Angutip 22-nik ukiullip Aasianni savimmik kapineqarnini toqqutigigaa
![](/sites/default/files/styles/image_934x467/public/user_pictures/ChristiansenSoeren_Aasiaat__sc019.jpg?itok=-hWkLLSz)
Angut 22-nik ukiulik Aasianni savimmik kapineqareerluni sapaatiummat ullaassakkut toquvoq.
Kalaallit Nunaanni Politiit tusagassiuutinut nalunaaruteqarlutik taama allapput.
Politiit peqqinnissaqarfimmeersullu ornigutipallapput, angullu ikioqqaarneqarpoq. Annaanneqarsinnaasimanngilarli toqusutullu kingorna nalunaarutigineqarluni.
18-inik ukiulik pasisaasoq
Aasianni politiit angummik 18-inik ukiulimmik nalunaarfigineqarnerminnit sivitsunngitsoq tigusarisaqarput.
18-inik ukiulik sooq pasisaanersoq, taavalu toqutaasoq pasisarlu ilisarisimaqatigiinnersut, tusagassiuutinut nalunaarummi paasissutissiissutigineqanngillat.
18-inik ukiulik inatsit tunngaviusoq malillugu ullumi killisiorneqassasoq, toqutsisimasutullu unnerluutigineqassasoq, Kalaallit Nunaanni Politiit tusagassiuutinut nalunaarummi allapput.
Politiit suliaq pillugu maannakkut paasissutissiinerusinnaanngitsut, Kalaallit Nunaanni Politiini pigaartut pisortaat KNR-imut sapaatiummat ulloqeqqariartortoq paasissutissiivoq.