Angut toqutsisimasutut qanigilluinnakkamillu kinguaassiuutitigut atornerluisimasutut unnerluutigineqartoq
Aasianni Qaasuitsup Eqqartuussisoqarfiani suliami peqqarniitsumi angut savimmik kapisinikkut toqutsisimasutut unnerluutigineqarpoq.
Unnerluussummi KNR-ip takuffigisinnaasaani angut toqutsisimasutut unnerluutigineqarnermi saniatigut meeqqamik 15-it inorlugit ukiulimmik pinngitsaaliisimasutut qanigilluinnakkamik kinguaassiuutitigut atornerluisimasutut siorasaaruteqarsimasutullu aamma unnerluutigineqartoq allassimavoq.
Unnerluussissut naapertorlugu angut siorna juulip 16-iani unnuap qeqqata kingunitsianngua angummik kiinaatigut timaatigullu annersaalluni saassussivoq, tamatumalu kingorna nunamut uppisikkamiuk toqqusassivaa.
Tamatuma kingorna unnerluutigineqartoq siorasaarivoq inullu savimmik kapillugu pinerlineqartoq taamaalilluni aaverluni toquvoq.
Pinngitsaaliineq qanigisamillu kinguaassiuutitigut atornerluineq
Angut ilaquttaminik piffissami pinerliffiusumi 15-it inorlugit ukiulimmik arlaleriarluni pinngitsaaliisimasutt aamma unnerluutigineqarpoq.
Unnerluussissut naapertorlugu 2022-mi juunip qaammataani nakuuserluni imaluunniit siorasaaraluni niviarsiaraq imminik aluttuisippaa, kingornatigullu pinngitsaalillugu.
Angut ilaquttaminik piffissami maajimit septembarimut kinguaassiuutitigut atornerluisimasutut aamma unnerluutigineqarpoq.
Tamatuma saniatigut 2022-mi oktobarimit 2023-mi februaarimut meeqqamik 14-inik ukiulimmik inernissami tungaanut arlaleriarluni pinngitsaaliisimasutut aamma unnerluutigineqarpoq.
Unnerluussisussaatitaasut ukiuni qulingiluani pineqaatissinneqarsimasunut inissiisarfimmiittussanngortitsisoqarnissaa pinerlineqartunullu katillugit 125.000 koruuninik taarsiissuteqarnissaa piumasaraat.
Aggustip aallaqqaataani sisamanngornermi eqqartuussuteqartoqarnissaa naatsorsuutigineqarpoq.
