Politiit pinngitsaaliilluni kujannittoqarsimaneranik nalunaarutiginninnerit sisamat ulapputigigaat

- Nunatsinni sapaatit akunnerata naanerani suliatsinnut attuumassutilinni tigummigallakkavut tallimaapput.

Kalaallit Nunaanni politiit pigaartuisa ittuat, Preben Kleist, ataasinngornermi ullaap tungaani taama oqarpoq.

Tigummigallakkani tallimaasuni sisamat pinngitsaaliilluni kujannissimaneragaapput ataaserlu inuiariarsimaneragaasoq, politiit pigaartuisa ittuat oqarpoq.

- Pinngitsaaliilluni kujannittoqarsimaneranik nalunaarutiginninnerit sisamat Qaqortumi, Sisimiuni Nuummilu pipput, taakkunannga marluk Nuummi, Preben Kleist oqarpoq.

Tamarmik tigummigallagaasut

Tigusat taakku tamarmik eqqartuussivimmi sapaatit akunnerani naanerani sassartitaareerlutik ullut 25-t 28-llu akornanni tigummigallagaassasut, politiit pigaartuisa ittuat ilisimatitsivoq.

- Sisimiuni suliaq ilaquttatut qanigilluinnakkamik pinngitsaaliilluni kujannittoqarsimaneraanermut tunngasuuvoq, Nuummilu suliani aappaa angut inuusuttoq arnamik ukioqqortunerusumik pinngitsaaliilluni kujannissimaneraagaasumut tunngasuuvoq, Preben Kleist oqarpoq.

Suliani taakkunani misissueqqissaaleruttoramik suliat taakku pillugit annerusumik oqaaseqarsinnaanani, politiit pigaartuisa ittuat oqarpoq.

Pinngitsaaliilluni kujannittoqarsimaneranik suliat sisamat saniatigut soorlu angerlarsimaffimmi eqqissiviilliornerit imigassartorsimanermik aallaavillit politiit ulapputaannut aamma ilaapput.

- Sapaatit akunnerata naanerani akissarsiffiusumi feeriaqarnersiutisisoqarneranilu pisut ilarpassui imigassartorsimanermik aallaaveqarput, taamaammat angerlarsimaffimmi eqqissiviilliortunut arlalinnut aamma meerartalittortaliusunut orniguppugut, politiit pigaartuisa ittuat oqarpoq.