14-inik ukiulik atuartut angerlarsimaffianniit angerlartinneqartoq: Kommuni pilersaaruteqanngitsoq

Saqqarmiup Ivinnguaq Jensenip Ilulissani atuartut angerlarsimaffianniit angerlartitaagami atuartussaatitaanini annaavaa. Kommunili pisussaaffeqartuusoq angajoqqaanut suli attaveqanngilaq.

Allattoq Sikkersoq Rosing Karlsen, Paarnannguaq Nielsen

decembarip 16-at 2023 11:11

Naak meeqqat allat 14-inik ukiullit atuarfimmi atuartinneqaraluartut Ivinnguaq Jensen Saqqami Pilersuisumi nioqqutissanik ilioraasuuvoq.

Ivinnguaq Ilulissani atuartut angerlarsimaffiannut nuunnerminiit qaammat qaangiummat, atuaqqinnissaanut pilersaaruteqartinnagu angerlartinneqarpoq. Sakkak Jensenilu kommunimiit sumiginnagaasutut misigisimavoq.

- Assorujuk sumiginnagaasutut misigisimavugut. Anaanaalu oqarpugut, sooruna uterfigineqanngitsugut? Sooruna meerarput isiginiarneqanngitsoq? Sooruna atuarnissaanut kaammattorneqanngitsugut? Sakkak Jensen oqarpoq nangillunilu:

- Qiviarneqanngilagut arlaannik sunnguamilluunniit. Meeqqatta atuaqqinnissaa pillugu ikiorserniarsarineqanngilagut, taanna oqarpoq.

Ivinnguaq Jensen atuartut angerlarsimaffiani malittarisassanik malinnissinnaanngimmat akunnernilu ilinniartitsiviusuni malinnaasinnanngimmat angerlartinneqarpoq. Atuartut angerlarsimaffianniit angerlartitaanermut uppernarsaammi tamanna allaqqavoq. Taamaalillunilu atuartussaatitaanini annaavaa.

Meeqqat atuarfianni meeqqat atuartussaatitaanerat nunatsinni atuuppoq.

Artorsaateqarnerminit ikiorneqanngitsoq

Akunnerni ilinniartitsiviusuni malinnaaniarnerminik ajornartorsiuteqarnera, aliasuuteqarnermik peqquteqartoq Sakkak Jensen oqaluttuarpoq.

- Ilaquttaminut peerutereersimasunut maqaasilluni atuarusuttarsimanngilaq, aqqusaangaqangaatsialaarnikuungatta 2022-mi 2023-milu ilaquttatsinniit qimagaalluta Kræftimik taava taakkua unittoorutigalugit. Uagut oqaluuttuartaraluarlutigu tassaneeruusaarsimavoq, Sakkak Jensen oqarpoq.

Aamma atuarukIlulissani atuartut angerlarsimaffittaavat ammaanersiortoq

Atuartut angerlarsimaffianiit Ivinnguaq Jensenip aliasuuteqartarnera ilisimaneqarmat tarnip pissusianik ilisimasalimmik oqaloqateqartalernissaa neqeroorutigaat, Sakkak Jensenillu ernertik nunaqqatiginnginnamikku ikiorusullugu akuersipput. Tamannali piviusunngortinneqarsimanngitsoq oqaatigaa:

- Oqarfigineqarnikuugaluarpugut tarnip pissusianik ilisimasalimmik oqaloqatiginnissinnaasoq. Taanna akuerinikuugaluarparput meerannguarput ikiorusullutigu, Tassami ilaginnginnatsigu. Kisiannili taanna pisimanngilaq oqaloqatiginnittalersimanngilaq, Sakkak Jensen oqarpoq.

Akunnerni atuartitsiviusuni takkuneq ajormat, atuartut angerlarsimaffiata najugaqarteqqissinnaanagu septembarimi angerlartinneqassasoq aalajangiunneqarpoq.

Eqqumeequtaali aana, Atuarfik Mathias Storchip angerlartitaasimaneranut tunngatillugu paasitinneqarsimannginnerat. Angajoqqaallu attaviginerisigut nunaqarfimminut angerlareersimasoq aatsaat paasivaat.

Atuaqqinnissaanut pilersaaruteqartoqanngitsoq

Ivinnguaq Jensenip atuaqqinnissaanut Atuarfik Mathias Storchip pilersaaruteqartinngimmagu, Sakkak Jensen Saqqami atuarfiup pisortaa suleqatigalugu utaqqiisaasumik suliffimmik misiliinissaanut ujarlertariaqalersimapput.

Saqqamilu Pilersuisumi ukiup naanissaata tungaanut suliffimmik misiliisoq Sakkak Jensen ilanngullugu oqaatigaa.

Ivinnguaq Jensenilli utaqqiisaasumik suliffimmik misiliinini naammassiguniuk, ukioq nutaamiit sussanersoq ilisimaneqanngilaq.

- Sinneranut pilersaarusiortoqarnikuunngilaq. Taamatut oqarluaannarsinnaavunga. Ukiup nutaaminngaanniit sussanerpa? Naluaraluunniit praktikkimi tiguneqaqqissanersoq, Sakkak Jensen oqarpoq.

Atuarfik, atuartullu angerlarsimaffianiitsitsisarneq pillugu inatsit

Atuarfik pillugu Inatsisartut inatsisaat pillugu Namminersorlutik Oqartussat nalunaarutaat

Atuartitaasussaatitaaneq

§ 29. Meeraq kinaluunniit Kalaallit Nunaanni najugalik, imaluunniit sivikinnerpaamik qaammatini 6-inni tassani najugaqartussaq atuartitaasussaatitaavoq malittarisassat §§ 30 - 31-miittut malillugit.

Atuariartortunut atuartut angerlarsimaffianiititsisarneq pillugu Namminersorlutik Oqartussat nalunaarutaat

§ 2. Atuartut angerlarsimaffianniinnissaq atuartunut 9. aamma 10. klassini atuartunut namminneq illoqarfigisaminni nunaqarfigisaminniluunniit Meeqqat atuarfiat pillugu Inatsisartut inatsisaat naapertorlugu atuarnissamik neqeroorfigineqarsinnaanngitsunut neqeroorutaassaaq.

§ 24. Imm. 2. Atuartut angerlarsimaffianni najugaqarneq unitsinneqarpat kommunalbestyrelsip inunnik isumaginninnikkut aaqqissuussinertigut, matumani aamma angajoqqaarsianut inissiinikkut malinnaavigissavaa atuartup ingerlaqqittumik atuartinneqarnissaa, atuarfimmi nalinginnaasumik atuartitsinermut nallersuussinnaasumik aaqqissuussaasumik.

Imm. 3. Atuartup angerlarsimaffianniikkunnaarnermi tulleriiaarisartut iliuusissatut pilersaarusiussapput aammalu atuartitsissutaatitaaneq qanoq isumagineqaannassanersoq isummerfigissallugu.

Allisiguk

Atuartoq kinaluunniit angerlartitaasimasoq suliffimmik misileereernerup kingorna pinngitsoorani atuartinneqaqqittusaasoq, Avannaata Kommuniani atuarfinnut siunnersorti Lars Fleischer oqaluttuarpoq.

Meeqqat atuarfiat pillugu inatsisartut inatsisaat naapertorlugu, atuartumik angerlartitsinermi pilersaarusiortoqarsimanissaa kommunip akisussaaffigigaa allassimavoq.

- Tulleriiaarisartut imaluunniit atuarfik pinngittuuinnani angajoqqaat oqaloqatigisussaavaat pilersaarusiorlutillu. Atuarfimmi naliginnaasumik atuartinneqaqqittussaapput praktikkereeraluarpalluunniit, Lars Fleischer oqarpoq.

Tamannali naammassineqarsimanngitsoq, Ilulissani atuartut angerlarsimaffiata pisortaata uppernarsarpaa.

Kommunip akisussaaffigiumanngikkaa

Naak Inatsisartut inatsisaanni allassimagaluartoq, atuartup atuartiinnarneqarnissaanut kommuni akisussaasuusoq, Avannaata Kommuniani atuartitsiinnarnissamut akisussaaffik atuarfinni siunnersortip Lars Fleischerip atuarfinniinnerarpaa:

- Uagut akisussaaffik tunniunnikuuarput atuarfinnut, tassa assersuutigigutsigu maani Ilulissani Atuarfik Jørgen Brønlund tassani aqutsisut ulluinnarni taakkua suleqatigiipput, Lars Fleischer oqarpoq.

Aamma atuarukMeeqqat atuarfianni atuartunik isumaginninneq annertusarneqalersoq

Akisussaaffilli atuarfinnut tunniunneqaannarsinnaanngitsoq Ilinniartitaanermut aqutsisoqarfimmi, ilinniartitaanermut nakkutilliisoq Salik Schmidt oqarpoq.

Atuarfimmut, atuartussaatitaanermut, atuartut angerlarsimaffianiisitsisarnermut aammalu atuartup angerlarsimaffianiikkunnaartitsisoqarpat atuartup atuartiinnarneqarnissaanut kommune akisussaasuusoq taassuma ilanngullugu oqaatigaa.

Ilutigalugu kommunimi tulleriiaarisartut sinaakkutissatut nassuiaataannik allassimasoqartussaavoq – tassa imaappoq meeqqap pisariaqartitaa naapertorlugu atuarfimmi sorlermi atuartinneqassanersoq tulleriiaarisartut sinaakkutissatut nassuiaataat malillugu aalajangiisartussaallutik. Taannalu kommunip nittartagaani kikkunnit tamanit takuneqarsinnaasussaalluni.

Sinaakkutissanik allaqqasoqanngiitsoq

Avannaata Kommunianili tulleriiaarisartut sinaakkutissaannik allassimasoqanngilaq. Taamaattumik kommunimi atuarfinnut siunnersorti Lars Fleischer KNR-imiit marlunngornermi novembarip ulluisa 14-ianni nal. 13.12 tulleriiaarinermi sinaakkutissatut nassuiaatit nittartakkami nassaarisinnaannginatsigit qinnuigaarput nassiussinnaanerai.

Allagaq inatsimmik atuuttumik imaqartoq, qulinillu titarneqartoq akunneq ataaseq qaangiummat nassiuppaa.

Allakkap imarisaanik paasissutissanut allattorsimaffiani KNR-imiit misisssoratsigit ulloq taanna nal. 13.54 allanneqarsimasoq takuneqarsinnaavoq.

Naak Lars Fleischerip tulleriiaarisarnermut sinaakkutissatut nassuuiaammik piumanitsinniit akunnerit marluk qaangiuttut nassiutereeraluaraa, KNR-imiit attavigeqqipparput ilumut taanna allagaq sinaakkutissatut nassuiaat tulleriiaarinermi atorneqartarnersoq. Avannaata Kommunianili sinaakkutissatut nassuiaateqanngitsoq oqaatigaa.

Ivinnguulli angajoqqaavi, ernermik atuarteqqinneqarnissaanut neriuuteqarput.

Nutaarsiassami kukkunermik nassaarsimaguit uunga allaffigineqarsinnaavugut.