19-inik ukiulik nakuuserneq toqutsinermik kinguneqartoq pillugu pineqaatissinneqarsimasunut inissiisarfimmiittussanngortinneqartoq

Angut 19-inik ukiulik Aasianni Eqqartuussisoqarfik Qaasuitsumi ataasinngormalli unnerluutigineqalerpoq. Taanna toqutsisimasutut, siorasaarisimasutut, pinngitsaaliilluni atoqatiginnissimasutut qanigilluinnakkaminik atoqatiginnissimasutut meeqqamillu 15-it inorlugit ukioqartumik kinguaassiutigut atoqatiginnissimasutut unnerluutigineqarpoq – unnerluussisussaatitaasullu ukiuni qulingiluani pineqaatissinneqarsimasunut inissiisarfimmiittussanngortitsisoqarnissaa piumasaraat.

Suliarli allatut inerneqarpoq. 19-inimmi ukiulik unnerluussissummi qanigilluinnakkamik atoqatiginninnertut aamma meeqqamik 15-it inorlugit ukiulimmik kinguaassiutitigut atoqatiginninnertut nassuiaatigineqartuni pinngitsuutinneqarpoq. Aamma toqutsisimasutut eqqartuunneqarani toqumik kinguneqartumik nakuusersimasutut siorasaaruteqarsimasutullu eqqartuunneqarpoq.

Eqqartuussut piumasaqaatitaqanngitsumik ukiuni sisamani affaanilu pineqaatissinneqarsimasunut inissiisarfimmiittussanngortitsisoqarnissaanik inerneqarpoq.

Illersuisoq unnerluussisussaatitaasorlu suliamik suliassanngortitseqqinniarnerlutik aalajangernissaminnut ullunik 14-inik eqqarsarfissaqarumapput.

Unnerluussisussaatitaasoq, Cecilie Stürup Sørensen KNR-imut oqarpoq.

Taassuma oqarnera naapertorlugu nakuuserneq toqusoqarneranik kinguneqartoq ukiuni pingasunik affaanilu pineqaatissinneqarsimasunut inissiisarfimmiittussanngortitsinermik kinguneqarajuppoq.

- Suliami uani savik atorneqarsimammat pissutsit sukannernerupput. Kisianni eqqartuussut maanna atuaqqissaarlugulu suliassanngortitseqqinniarnerluta isumaliutigissavarput, taanna oqarpoq.

Ukioq ataaseq matuma siorna 22-nik ukiulimmut saassussisoq

Unnerluussissut naapertorlugu angutip maanna 19-inik ukiullip angut alla siorna juulip 16-ini unnuap qeqqata kingunitsianngua kiinaatigut timaatigullu annersarlugu saassuppaa, tamatumalu kingorna nunamut uppimmat toqqusassillugu.

Tamatuma kingorna unnerluutigineqartoq savimmik siorasaaralunilu pineqarlineqartoq kapivaa, pinerlineqartorlu taamaalilluni aaverluni toquvoq. Pinerlineqartoq 22-nik ukioqarluni toquvoq.

19-inik ukiullip ukiup ataatsip matuma siorna pisoq eqqartuussivimmi nassuerutigaa. Toqutsisutulli pinngitsuunerarluni. Taassumali nakuuserneq toqumik kinguneqartoq nassuerutigaa – eqqartuussiviullu tamanna pillugu eqqartuuppaa.

Meeqqap ukiui ilisimanngikkai

19-inik ukiulik unnerluussut naapertorlugu ilaquttaminik qanigilluinnakkaminik piffissami pinerliffiusumi 15-it inorlugit ukioqartumik arlaleriarluni atoqatiginnissimasutut aamma unnerluutigineqarpoq. Tassani aamma pinngitsuunerarpoq.

Unnerluussisup, Cecilie Stürup Sørensenip oqarnera naapertorlugu eqqartuussiviup tamanna uppernarsarneqanngissoraa, taamaammallu tassunga aamma eqqartuunneqarani.

Angut 2022-mi oktobarimit 2023-mi februaarimut meeqqamik 14-inik kinguaassiutitigut atoqatiginnissimasutut aamma unnerluutigineqarpoq.

19-inik ukiullip meeqqap kinguaassiutitigut atoqatigisimanera nassuerutigaa, kisianni:

- Angutip niviarsiaraq 15-it inorlugit ukioqarnersoq ilisimasimanagu oqaatigaa, unnerluussisussaatitaasoq, Cecilie Stürup Sørensen oqarpoq.

Taamaalilluni pinerluttulerinermi inatsimmi paragraf 79-imi ”meeqqamik 15-it inorlugit ukiulimmik kinguaassiutitigut atoqateqarnertut” nassuiaatigineqartumi aamma pinngitsuunerarpoq.