iliuuseqarsimasutut unnerluutigineqarpoq.

     

    Taanna biilimik tillissimasututut biilernermullu allagartaqarani 2017-imi juunip aqqaneq-aappaani biilersimasutut aamma unnerluutigineqarpoq.

     

    Angut Ilulissani 2020-mi februaarip 13-ianni peqqarniitsumik nakuusersimasututut aamma Nuummi pineqaatissinneqarsimasunut inissiisarfimmi 2022-mi januaarip tallimaani aamma peqqarniitsumik nakuusersimasututut aamma unnerluutigineqarpoq.

     

    Toquneranut pissutaasoq suli ilisimaneqanngilaq. Tamanna toqungasup timaanik misissuisartut nassaarineqartut tunngavigalugit paasisinnaanngilaat.

     

    Tamanna KNR-ip allagaatinik takunniffigisaanik unnerluussissummi allassimavoq.

     

    Suliaq Qaasuitsup Eqqartuussisoqarfiani novembarip ulluisa 21-anni, 22-anni, 23-anni 24-anilu suliarineqarpoq.

  • Unnerluutigineqartoq najukkamini siorna oktobarip ulluisa arfineq-pingajuanni tallimanngornermi tigusarineqarpoq. Taannalu taamanili tigummigallarneqalerluni manna Nuummi pinerluuteqarsimasunut inissiisarfimmiippoq.
  • Pinerluffigineqartoq unnerluutigineqartorlugu sirona septembarip ulluisa 28-anni marlunngornermi immiaararseqatigiittut Ilulissani pisiniarfimmi Sparimi videokkut nakkutilliissutip takutippaa. Ullorlu taanna pinerluttoqarnissaanut ulloq sioqqullugu pisimanissaa unnerluussisussaatitaasut nalilerpaat.
  • Video pinerluuteqarfigineqartup Facebookimi qupperneranut septembarip ulluisa 29-anni unnuami ikkunneqartoq aamma nalunngilarput. Videoliami unnerluutigineqartoq pinerliffigineqartorlugu savillu iffiamut kitserut takuneqarsinnaapput. Politiit oqarnerat naapertorlugu ullormi toqutsisoqarfiusutut politiit naliligaanni video inoqutinut attaveqaasersuutinut ikkunneqarpoq. Unnerluussisussaatitaasullu taamaalilluni pinerluffigineqartoq unnerluutigineqartorlu imminut ilisarisimasutut imaluunniit imminnut atassuteqartut tunngavilersorpaa.
  • Unnerluutigineqartup inigisaani pinerluttoqarneranik misissuinermi takussaasumik aammik nassaartoqanngilaq.
  • Pinerluttoqarnerani misissuisartut misissuinerminni misissuutit assigiinngitsut pingasut atorlugit nateq misissorpaat. Misissuinerit tamarmik aammik takussutissiipput, misissuinernili tamani uumasumit aaqarsinnaavoq. Inerniliinerli ersarippoq: Unnerluutigineqartup najugaani inuup aavanik nassaartoqarpoq.


Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl